ዬ ማጻፋ 140

ዳዊቲ ዛማሬታ ካቦስ ዬጺዳ ማዛሙሬ

1 ኣቤት ጎዳዉ!

ኢታ ኣሳታፔ ታና ኣሻ፤

ማካላንቻታፔካ

ታና ናጋ።

2 ኢስቲ ኡባ ዎዴ

ኢታ ኦናስ ማቄቴቴስ፤

ኡባ ጋላሲካ

ኦሽ ዴንናስ

ዮኦ ፒቄቴስ።

3 ኢስቲ ሃሶ ሾሻ ማላ

ኢንጻርስ ቃራሴቴስ፤

ኢስታ ዶናፔ ጎፔ ማርዜ ማላ

ቃላይ ኬዜስ።✝140፡3 ኦሮ 3፡13

4 ኣቤት ጎዳዉ!

ኢታ ኣሳታ ኩሼፔ ታና ኣሻ፤

ታ ቶሆ ቃጻናስ ቆፒዛ

ማካላንቻታፔካ

ታና ናጋ።

5 ኦቶራንቻቲ ታስ

ዎጺማዴ ዎዳ፤

ጊቴ ጊግሲዳ፤

ታ ኦጌንካ ዲዛ ዎዳ።

6 ታኒ ጎዳ፥

«ኔኒ ታ ጾሳ» ጋይስ።

ኣቤት ጎዳዉ!

ታኒ ሾቢዛይሳ ሲያ።

7 ኣቤት ኡባፌ ዎልቃማ ጎዳዉ!

ታና ኣሺዛ ሚኖዞ!

ኦላ ጋላስ ታስ ጎንዳሌ ጊዳዳሳ!

8 ኣቤት ጎዳዉ!

ኢታታ ኣሞይ ፖሌቶፎ፤

ኢስታ ቆፋይ

ፖሌታና ማላ ኦፋ!

9 ታ ሞርኬታን ታና ጾኒሶፓ፤

ኢስቲ ቆፒዳ ኢታ ቆፋይ

ኢስታ ሁኤን ጻጼቶ።

10 ኢስታ ቦላ ታማ ቦንቆይ ቆሌቶ፤

ኢስቲ ታማን ኦሌቴቶ፤

ሲሚ ኬዛናስ ዳንዳዮንታ

ኦላን ኩንዴቶ።

11 ኢታ ሃሳይዛይታ ቢታይ ቶኮፎ፤

ማካላንቻታ

ኢታ ሚሺ ኦይኮ።

12 ጎዳይ ሂዬሳታስ ፒርዲዛይሳኔ

ሜቶታንቻታስ

ሞቴቲዛይሳ ታ ኤራይስ።

13 ጺሎቲ ቱሙፔ

ኔ ሱን ጋላታና፤

ሱሬቲካ ኔ ሲንን ዴኣና።