ዳዊቲ ዛማሬታ ካቦስ ዬጺዳ ማዛሙሬ
1 ኤያቲ ባንታ ዎዚናን፥
«ጾሲ ባዋ» ጌቴስ፤
ኢስታ ዴኦይ ሞሬቲዴስ፤
ኢስቲ ሃራሲዛ ሚሽ ኦቴስ፤
ኢስታ ጊዶን ሎኦ ኦዛ
ኢሲ ኣሲካ ዴና።
2 ጾሳ ኮይዛይኔ ኣኬኪዛይ
ዴኢዛኮ ቤኣናስ፥
ጎዳይ ሳሎፔ ዱጌ
ኣሳ ጼሌስ።
3 ጊዶ ኣቲን ኡባይካ
ኦጌፔ ካሬ ኬኢዳ፤
ኡባይካ ሙሌራ ጎኦንታዝ ጊዲዳ፤
ሎኦ ኦዛይ ኦኒኔ ዴና፤
ሃራይ ኣቶ ኢሳዴይካ ዴና።14፡1-3 ኦሮ 3፡10-12
4 ጎዳይ፥ «ታ ኣሳ ቦንቂ
ሚዛ ኢታ ኣሳቲ
ኣይኮካ ኤሬቴኔ?» ጌስ።
5 ጊዶ ኣቲን ጾሲ ጺሎ ኣሳታራ
ዴኢዛ ጊሻስ
ኢታ ኣሳቲ ሄሳን ዳጋማና።
6 ኢንቴ ሂዬሳታ ሃልቾ ላሌታ፤
ጊዶ ኣቲን ጎዳይ
ሂዬሳቲ ባቃቲ ኣቲዛሶ ጊዴስ።
7 ኢስራኤሌስ ኣቶቴ
ጺዮኔፔ ዪዳኮ!
ጎዳይ ኢስታ ዱሳ ዛሪዛ ዎዴ
ያቆቤ ዜሬቲ ኡፋዬታና፤
ኢስራኤሌ ኣሳይ
ኡፋይሳን ጋላታና።