1 ኢዚ ታ ሾባ

ዎሲዛ ዎሳ

ሲዪዳ ጊሻስ

ታኒ ጎዳ ዶሳይስ።

2 ኢዚ ባ ሃይ

ታኮ ዬጊዳ ጊሻስ

ታኒ ዴኢዛ ዎዴ ኡባን

ኢዛ ጼይጋና።

3 ሃይቆይ ዎጺማዴ ማላ

ታና ዶዲ ኦይኪዴስ፤

ዱፎን ጌሎይ ታና ሂርጊሲዴስ።

ጬጬይኔ ኡንኦይ

ታና ቶሊ ኦይኪዴስ።

4 ሄ ዎዴ ታኒ፥

«ኣቤት ጎዳዉ! ሃዳራ!

ታና ኣሻ» ጋዳ

ጎዳ ሱን ጼይጋዲስ።

5 ጎዳይ ኪያኔ ጺሎ፤

ኑ ጾሳይ ማሪዛይሳ።

6 ጎዳይ ኣሽኬታ ናጌስ፤

ታኒ ሜቶቲዳ ዎዴ

ኢዚ ታና ኣሺዴስ።

7 ታ ሼምፖዬ ኣኔ ዎፑ ጋ፤

ጎዳይ ኔስ

ሎኦ ሚሽ ኦዴስ።

8 ጎዳይ ታና ሃይቆፔ፥

ታ ኣይፌ ኣፉንፌ፥

ታ ቶሆካ

ጴፔ ኣሺዴስ።

9 ሄሳ ጊሻስ

ታኒ ጎዳ ሲንን

ሼምፖራ ፓጻ ዲዛይታ

ጊዶን ሄሜታይስ።

10 ታ፥ «ታኒ ኬሃ ኡንኤታዲስ»

ጊዛ ዎዴካ

ኣማኖ ኣጋቤኬ።✝

11 ታስ ጊዛዚ ዪን፥

«ኣሲ ኡባይ ዎርዶ» ጋዲስ።

12 ኢዚ ታስ ኪዪዳ ኪያቴ ጊሻስ

ታኒ ጎዳስ

ኣይ ቃንጻናስ ዳንዳያዚና?

13 ጎዳይ ታና ኣሺዳ ጊሻስ

ዎይኔ ኡሹ ጋላታስ ሺሻዳ

ኢዛ ሱን ጼይጋና።

14 ኢዛ ዴራ ኡባ ሲንን

ታኒ ኣዲኒዳ ኣዲና

ጎዳስ ጋና።

15 ጌሻታ ሃይቆይ

ጎዳ ሲንን ቦንቾ።

16 ኣቤት ጎዳዉ! ታኒ ኔ ኣይሌ፤

ታኒ ኔ ኣይሌይ ና፤

ታና ቃሾፔ ቢርሻዳሳ።

17 ኣቤት ጎዳዉ!

ታኒ ጋላታ ያርሾ ኔስ ያርሻና፤

ሂስታዳ ኔ ሱን ጼይጋና።

18 ኢዛ ዴራ ኡባ ሲንን

ታኒ ኣዲኔቲዳ ኣዲና

ጎዳስ ጋና።

19 ሄሳካ ታኒ ጋናይ፥

ዬሩሳላሜን ዲዛ ጎዳ

ኬ ዳባባና።

ጎዳይ ጋላቴቶ!