1 ኡባፌ ቃ ጎዳን

ዜምፒ ዴኢዛይ፥

ኡባ ዳንዳይዛ

ጾሳ ኩዋን ኣቄስ።

2 ታኒ ጎዳ፥

«ኔኒ ታስ ዜምፖ፥

ሚጻኔ ታኒ ኔናን

ኣማኔቲዛ

ታ ጾሳ» ጋና።

3 ኢዚ ኔና ሻንካንቻታ ጊቴፔ፥

ዎዛ ኢታ ሃርጌፌካ

ኣሻና።

4 ኢዚ ባ ዋንጎታን

ኔና ካማና፤

ኢዛ ቄፌታ ጋርሳን

ኔኒ ቆቴታ ኣታና፤

ኢዛ ኣማኔቴይ

ኔስ ጎንዳሌኔ

ዜምፖ ጊዳና።

5 ኔኒ ኦማርሳን

ዳጋንዛ ሚሻስ፥

ዎይኮ ጋላስ ጾንጌቲዛ

ዪሻስ፥

6 ማን ኦይኪዛ ሃርጌስ፥

ዎይኮ ሴታ ጋላሳን

ዉርሲዛ ኢታ ሃርጌስ ያያካ።

7 ኢሲ ሺ ኔ ሚሌሶራ፥

ቃሴ ታሙ ሺ ኔፔ

ኡሻቻ ባጋራ ኩንዳና፤

ጊዶ ኣቲን ኔና ኣይኮይካ

ቦቼና።

8 ኔኒ ኔ ኣይፌን

ጼሎ ጻላ ጼላና፤

ኢታቲካ ቃጻዬቲሺን ቤኣና።

9 ጎዳ ኔኒ ኔስ ባቃታ ኣቲዛሶ፥

ኡባፌ ቃ ጾሳ ኔስ

ዜምፖ ሂስቲዳ ጊሻስ፥

10 ኢታ ሚሺ ኔና ቦቼና፤

ቦሻይካ ኔ ኬ ሺቄና።

11 ኔ ቢዛ ኦጌ ኡባን

ኔና ናጋና ማላ

ጾሲ ባ ኪታንቻታ ኣዛዛና።✝

12 ኔ ቶሆይ ሹቻን

ጴቶንታ ማላ

ኪታንቻቲ ባ ኩሼን

ኔና ዴንና።✝

13 ኔኒ ጋሞኔ

ሃሶ ሾሻ ቦላ ሄሜታና፤

ቃሴካ ዎዳላ ጋሞኔ

ኢታ ሾሻ ዬና።✝

14 ጎዳይ፥ «ኢዚ ታና ሲቂዳ ጊሻስ

ታኒ ኢዛ ኣሻና፤

ኢዚ ታ ሱን ኤሪዳ ጊሻስ

ታኒ ኢዛ ናጋና።

15 ኢዚ ታና ጼይጊዛ ዎዴ

ታኒ ኢዛስ ኮያና፤

ኢዚ ሜቶቲዳ ዎዴ

ታኒ ኢዛራ ኢሲፌ ጊዳና፤

ታኒ ኢዛ ኣሻናኔ

ቦንቻና።

16 ታኒ ኢዛ ላይ ኣዱሳና፤

ታ ኣሺዛዴ ጊዲዳይሳ

ታ ኢዛ ቤሳና» ጌስ።