ዳዊቲ ዛማሬታ ካቦ ኤዶታኔስ ዬጺዳ ማዛሙሬ
1 ታ ሼምፖያ ጾሳን ጻላ
ሼምፖ ዴማዉስ፤
ታስ ኣቶቴ ኢዛፔ ዬስ።
2 ኢዚ ጻላ ታስ ዛላኔ
ታና ኣሺዛይሳ፤
ታ ቆቴታ ኣቲዛሶ ጊዲዳ ጊሻስ
ሙሌካ ሂርጊኬ።
3 ጪሚዲ ኩንዳና ማቲዳ
ጎዳ ማላኔ
ሙሲዳ ላሻ ማላ
ዎልቃይ ባይንዳ ኣስ
ይሳናዉ ሱጊሼ
ኣዉዴ ጋካናስ ዴኣንዴቲ?
4 ኢስቲ ኢዛ ቦንቾ ሶሆፔ
ካዉሻናስ ጻላ ኮዬቴስ፤
ኢስቲ ዎርዶን ኡፋዬቴቴስ፤
ባንታ ዶናን ኣንጄቴስ፤
ጊዶ ኣቲን
ባንታ ዎዚናን ቃንጌቴስ።
5 ታ ሼምፖዬ!
ዎፑ ጋዳ ጾሳ ጻላ ናጋ፤
ታስ ሂዶታይ ኢዛፔ ያና።
6 ኢዚ ጻላ ታስ ዛላኔ
ታና ኣሺዛይሳ፤
ታ ቆቴታ ኣቲዛሶ ጊዲዳ ጊሻስ
ሙሌካ ሂርጊኬ።
7 ታስ ኣቶቴኔ
ቦንቾይ ቤቲዳይ ጾሳፌ፤
ኢዚ ታ ቆቴታ ኣቲዛሶኔ
ታስ ሚኖ ዛላ።
8 ኣሶ! ኡባ ዎዴ
ጾሳን ኣማኔቲቴ፤
ኢዚ ኑስ
ቆቴቲ ኣቲዛሶ ጊዲዳ ጊሻስ
ኢንቴ ዎዚና ቆፋ ኢዛስ ዮቲቴ።
9 ቦንቾሶፔ
ዬሌቴ ማዴና፤
ካቲዳሶፔ ዬሌቴካ
ኡባይ ሃዳ።
ኢስቲ ሜዛኔ ዴንንታ
ጫርኮ ማላ፤
ኢስቲ ኢሲ ቦላ
ጫርኮ ማላ ካዉሻ።
10 ቦንቃን ኣማኔቶፍቴ፤
ካይሲ ሺሺዳ ዱሬቴን
ሂዶታ ኦፍቴ።
ኢንቴስ ዱሬቴ ዳሪኮካ
ኢንቴ ዎዚና ኢዛ ቦላ ዎፍቴ።
11 ጾሳይ ኢሲቶ ሃሳይዴስ፤
ታኒ ናምኡ ዮኦታ ሲያዲስ፤
ሄይቲካ፥ «ዎልቃይ ጾሳሳ፤
12 ሜርና ሲቆይ ጾሳሳ።»
ኣቤት ጎዳዉ!
ኔኒ ኣስ ኡባስ
ኢዛ ኦሶ ኦሶ ማላ ኢማና።62፡12 ኢዮ 34፡11፤ ኤር 17፡10፤ ማቶ 16፡27፤ ኦሮ 2፡6፤ ኣጁ 2፡23