ዬ ማጻፋ 108

ዳዊቲ ዬጺዳ ማዛሙሬ

1 ኣቤት ጾሳዉ!

ታ ዎዚናይ ሚኖ፤

ታኒ ኔስ ኩሜ

ዎዚናፔ ዬጻናኔ

ኔና ሳባና።

2 ታ ዲኔ ማሲንቆይ ዴንዲቴ!

ታኒካ ማላዶ

ዎንታራ ዴንዳና።

3 ኣቤት ጎዳዉ!

ታኒ ዴራ ጊዶን ኔና ጋላታና፤

ቃሴ ካዎቴታ ጊዶን

ኔስ ሳባን ዬጻና።

4 ኔ ሲቆይ ጊታ፤

ሳሎታፔካ ኣስ።

ኔ ኣማኔቴይካ

ፑዴ ሳሎ ጋኬስ።

5 ኣቤት ጾሳዉ!

ሳሎታፔ ቦላራ

ቁ ቁ ጋ!

ኔ ቦንቾይ ቢታ ኡባ ጋኮ።

6 ኔኒ ሲቂዛይቲ ኣታና ማላ

ኔ ኡሻቻ ቄሴን ኑና ኣሻ፤

ታ ዎሳ ሲያ።

7 ጾሲ ባ ጌሻሶሆን ዲሼ፥

«ታኒ ጾናዳ

ሴኬሜ ቢታ ሻካና፤

ቃሴ ሱኮቴ ዙላ ጊሻና።

8 ጋላኣዴይ ታይሳ፤

ሚናሴይካ ታይሳ፤

ኤፍሬሜይ ታ ሁኤን

ዎዛ ቢራታ ቆቤ፤

ዩሁዳይ ታ ካዎቴ ጉፌ።

9 ሞኣቤይ ታስ ሜቻሶ፤

ኤዶሜይ ታይሳ

ጊዲዳይሳ ኤሪሳናስ

ታኒ ታ ጫማ

ኢዛ ቦላ ዎይስ፤

ታኒ ፊሊስጼሜ ጾናዳ

ጌሬራይስ» ጊዴስ።

10 ጊምቤቲዳ ካታማኮ

ታና ኦኔ ኤፋናይ?

ኤዶሜ ጋካናስ

ታና ኦኔ ካሌናይ?

11 ኣቤት ጾሳዉ!

ኑና ኣጊዳይ ኔና ጊዲኪ?

ኔኒ ኑ ኦላንቻታራ

ኬዚኬ ጋዳሳ።

12 ኣሳ ማዶይ ሃዳ፤

ሄሳ ጊሻስ ኑ ሞርኬታ ቦላ

ኑስ ጾኖ ኢማ።

13 ጾሲ ኑናራ ጊዲኮ

ኑኒ ሞርኬታ ጾናና፤

ኢዚ ኑ ሞርኬታ

ባ ቶሆን ዬና።