ዬ ማጻፋ 2

1 ካዎቴቲ ኣይስ ዴንዲዞ?

ቃሴ ካዎቴይ

ኣይስ ኢታ ኦናስ ማቄቲዜ?

2 ሳኣ ካዎቲኔ ዳናቲ ዴንዲዳ፤

ኢስቲ ጎዳ ቦላኔ

ጎዳይ ቲይዳይሳ ቦላ

ዴንዳናስ ኢሲፌ ዱላቲዳ።✝2፡1-2 ሃዋ 4፡25-26

3 ኢስቲ፥ «ኣኔ ኑኒ

ኢስታ ሳንሳላታ ዱስ፤

ኢስቲ ኑና ቃቺዛይሳካ

ኬሲ ዎራ ኦሎስ» ጌቴስ።

4 ሳሎን ባ ኣራታ ቦላ ኡቲዳይሲ

ኢስታ ቦላ ሚጬስ፤

ጎዳይ ኢስታ ቂስ።

5 ጎዳይ ባ ሃንቆን ኢስታ ሴሬስ፤

ባ ዎልቃማ ሃንቆን

ኢስታ ዳጋንስ።

6 ጎዳይ፥ «ታኒ ታ ጌሻ ዙማ

ጺዮኔ ቦላ ታ ካዎዛ

ካዎዲስ» ጌስ።

7 ሄ ካዎይ፥ «ታኒ ጎዳ

ዎጋ ኣዋጃና፤

ጎዳይ ታና፥ ‹ኔኒ ታ ና፤

ታኒ ኔና ሃች ዬላዲስ።✝2፡7 ሃዋ 13፡33፤ ኢብ 1፡5፤ 5፡5

8 ኔኒ ታና ኦይቻ፤

ታኒ ካዎቴ ኡባ

ኔስ ኢማና፤

ሳኣ ኡባይ ኔስ ጊዳና።

9 ኔኒ ቢራታ ጉፌን

ኢስታ ቆጼሬና፤

ኢስታ ኔኒ ማና ሚሺ

ሜቂዛ ማላ

ሜንሬና› ጌስ» ጊዴስ።✝2፡9 ኣጁ 2፡26-27፤ 12፡5፤ 19፡15

10 ሄሳ ጊሻስ ኢንቴኖ

ካዎቶ ኣኬኪቴ፤

ሃ ሳኣ ሃሪዛይቶ

ኢንቴ ናጌቲቴ!

11 ጎዳስ ያሻቴን ኦቴ፤

ኢዛስ ኮኮርሳን ሃሬቲቴ።

12 ጎዳይ ሃንቄቲን

ኦጌን ኢንቴ ዮንታ ማላ

ኢዛስ ሱሬ ዎዚናን ጎይኒቴ፤

ኣይስ ጊኮ ኢዛ ሃንቆይ

ኤሶን ኤጺ ኬዛና።

ኢዛ ባንታስ ዜምፖ

ኦዛይቲ ኣንጄቲዳይታ።