ዬ ማጻፋ 90

ጾሳ ኣስ ሙሴይ ዎሲዳ ዎሳ

1 ጎዳዉ! ኔኒ ኑስ

ዬሌታፔ ዬሌታ

ጋካናስ ሺቂ ኣቲዛሶ ጊዳዳሳ።

2 ዙማቲ ሜታናፔ ካሴ፥

ዎይኮ ኔኒ ሳኣ

ኦናፔ ካሴ

ሜርናፔ ሜርና ጋካናሲ

ኔኒ ጾሳ።

3 ኔኒ ኣሳ ናይታ፥

«ኣሳ ናይቶ!

ጉዬ ቢታን ሲሚቴ»

ጋዳ ኢስቲ ሜቲዳ ቢታን

ጉዬ ዛራሳ።

4 ሺ ላይ ኔስ ኣዳ

ኢሲ ጋላሳ ማላ፤

ዎይኮ ኦማርሳፌ ኢሲ ሳቴ ማላ።✝90፡4 2ጴጽ 3፡8

5 ኣስ ቆፖንታ ኤፊዛ ዲኦ ማላ

ኔ ኤፊሺን፥

ኢስቲ ኣጉሞ ማላ ኣና፤

ማላዶ ማላዶ

ሞኪዛ ማታ ማላ ጪሊሌቴስ።

6 ማታይ ማላዶ ዲጪዲ ጪዬስ፤

ኦማርሳ ዎዴ ጊዲኮ

ሹሊዲ ሜሌስ።

7 ኑኒ ኔ ቃንጌን ዉሪዶስ፤

ኔ ሃንቆ ሱሌን ዳጋሚዶስ።

8 ኔኒ ኑ ኢታ ኦሶ

ኔ ሲንን ዎዳሳ፤

ቃሴ ኑ ጌንዳ ናጋራ

ኔ ሲን ፖኦኮ

ኣዳሳ።

9 ኑ ዎዴ ኡባይ

ኔ ሃንቆን ኣዴስ፤

ኑ ላይካ ኦሌን ዉርሶስ።

10 ኑ ዳና ላይይ

ላፑን ታማ፤

ዳሬስ ጊኮ ኦስፑን ታማ፤

ሄይቲካ ሜቶኒኔ

ጬጬን ኩሚዳ፤

ኑ ላይይ ኤሶን ኣስ፤

ኑኒካ ኤሶን ባና።

11 ኔ ሃንቆዛ ዎልቃ ኦኔ ኤሪዛይ?

ኔ ሃንቆ ሴላይ ያሼስ።

12 ኑ ላይ ማራራ

ኑ ጎኤታና ማላ

ኑና ኣ ኤራቴ ታማርሳ።

13 ኣቤት ጎዳዉ!

ኔ ሃንቆይ

ኣዉዴ ጋካና ጋምኣኔ?

ሲማ! ኔ ኣይሌታስ ቃታ!

14 ኑ ላይ ኡባን

ኑኒ ኡፋዬታና ማላኔ

ዬጻና ማላ ማላዶ ማላዶ

ኔ ሲቆን ኑና ካልሳ።

15 ኔኒ ኑና ሜቶዳ

ጋላሳታ ኬናኔ

ኑኒ ቱጋ ቤኢዳ ላይታ

ሊኬ ኑና ኡፋይሳ።

16 ኑስ ኔ ኣይሌታስ

ኔ ኦሶይ ቆንጮ፤

ኔ ቦንቾይ ኑ ናይታስ ቤቶ።

17 ኣቤት ጎዳዉ! ኑ ጾሳዉ!

ኔ ኪያቴ ኑናራ ጊዶ፤

ኑ ኦዛ ኡባ

ኑስ ኢንጄሳ፤ ኤሮ!

ኑ ኦዛ ኡባ ኑስ ኢንጄሳ።