1 ኣቤት ጎዳዉ!

ታ ኔና ዎዚናፔ ዎሳይስ።

2 ኣቤት ታ ጾሳዉ!

ታኒ ኔናን ኣማኔታይስ፤

ታና ዬላሶፓ፤

ታ ሞርኬቲካ

ታ ቦላ ጬቄቶፌቶ።

3 ኔና ሂዶታ ኦዛይቲ

ዬላቴቴና፤

ጊዶ ኣቲን ጌኔ ኦዛይቲ

ዬላታና።

4 ኣቤት ጎዳዉ!

ታና ኔ ኦጌ ቤሳ፤

ኔ ጌዶ ካሎ ታና ታማርሳ።

5 ኔኒ ታና ኣሺዛ ጾሳ፤

ኔ ቱማቴን

ታና ካሌኔ ታማርሳ፤

ኡባ ዎዴ ታ ሂዶታይ ኔና።

6 ኣቤት ጎዳዉ!

ቤኒሶፌ ዲዛ ኔ ቃቴኔ

ኔ ኪያቴ ሃሳኣ።

7 ታ ዬላጋቴ ናጋራኔ

ሞሮ ሃሳኦፓ፤

ኣቤት ጎዳዉ!

ኔ ጊታ ኪያቴ ማላኔ

ኔ ሎኤቴ ኬና ታና ቆፓ፤

8 ጎዳይ ኪያኔ ሱሬ፤

ሄሳ ጊሻስ ናጋራንቻታ

ባ ኦጌ ታማርሴስ።

9 ኣሽኬታ ሱሬ ኦጌራ ካሌስ፤

ኢስታካ ባ ኦጌ ታማርሴስ።

10 ጎዳ ጫቆ ቃላኔ

ማራ ናጊዛይታስ

ኢዛ ኦጌይ ኡባይ ኪያኔ ቱማ።

11 ኣቤት ጎዳዉ!

ታ ናጋራይ ኬሂ ዳሮ፤

ጊዲኮካ ኔ ሱን ጊሻስ

ኣቶ ጋ።

12 ጎዳስ ያዪዛ ኣሲ ኦኔ?

ኔ ዶራዳ ባና ኦጌዛ

ኢዚ ኔና ታማርሳና።

13 ኢዚ ኡባ ዎዴካ ሎኦ ዱስ ዳና፤

ኢዛ ዜሬቲ ቢታ ላታና።

14 ጎዳይ ባና ያዪዛይታፔ

ባ ጹራ ቆቴና፤

ኢዚ ኢስታስ

ባ ጌሊዳ ጫቆ

ቃላካ ኤሪሴስ።

15 ጎዳይ ታ ቶሆ

ናርጻፌ ኬሲ ኤኪዛ ጊሻስ፥

ታ ኣይፌይ ማዶ ዴማናስ

ኡባ ዎዴ ኢዛኮ ጼሌስ።

16 ጎዳዉ! ታኒ ቢዛ ዲዛዴኔ

ቆሄቲዳ ኣስ ጊዲዳ ጊሻስ፥

ኔ ሃ ታኮ ሲማ፤

ኔ ማሮቴካ ቤሳ።

17 ታስ ሜቶይ ዳሪዴስ፤

ታ ሜቶዛፔ ታና ኔኒ ኬሳ።

18 ታ ሜቶዛኔ

ታ ቱጋ ኔኒ ቤኣ፤

ታ ናጋራ ኡባ ኣቶ ጋ።

19 ታ ሞርኬቲ ኣይ ኬና ዳሪዳኮ

ኔ ቤኣ፤

ኢስቲ ታና ኣይ ማላ ኢጺዛኮ

ኔ ጼላ።

20 ኔኒ ታና ናጋኔ ኣሻ፤

ታ ኔናን ዜምፓዲስ፤

ኔ ታና ዬላሶፓ።

21 ኔ ታስ ሂዶታ ጊዲዳ ጊሻስ

ሱሬቴይኔ ቱማቴይ

ታና ናጎ።

22 ኣቤት ጾሳዉ!

ኢስራኤሌ ኣሳ

ሜቶ ኡባፌ ኔኒ ዎዛ።