1 ጎዳ ጋላቶይ ሎኦ፤

ኣቤት ኡባፌ

ቃ ጾሳዉ!

ኔ ሱንስ

ማዛሙሬ ሺሾይ ሎኦ።

2 ማላዶ ኔ ሜርና ሲቆ፥

ጊዶ ኔ ኣማኔቴ

ኣዋጃይ ሎኦ።

3 ታሙ ሻያን ዋጼቲዳ

ባጋናኒኔ

ማሲንቆ ዲጺሼ ኣዋጃይ ሎኦ።

4 ኣቤት ጎዳዉ!

ኔ ኦዳ

ዎልቃማ ኦሶቲ

ታና ኡፋይሲዳ፤

ኔ ኩሼይ ኦዳ ጊሻስ

ታኒ ኡፋይሳን ዬጻይስ።

5 ኣቤት ጎዳዉ!

ኔ ኦሶይ ኣይ ኬና ጊታ!

ኔ ቆፋይካ ኣይ ኬና ጪማ!

6 ሄሳ ኤያ ኣሲ ኤራናዉ ዳንዳዬና፤

ዳማ ኣሲካ

ኣኬካናዉ ዳንዳዬና።

7 ኢታቲ ማታ ማላ ዲጪኮካ፥

ጌኔ ኦዛ ኡባቲ ጪይኮካ

ኢስቲ ሜርናስ ያና።

8 ጊዶ ኣቲን ኣቤት ጎዳዉ!

ኔኒ ሜርናስ ኡባፌ ቃ።

9 ኣቤት ጎዳዉ!

ኔ ሞርኬቲ ያና፤

ኢታ ኦዛ ኡባቲ

ፒስኪ ጋናይሳ ኑ ኤሮስ።

10 ታ ካጬዛ ሜን

ካጬ ማላ ቂሳዳሳ፤

ሎኦ ዛይቴንካ ታና ቲያዳሳ።

11 ታ ሞርኬቲ ጾኔቲዳይሳ

ታ ኣይፌን ቤኣዲስ፤

ታ ባልጋራታ ኩንዴ

ታ ኣይፌን ቤኣዲስ።

12 ጺሎቲ ዛምባ ማላ ዳያና፤

ቃሴ ሊባኖሴ

ጺዳ ማላ ዲጫና።

13 ኢስቲ ጎዳ ኬን ቶኬቲዳ፤

ኢስቲ ጾሳ ኬ

ዛጎ ጋካናስ ዳያና።

14 ኢስቲ ጬጊዲካ ኣይፋና፤

ኢስቲ ኡባ ዎዴ ጪሊሊዳ ማላኔ

ሚኒዳ ማላ ዳና።

15 ኢስቲ፥ «ጎዳይ ሊኬ፤

ኢዚ ታስ ዎጋ ዛላ፤

ኢዛ ቦላ ዎሶይ ዴና» ጋና።