ዬ ማጻፋ 63

ዩሁዳ ባዞን ዲዛ ዎዴ ዳዊቴ ማዛሙሬ

1 ኣቤት ጾሳዉ!

ኔኒ ታ ጾሳ፤

ታ ኔና ዎዚናፔ ኮያይስ፤

ታ ኣሾይካ ኔና ኣሞቴስ።

ሃ ባይንዳ ሜላ ቢታይ

ሃ ኮይዛ ማላ ታ ኣሳቴይ

ኔና ሳሜቴስ።

2 ታኒ ኔና ጌሻሶሆን ጼላዲስ፤

ኔ ዎልቃኔ ኔ ቦንቾ

ታኒ ቤኣዲስ።

3 ኔ ሜርና ሲቆይ ዴኦፔ ሎኤስ፤

ታ ኢንጻርሳይ ኔና ጋላቴስ።

4 ታ ዴኦ ላይንካ

ታኒ ኔና ጋላታና፤

ኔ ሱንን ታ ኩሼ

ፑዴ ኔኮ ዴንና።

5 ኣሲ ሎኦ ካ ሚ ካሊዲ

ኡፋዬቲዛ ማላ

ታ ሼምፖያ ኔናን ኡፋዬታና፤

ታኒ ታ ኢንጻርሳን ኡፋይሳ ዬን

ኔና ጋላታና።

6 ታኒ ታ ሂጻን ዳሼ

ኔና ሃሳኣይስ፤

ኦማርስ ኩሜ

ኔ ኦሶ ዩሻ ቆፓይስ፤

7 ኔኒ ታና ማዲዛ ጊሻስ

ታኒ ኔ ቄፌ ኩዋን ኡታዳ

ኡፋይሳን ዬጻይስ።

8 ታ ሼምፖያ ሺጵ ጋ ካላዱስ፤

ኔ ኡሻቻ ኩሼይካ

ታና ሚን ኦይኪዴስ።

9 ጊዶ ኣቲን ታና ዎና ኮይዛይቲ

ቢታ ጋርሳን ጪማ ኦላን

ሞጌታና።

10 ኢስቲ ማሻስ ኣ ኢሜታና፤

ኢስቲ ጎዳሬ ካዎ ጊዳና።

11 ጊዶ ኣቲን ካዎይ

ጾሳን ኡፋዬታና፤

ጾሳ ሱንን ጫቂዛ ኡባይ

ኢዛ ጋላታና፤

ዎርዶ ሃሳይዛይታ

ዶናይ ጊዲኮ ጎርዴታና።✝63፡1-11 1ሳሜ 23፡14