1 ባቢሎኔ ሻፋታ

ላንቄን ኡቲዲ

ኑኒ ጺዮኔ ቆፒዳ ዎዴ

ዬኪዶስ።

2 ሄን ኑኒ ኑ ዲታ

ሃ ማታን ዲጪዛ

ሚታ ቦላ ካቂዶስ።

3 ኑና ዲኢዳ ኣሳቲ ኑኒ ዬጺዲ

ኢስታ ኡፋይሳና ማላ፥

«ጺዮኔ ዬፌ ኢሳ

ኣኔ ኑስ ዬጺቴ» ጊዳ።

4 ጎዳ ማዛሙሬ ኑኒ ኣላጋ ቢታን

ዎስቲ ዬጾኒ?

5 ዬሩሳላሜ ካታማዬ!

ታኒ ኔና ባሊኮ

ታ ኡሻቻ ኩሼይ

ባ ኦሶ ባሎ።

6 ታኒ ኔና ሃሳኦንታ ኣጊኮ

ታ ኡፋይሳ ኡባፌ ኣዳ

ዬሩሳላሜ ዶሶንታ ኣጊኮ

ታ ኢንጻርሳይ

ጎንጊራራ ኦይኬቶ።

7 ኣቤት ጎዳዉ!

ዬሩሳላሜይ ኩንዲዛ ጋላስ

ኤዶሜ ኣሳቲ

ኦዳይሳ ቆፓ፤

ኢስቲ፥ «ላሊቴ! ላሊቴ!

ዮቻፌ ቃሊ ይሲቴ!»

ጊዳይሳ ባሎፓ።

8 ሃኔ ባቢሎኔ ቢታዬ

ኔ ያና!

ኔኒ ኑ ቦላ ፖሊዳ ኢታ ኦሶ

ኔ ቦላ ዛሪ ኦዛይ

ኣንጄቲዳይሳ።✝

9 ኔ ጉ ናይታ ኦይኪዲ

ዛላ ቦላ ዲንጬሬዛይ

ኣንጄቲዳይሳ።