ዬ ማጻፋ 58

ዳዊቲ ዛማሬታ ካቦስ፥ «ይሶፋ» ጌቴቲዛ ዲ ጊጊሶን ሺሺዳ ዎሳ ማዛሙሬ

1 ኢንቴኖ ዴሬ ሃሪዛይቶ!

ኣዳካ ኢንቴ ዶናፔ

ጺሎ ሃሳያይ ኬዚዜ?

ኣሳ ኡባስ ጺሎ ፒርዴቲ?

2 ኣካይ! ኢንቴ ዎዚናን

ኢታ ሚሽ ሃልቼታ፤

ኢንቴ ኩሼይ ቢታ ቦላ

ማካላ ኦሶ ኦስ።

3 ኢታቲ ባ ኣዪ ኡሎፔ ዶሚዲ

ሞሮ ኦጌ ቤቴስ፤

ዬሌቲዳ ጋላሳፌ ዶሚዲ

ባሌቴቴሲኔ ዎርዶቴቴስ።

4 ኢስቲ ሾሻ ማላ

ማርዜራ ዴቴስ፤

ቱሌ ጎፔ ሾሻ ማላ

ባ ሃይ ቱሊሴቴስ።

5 ሙሬኒዛይሲ ኣይ ማላ

ጪንጫ ጊዲኮካ

ጎፔ ሾሺ

ኢዛ ጬንጉርሳ ሲዬና።

6 ኣቤት ጾሳዉ!

ኢስታ ኣቻ ሜን፤

ኣቤት ጎዳዉ!

ጋሞታ ባንቂላ ሜን።

7 ኢስቲ ጉኪዛ ሃ ማላ

ዬቶ፤

ኢስቲ ዱኪዛ

ዎንዳፌ ዪሻይ ዱንኦ።

8 ኢስቲ ቢሼ

ሙሺዛ  ማላ

ጊዴቶ፤

ፖኦ ቤኦንታ ኣዉጫያ ዬሌቲዳ

ና ማላ ጊዴቶ።

9 ኣጉን ታማይ ኦቶ ሱሊሶንታ

ይዛ ማላ ናጋራንቻታ

ኔ ኤሶን ይሳ።

10 ናጋራንቻታ ቦላ

ሃሎ ኬሲዛይሳ ቤኢዲ

ጺሎቲ ኡፋዬታና።

ኢታታ ሱን

ባ ቶሆ ሜጬታና።

11 ሄ ዎዴ ኣሳይ፥

«ኣዳካ ጺሎቲ ኦዳ

ሎኦ ኦሶስ

ዎይቶይ ዴስ፤

ቱሙካ ሳኣ ቦላ ፒርዲዛ

ጾሲ ዴስ» ጋና።