ዬ ማጻፋ 115

1 ኣቤት ጎዳዉ!

ኑ ጊሻስ ጊዶንታ

ኔ ሲቆ ጊሻሲኔ

ኔ ኣማኔቴ ጊሻስ

ኔ ሱን ቦንቻ።

2 ካዎቴቲ ኣይስ፥

«ኢስታ ጾሲ ኣዋን ዲዜ?» ጊዞ?

3 ኑ ጾሳይ ሳሎን ዴስ፤

ኢዚ ባ ዶሲዳይሳ ኡባ ኦስ።

4 ጊዶ ኣቲን ኢስታ ኤቃ ጾሳቲ

ቢራፔኔ ዎርቃፌ

ኣሳ ኩሼን ኦሴቲዳይታ።

5 ኢስታስ ዶናይ ዴስ ሺን

ሃሳዬቴና፤

ኣይፌይካ ዴስ ሺን ዴሜቴና።

6 ኢስታስ ሃይ ዴስ ሺን ሲዬቴና፤

ሲይካ ዴስ ሺን ሲንጌቴና።

7 ኢስታስ ኩሼይ ዴስ ሺን

ቦቼቴና፤

ቶሆይካ ዴስ ሺን

ሄሜቴቴና፤

ኢስታ ፖራንዴይ

ጬንጉርስ ኬሴና።

8 ኢስታ ሜዛይቲኔ

ኢስታን ኣማኔቲዛይቲ

ኡባይ ኢስታ ማላ ጊዴቶ።✝115፡4-8 ማዛ 135፡15-18፤ ኣጁ 9፡20

9 ኢንቴኖ ኢስራኤሌ ኣሳቶ!

ጎዳን ኣማኔቲቴ!

ኢዚ ኢንቴስ ጎንዳሌኔ

ኢንቴና ማዲዛዴ።

10 ኢንቴኖ ኣሮኔ ዜሬቶ!

ጎዳን ኣማኔቲቴ!

ኢዚ ኢንቴስ ጎንዳሌኔ

ኢንቴና ማዲዛዴ።

11 ኢንቴኖ ጎዳስ ያዪዛይቶ!

ጎዳን ኣማኔቲቴ!

ኢዚ ኢንቴስ ጎንዳሌኔ

ኢንቴና ማዲዛዴ።

12 ጎዳይ ኑስ ቆፔስ፤

ኢዚ ኑና ኣንጃና፤

ኢዚ ኢስራኤሌ ኣሳታኔ

ኣሮኔ ዜሬታካ ኣንጃና።

13 ጎዳስ ያዪዛይታ ኡባ

ጉ ጊዲን ጊታ ኢዚ ኣንጃና።✝115፡13 ኣጁ 11፡18፤ 19፡5

14 ጎዳይ ኢንቴናካ

ኢንቴ ናይታካ ዳሪሶ!

15 ሳሎኔ ሳኣ ሜዳ

ጎዳይ ኢንቴና ኣንጆ!

16 ሳሎቲ ጾሳሳ፤

ጊዶ ኣቲን ሳኣ

ኣሳ ናይታስ ኢሚዴስ።

17 ሃይቂዲ ዱጌ ዱፎን ጌሊዳይቲ

ጎዳ ጋላታናስ

ዳንዳዬቴና።

18 ጊዶ ኣቲን ኑኒ

ሼምፖራ ፓጻ ዲዛይቲ

ሃቺፌ ዶሚዲ

ሜርና ጋካናስ

ጎዳ ጋላታና።

ጎዳይ ጋላቴቶ!