1 ኣቤት ጾሳዉ!

ኔኒ ኑና ሜርናስ

ኣይስ ዬጋ ኣጋዲ?

ሄንሶሆን ዲዛ

ዶርሳታ ቦላ

ኔ ሃንቆይ ኣይስ ሱሊዴ?

2 ቤኒ ኔኒ ዶሪዳ ኔ ዴራ

ኔስ ቡዞ ሂስታ

ዎዚዳ ዛሬታ ሃሳኣ፤

ኔኒ ዴኢዳ ጺዮኔ ዙማ ቆፓ።

3 ኣኔ ላሌቲዳ ጾሳ ኬዛ

ዩያ ጼላ፤

ሞርኬቲ ኢዛን ዲዛ

ኡባ ሚሽ ይሲዳ።

4 ኔ ሞርኬቲ ኔ ሶን፥

«ኑኒ ጾኒዶስ» ጊዲ ጌሬሬቴስ።

ጾኖ ማላታ ጊዲ

ባንታ ባንዲራ ኤሲዳ።

5 ኢስቲ ዎራ ጊዶን ሚ ቃንጻናዉ

ባንታ ካልታ ቁ ሂስቲ

ኦይኪዳ ኣስ ሚሳቲዳ።

6 ሂላንቻቲ ኦዳ ኣሌቆታ

ካልታኒኔ ማዶሻን

ሜንሬ ዬጊዳ።

7 ጾሳ ኬ

ታማን ጹጊዲ ይሲዳ፤

ኔ ጼይጌቲዛሶዛ ቱኒሲዳ።

8 ኢስቲ ባንታ ዎዚናን፥

«ኢስታ ኑኒ ሙሌራ ኡንኤና»

ጊዲ ቆፒዳ፤

ዴራን ጾሲ ጎይኔቲዛሶሆታ

ኡባ ታማን ጹጊዳ።

9 ኑ ሻኪ ኤራናስ

ማላታይ ዴና፤

ሃይሳፌ ጉዬ ናቤይ ዴንዴና፤

ሃይሲ ኣዉዴ ጋካናዉ

ሃናናኮ ኤሪዛ ኣሲ

ኑ ጊዶን ዴና።

10 ኣቤት ጾሳዉ! ኔ ሞርኬቲ

ኣዉዴ ጋካናዉ

ኔ ቦላ ቂልጫኔ?

ኢስቲ ኔ ሱን

ሜርናስ ካሼ ዳኔ?

11 ኔ ኩሼዛ ሚጫዳ

ኣይስ ኢስታ ይሲኪ?

ኔ ኡሻቻ ኩሼዛ

ኣይስ ሾጳ ጋርሳን

ሎኮማ ኡታዲ?

12 ኣቤት ጾሳዉ!

ቤኒፔካ ታ ካዎይ ኔና፤

ኔኒ ቢታ ቦላ ኣቶቴ ኤሃዳሳ።

13 ኔ ጊታ ዎልቃን ኣባ ሻካዳሳ፤

ኢዛ ጊዶን ዲዛ

ሚሚንቴታ ሁኤ ቆኤሬዳሳ።✝

14 ሌዋታኔ* ጌቴቲዛ

ሚሚንቴ ሁኤታ ዲንጫዳሳ፤

ኢዛ ኣሾ

ባዞን ዲዛ ሜታታስ

ቁማ ኦ ኢማሳ*።

15 ኔኒ ፑልቶታኔ

ካንቼታ ዶያ ዬዳዳሳ፤

ኡባ ዎዴ ጎጊዛ ሻፋታ

ቃሴ ሜሊሳዳሳ።

16 ጋላሳይ ኔሳ፤

ቃማይካ ኔሳ፤

ቃሴ ኣርሼኔ ኣጊና

ኢስቲ ዲዛሶን

ሚን ዎዳይ ኔና።

17 ቢታስ ዛዋ ዎዳይ፥

ባልጎኔ ቦኔ ሜዳይ ኔና።

18 ኣቤት ጎዳዉ!

ኔ ሞርኬቲ ኔ ቦላ

ዎስቲ ቂልጪዳኮ፥

ቃሴ ኤያ ኣሳቲ

ኔ ሱን

ዎስቲ ካዳኮ ቆፓ።

19 ኔስ ሃሬቲዛይታ ሼምፖ

ዎራ ዶኣታስ ኣ ኢሞፋ፤

ሜቶቲዳ ኔ ዴራ

ሜርናስ ዶጎፓ።

20 ቢታን ዲዛ ማ ሶሆቲ

ኡባይ ማካላንቻታን

ኩሚዳ ጊሻስ

ኔኒ ኑስ ጫቂዳ

ጫቆ ቃላ ቆፓ።

21 ናቄቲዳይቲ ዬላቲ ሲሞፌቶ፤

ማንቆቲኔ ሜቶቲዳይቲ

ኔ ሱን ጋላቴቶ።

22 ኣቤት ጾሳዉ! ዴንዳ!

ኔኒ ኔ ሱንስ ሞቴታ፤

ኤያቲ ጋላስ ኡባን

ኔና ካዛይሳ ቆፓ።

23 ኔ ሞርኬቲ

ኔ ቦላ ዋሲዛ ዋሶዛ፥

ኔና ኢጺዛይቲ

ኔ ቦላ ጬቄቲዛ ጬቄቴኔ

ኢስታ ዎጫማ ዶጎፓ።