1 ኣቤት ጎዳዉ!

ኔ ሃንቆን ታና ሴሮፓ፤

ኔ ዪሎን ታና ሙሮፓ።

2 ኔ ዎንዳፌ ዪሺ ታና ጫዲዴስ፤

ኔ ኩሼይካ

ታና ናቂ ኦይኪዴስ።

3 ኔ ሃንቆፌ ዴንዲዳይሳን

ታ ቦላይ ፓዬና፤

ታ ናጋራ ጋሶን

ታ ኣሳቴይ ፓፓቲዴስ።

4 ታ ቆሆይ ታና ሚቲዴስ፤

ዴጾ ቶሆ ማላ

ታና ናቂ ኦይኪዴስ።

5 ታኒ ኤያቴን ኦዳ

ናጋራ ጋሶን

ታ ማዱንይ ጺንቂዴስ።

6 ታኒ ሆካዲሲኔ ቁናዲስ።

ጋላስ ኩሜ

ዬካሼ ፔኣዲስ።

7 ታ ኣሾይ ታማ ሚሻ ማላ

ጹጌስ፤

ታ ቦላይካ ፓዬና።

8 ታኒ ኢጼታዲሲኔ ኒፊፊ ጋዲስ፤

ታ ዎዚናይ

ጬጪዳ ጊሻስ ዋሳይስ።

9 ኣቤት ጎዳዉ!

ታ ኣሞ ኡባ ኔ ኤራሳ፤

ታኒ ጬጪዛይሲ

ኔፔ ጌሚቤና።

10 ታስ ዎዚና ኣይፌን ጉፔስ፤

ታ ዎልቃይ ጪንጊዴስ፤

ታ ኣይፌፔ ፖኦይ ኪቺዴስ።

11 ታ ማዱን ጋሶን

ታ ሾሮቲኔ ታ ላጌቲካ

ታፔ ባቃቲዳ፤

ታ ዳቦቲካ ታፔ ሃኪዳ።

12 ታና ዎናዉ ኮይዛይቲ

ባንታ ናርጻ ታና ኦይካና ዎዳ፤

ታና ቆሃናዉ ኮይዛይቲ፥

«ናጋሻ፤ ኑኒ ኔና

ዴማና» ጊዲ

ታ ቦላ ማንዲዳ፤

ጋላስ ኩሜ ታ ቦላ

ጌኔን ዱላቲዳ።

13 ሄ ዎዴ ታኒ ሲዮንታ

ቱሌ ኣሳ ማላ ጊዳዲስ፤

ዶናካ ፖጎንታ

ዱዴ ኣሳ ማላ ጊዳዲስ።

14 ቱማፔ ታኒ ሃይ ሲዮንታ

ኣሳ ማላኔ

ዶናይ ሃሳዮንታ

ኣሳ ማላ ጊዳዲስ።

15 ጊዶ ኣቲን ኣቤት ጎዳዉ!

ታኒ ኔናን ሂዶታ ኦይስ፤

ኣቤት ታ ጎዳዉ!

ኔኒ ታስ ዛሮ ኢማ።

16 ታኒ ጎዳ፥

«ታ ቶሆይ ሃንዳራሺን፥

ታ ሞርኬቲ፥ ‹ኢዛስ ሃሹ›

ጋና ማላኔ

ታ ቦላ ጬቄታና ማላ

ኦፋ» ጋዳ ዎሳይስ።

17 ታኒ ኩንዳና ማታዲስ፤

ታ ሳኮይካ ፓጾንታ ኢጺዴስ።

18 ታ ናጋራይ ታና ሜቲዴስ፤

ሄሳ ጊሻስ ታ ቆሆ

ታ ኔስ ፓጻይስ።

19 ታ ሞርኬቲ ጊታኔ ዎልቃማ፤

ታና ጮ ኢጺዛይቲ ጮራ።

20 ታኒ ሎኦ ኦሶ ኦን

ታስ ኢታ ዛሪዛይቲ

ታኒ ሎኦ ካሊዛ ጊሻስ

ታናራ ኤቄቴቴስ።

21 ኣቤት ጎዳዉ!

ኔ ታና ዬጎፋ፤

ኣቤት ጾሳዉ

ታፔ ኔኒ ሃኮፋ።

22 ኣቤት ታና ኣሺዛ ጎዳዉ!

ታና ማዳናስ ኤሶታ።