1 ኣቤት ጎዳዉ!

ታኒ ሱሬቴኒኔ

ሲይ ባይንዳ

ኔናን ኣማኔታ

ዴኢዳ ጊሻስ

ኔ ታስ ፒርዳ።

2 ኣቤት ጎዳዉ! ታና ፓጫ፤

ታ ቃን ፒልጋ፤

ታ ዎዚና ጼላ፤

3 ኣይስ ጊኮ ኔ ሲቆይ

ታ ሲንን ዴስ፤

ታኒ ኔ ቱማቴ

ኦጌን ሄሜታይስ።

4 ታኒ ባሌዛ ኣሳታራ

ኢሲፌ ኡቲኬ፤

ሎኦ ሚሳቲዛ

ኢታታ ማባራን ጌሊኬ።

5 ኢታ ኦዛ ኣሳታ ኢሲፌቴ

ታኒ ኢጻይስ፤

ኮፋ ኣሳታራ ኢሲፌ ኡቲኬ።

6 ኣቤት ጎዳዉ!

ታናን ቆሆይ

ባይንዳይሳ ቤሳናስ

ታ ኩሼዛ ሜጫይስ፤

ሂስታዳ ያርሾ

ያርሺዛሶዛ ዩያይስ።

7 ጋላታ ማዛሙሬ ዬጻይስ፤

ኔኒ ኦዳ ሚሽ

ኡባካ ዮታይስ።

8 ኣቤት ጎዳዉ!

ኔኒ ዴኢዛ ኬኔ

ኔ ቦንቾይ ኣቂዛሶሆ

ታኒ ዶሳይስ።

9 ታና ናጋራንቻታራ

ኢሲፌ ፒርዶፋ፤

ኣስ ዎዛይታራካ ኢሲፌ

ታ ሼምፖ ይሶፋ።

10 ኢስታ ኩሼን ኢታ ሃልቾይ ዴስ፤

ቃሴ ኢስታ ኡሻቻ ኩሼይ

ማታኤን ኩሚዴስ።

11 ታኒ ጊዲኮ ቦሬይ ባይንዳ

ዱስ ዳይስ፤

ታና ዎዛ፤

ታስ ቃታ።

12 ታ ቶሆይ ዴምባሶን ኤቂዴስ፤

ታኒ ዴሬይ ሺቂዳሶን ጎዳ ጋላታና።