ዮሴፌ ቆሞታ ጋኪዳ ቢታ
1 ዮሴፌ ዛሬታ ጋኪዳ ቢታይ ኢያርኮ ማታን ዮርዳኖሴ ሻፋፔ ዶሚዲ ኢያርኮ ፑልቶታፔ ኣርሼይ ሞኪዛ ባጋራ ባዞ ካንዲ ጌዜቲዛ ቢታራ ኣዲ ቤቴሌ ጋኬስ። 2 ሎዛ ጌቴቲዛ ቤቴሌፔ ዴንዲዲ ኣጻሮቴ ጌቴቲዛ ኣርኬታ ቢታ ጋኬስ። 3 ሄሳፌ ኣርሼይ ዉሊዛ ባጋራ ዲዛ ያፋሌጼታ ቢታ ዱጉን ዱጌ ቤቲ-ሆሮኔ ዎዲ ጌዜሬራ ካን ቢዲ ጊታ ኣባን ጌሌስ።
4 ዮሴፌ ቆሞ ሚናሴ ዛሬቲኔ ኤፍሬሜ ዛሬቲ ባንታና ጋኪዛ ቢታ ላቲዳ።
5 ኤፍሬሜ ዛሬታ ኢስታ ዛርኬን ዛርኬን ጋኪዳ ቢታይ ሃይሳፌ ካሊዛይሳ፤ ኢስታ ዛዋይ ኣርሼይ ሞኪዛ ባጋራ ዲዛ ኣጻሮቴ-ኣዳሬፔ ቢዲ ጋና ቤቲ-ሆሮኔ ጋኬስ። 6 ሄፔ ቢዲ ዎጋ ኣባን ጌሌስ። ቃሴ ፑዴሃ ባጋራ ዲዛ ዛዋይ ሚኪማታቴፔ ኣርሼይ ሞኪዛሶ ባጋ ታናቴ-ሺሎራ ሚርቄቲ ሲሚዲ፥ ኣርሼይ ሞኪዛሶ ባጋራ ዲዛ ያኖኬ ጋኬስ። 7 ያኖኬፔ ዱጌ ኣጻሮቴኔ ናራቴ ዱጉን ዎዲ ኢያርኮራ ካን ቢዲ ዮርዳኖሴ ሻፋን ጌሌስ። 8 ዛዋዚ ታጱሄፔ ኣርሼይ ዉሊዛ ባጋራ ቢዲ ቃና ሻፋራ ዎ ቢዲ ሜዲቴራኔ ኣባን ጌሌስ። ኤፍሬሜ ዛሬቲ ባ ዛርኬን ዛርኬን ላቲዳ ቢታይ ሃይሳ። 9 ሄሲ ሚናሴ ዛሬታ ቢታፌ ኤፍሬሜ ዛሬታስ ኢሚዳ ካታማታኔ ኢስታ ጉታታ ኡባ ጋ ኦይኪዴስ። 10 ሃይሲ ኡባይ ሃኒንካ ኤፍሬሜ ዛሬቲ ጌዜሬ ካታማን ዲዛ ካናኔ ኣሳታ ኬሲ ጎዲቤቴና። ካናኔ ኣሳቲ ሃች ጋካናስ ኤፍሬሜ ዛሬታራ ኢሲፌ ዴቴስ። ጊዶ ኣቲን ኤፍሬሜ ዛሬቲ ኢስታ ዎልቃራ ኦሲሴቴስ።16፡10 ዳና 1፡29