1 ኣቤት ጎዳዉ!

ኔ ኣይስ ሃካዳ ኤቃይ?

ሜቶ ዎዴንካ ኣይስ ጌማይ?

2 ኢታ ኣሳቲ ኦቶሬቴቴስ፤

ሂዬሳታካ ዬዴቴስ፤

ኢስቲ ሃራስ ዎዳ ዎጺማዴን

ዛሪ ኦይኬቴቶ።

3 ኢታ ኣሲ ባ ዎዚና

ኣሞን ጬቄቴስ፤

ዮራይ ጎዳ ጫዬሲኔ

ካዴስ።

4 ኢታ ኣሲ ኦቶሬቴን

ጾሳ ኮዬና፤

ኢዛ ቆፋ ኡባን ጾሲ ዴና።

5 ኡባ ሚሺ ኢዛስ ኩሜስ፤

ኔ ዎጋይ ኢዛስ ጌሌና፤

ኦቶራንቻይ

ኔ ዎጋፔ ሃኬስ፤

ሄሳ ጊሻስ

ባ ሞርኬታ ቦላን

ኢዚ ቂልጬስ።

6 ባ ዎዚናን ኢዚ፥

«ታና ኣይኮይካ ቃና፤

ታና ሙሌካ ሜቶይ ጋኬና»

ጊዲ ቆፔስ።

7 ኢዛ ዶናን ቃንጌ፥

ዎርዶይኔ ማንዴይ ኩሚዴስ፤

ኢዛ ኢንጻርሳን ጌኔይኔ

ባሌይ ዴስ።✝

8 ዴሬ ጊዶን ጌማሶን ዙጊ ኡቴስ፤

ማዶይ ባይንዳይታ

ይሳናስ ናጌቴስ፤

ጺሎ ኣሳታ ጌማን ዎስ።

9 ባ ቆቴቲዛሶን ጌሚዲ፥

ሂዬሳ ኦይካናዉ

ጋሞ ማላ ዙጌስ፤

ማዶይ ባይንዳይታ ባ ዎጺማዴን

ኦይኪዲ ጎቺ ኤፌስ።

10 ማዶይ ባይንዳይኔ

ሂዬሳይ ኢዛ ኩሼን ኩንዴስ፤

ኢዚካ ኢስታ

ኒፒ ሂስቲ ሜንሬስ።

11 ኢታ ኣሲ ባ ዎዚናን፥

«ጾሲ ታና ዶጊዴስ፤

ባ ሲን ታፔ ጌንዴስ፤

ሙሌካ ኢዚ ታና ቤኤና» ጌስ።

12 ኣቤት ጎዳዉ! ዴንዳ።

ጾሶ! ኔ ኩሼዛ

ቁ ሂስታ ዴን፤

ማዶይ ባይንዳ

ሜቶታንቻታ ዶጎፓ።

13 ኢታ ኣሲ ጾሳ ኣይስ ካዜ?

ባ ዎዚናንካ፥

«ጾሲ ታና ቃጻዬና»

ኣይስ ጊዜ?

14 ጊዶ ኣቲን ጾሶ!

ኔኒ ሜቶዛኔ

ዋዬዛካ ቤያሳ፤

ኔኒ ኡባ ዎዴ

ማዳናስ ጊጋ ኡታዳሳ፤

ኔኒ ዪኦታ ማዳሳ፤

ማዶይ ባይንዳይቲካ

ባና ኔስ ሼቴስ።

15 ጌኔ ኣሳታ ዎልቃ ሜን፤

ኢታ ኣሳታ ዎልቃካ ሊቂሳ፤

ኢስቲ ናምኣን

ኢታ ኦንታ ማላ

ኢስታ ኦሶ ማላ ኢስታ ቃጻያ።

16 ጎዳይ ሜሪፔ ሜርናስ

ካዎቲዲ ዴስ፤

ሃራ ካዎቴቲ

ኢዛ ቢታፌ ያና።

17 ኣቤት ጎዳዉ!

ኔኒ ሂዬሳታ ኣሞ ኤራሳ፤

ኢስታ ዎሳካ ሲያዳ

ሚንሳ።

18 ኦኒካ ኢስታ ያሺሶንታ ማላ

ማዶይ ባይንዳይታሲኔ

ዪኦታስ ኔ ፒርዳ።