ና ሃይቆ ጊጊሶ ጌቴቲዛ ዬን ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጎዳዉ!
ታኒ ኔና ኩሜ
ዎዚናፔ ጋላታና፤
ማላሊሲዛ ኔ ኦሶዛ
ኡባካ ታ ዮታና።
2 ታኒ ኔናን ኡፋዬታናኔ
ሃሹ ጋና።
ኡባፌ ቃ ጾሳዉ!
ታኒ ኔ ሱንስ
ጋላታ ማዛሙሬ ዬጻና።
3 ኔ ቆንጪዛ ዎዴ
ታ ሞርኬቲ ጉዬ ሲማና፤
ኔ ሲንፌካ
ጴቲ ያና።
4 ኔኒ ታስ ጺሎ ፒርዳ ፒርዳዳሳ፤
ኔኒ ጺሎቴን ፒርዳሼ
ኔ ካዎቴ ኣራታን ኡታዳሳ።
5 ኔኒ ካዎቴታ ሴራዳሳ፤
ኢታታካ ይሳዳሳ፤
ኔኒ ኢስታ ሱን
ሜሪ ሜርናስካ ቁጫ ዲጋዳሳ።
6 ሞርኬቲ ሜሪ ሜርናስ ይዳ፤
ኢስታ ካታማታካ
ሙሌራ ቃላ ይሳዳሳ፤
ኢስቲ ሙሌራ ዶጌቲ ኣቲዳ።
7 ጊዶ ኣቲን ጎዳይ
ሜርናስ ካዎቲዲ ዴስ፤
ኢዚ ፒርዳናስ
ባ ኣራታ ጊግሲዴስ።
8 ኢዚ ሃ ኣላሜዛ
ጺሎቴን ፒርዳና፤
ካዎቴታ ቦላካ
ቱማቴን ፒርዳና።
9 ጎዳይ ኡንኤቲዳይታስ
ባቃቲ ኣቲዛሶ፤
ሜቶ ዎዴታንካ
ቆቴቲ ኣቲዛሶ።
10 ኔ ሱን ኤሪዛይቲ
ኔናን ኣማኔቴቴስ፤
ኣይስ ጊኮ ጎዳዉ!
ኔኒ ኔና ኮይዛይታ
ዬጋ ኣጋቤካ።
11 ጺዮኔን ካዎቲ ኡቲዳ ጎዳስ
ጋላታ ማዛሙሬ ዬጺቴ፤
ኢዚ ኦዳ ኦሶ
ዴሬ ኡባስ ቆንጬን ዮቲቴ።
12 ኣይስ ጊኮ ሱ ጉሲዛይታስ
ሃሎ ኬሲዛ ጾሲ
ናቄቲዳይታ ዋሶዛ
ኢዚ ዶጌና።
13 ኣቤት ጎዳዉ!
ታ ሞርኬቲ
ታና ዬዴዛይሳ ቤኣ።
ኔኒ ታስ ቃታዳ
ሃይቆፔ ታና ኣሻ።
14 ሄሲካ ታኒ ጺዮኔ ኣሳ ካሬን
ኤቃዳ ኔና ጋላታናሲኔ
ኔ ኣሺዳይሳን
ኬሃ ኡፋዬታናሳ።
15 ካዎቴይ ባ ቦኪዳ
ኦላን ኩንዲዴስ።
ኢስቲ ቆቲ ዎዳ ዎጺማዴይ
ኢስታ ቶሆ ኦይኪዴስ።
16 ጎዳይ ባ ጺሎ ፒርዳን ኤሬቲዴስ፤
ኢታ ኣሲ ባ ኩሼን ኦዳ
ኦሶ ዎጺማዴን ኦይኬቲዴስ።
17 ኢታቲ ሲኦሌን ጌላና፤
ጾሳ ዶጊዛ ካዎቴይ
ኡባይካ ኢስታ ማላ ሃናና።
18 ሂዬሳቲ ኣይዴካ
ዶጌቲ ኣቴቴና፤
ዎይኮ ማንቆታ ሂዶታይ
ጮ ሜርናስ ዬና።
19 ኣቤት ጎዳዉ!
ካዎቴቲ ባ ዎልቃን ዴንዲዲ
ኔ ቦላ ጬቄቶንታ ማላ
ኔኒ ኢስታ ቦላ ፒርዳ።
20 ኣቤት ጎዳዉ!
ኔ ኢስታ ዳጋን፤
ኢስቲ ኣስ ጊዲዳይሳ
ኔኒ ኢስታ ኤሪሳ።