1 ካዎቴይ ዉሪ ዮርዳኖሴ ሻፋ ፒኒዳፔ ጉዬ ጎዳይ ኢያሶ፥ 2 «ኢስራኤሌ ኣሳፔ 12 ኣሳታ ዶራ፤ ኢሲ ኢሲ ቆሞፌ ኢሲ ኢሲ ኣስ ጊዶ። 3 ሂስታዳ ኢስታስ፥ ‹ዮርዳኖሴ ሻፋ ጊዶን ቄሴታ ቶሆይ ኤቂዳሶፔ 12 ሹቻታ ኤኪቴ፤ ሄ ሹቻታ ቶኪ ኤፊዲ ሃች ኢንቴ ኣቂዛሶን ዎቴ› ጋዳ ዮታ» ጊዴስ።

4 ሄሳ ጊሻስ ኢያሶይ ኢስራኤሌ ቆሞታፔ ኢሲ ኢሲ ኣስ ኤኪዲ ታማኔ ናምኡ ዶሬቲዳይታ ጼይጊዴስ። 5 ሂስቲዲ ኢስታስ፥ «ጎዳ ኢንቴ ጾሳ ጫቆ ቃላ ታቦታይ ዲዛሶሆ ዮርዳኖሴ ሻፋ ጌሊቴ፤ ኢስራኤሌ ቆሞታ ቆዳን ዉሪካ ኢሲ ኢሲ ሹች ኢንቴ ሃሼን ሃሼን ቶኪቴ። 6 ሃ ሹቻቲ ጎዳይ ሃች ኦዳይሳ ኢንቴና ሃሳኢሲዛ ማላታ ጊዳና፤ ዎዴፔ ኢንቴ ናይቲ ኢንቴና፥ ‹ሃ ሹቻቲ ኣዜ?› ጊዲ ኦይቺዛ ዎዴ፥ 7 ኢንቴ፥ ‹ጎዳ ጫቆ ቃላ ታቦታይ ፒኒዛ ዎዴ ዮርዳኖሴ ሻፋይ ጎጊዛይሳ ኣጊ ኤቂዴስ፤ ሃ ሹቻቲ ሄ ሶሆን ሃኒዳይሳ ኡባ ሜርናስ ኢስራኤሌ ኣሳ ሃሳኢሲዛይታ› ጊዲ ኢስታስ ዮቲቴ» ጊዴስ።

8 ኢስራኤሌ ኣሳይ ኢያሶይ ኣዛዚዳ ማላ ኦዴስ፤ ጎዳይ ኢያሶስ ዮቲዳ ማላ ኢስራኤሌ ቆሞታ ቆዳን 12 ሹቻታ ዮርዳኖሴ ሻፋ ጊዶፌ ኤኪዳ፤ ቶኪ ኤሂዲ ባ ኣቂዳ ሶሆን ዎዳ። 9 ኢያሶይ ጫቆ ቃላ ታቦታ ቶኪዳ ቄሴታ ቶሆይ ዮርዳኖሴ ሻፋ ጊዶን ኤቂዳሶን 12 ሹቻታ ኤሲዴስ፤ ሄ ሹቻቲ ሃች ጋካናስ ሄን ዴቴስ። 10 ጎዳይ ኢያሶ ኣዛዚዳይሳ ኡባ ኣሳይ ፖላና ጋካናስ ጫቆ ቃላ ታቦታ ቶኪዳ ቄሴቲ ዮርዳኖሴ ሻፋ ጊዶን ኤቂ ጋምኢዳ፤ ሙሴይ ኢያሶ ኣዛዚዳ ኣዛዞይካ ሄሳ፤ ኣሳይ ኤሶቲዲ ሻፋ ፒኒዴስ። 11 ኣሳይ ዉሪ ፒኒዳፔ ጉዬ ጎዳ ጫቆ ቃላ ታቦታይኔ ቄሴቲ ኣሳይ ኢስታ ጼሊሺን ፒኒዳ። 12 ሙሴይ ኣዛዚዳ ማላ ኦሮቤሌ ዛሬቲ፥ ጋዴ ዛሬቲኔ ሚናሴ ዛሬታፔ ባጋይ ኦላ ሚሻ ኦይኪዲ ኢስራኤሌ ኣሳፔ ሲንቲዲ ፒኒዳ። 13 ቆዳን 40,000 ጊዲዛ ኣሳይ ቶራኔ ጎንዳሌ ኦይኪ ኦላስ ጊጌቲዲ ጎዳ ሲንን ኢያርኮ ማታን ዲዛ ዴምባ ፒኒዳ። 14 ሄ ጋላስ ጎዳይ ኢያሶ ኢስራኤሌ ኣሳ ኡባ ሲንን ቁ ቁ ሂስቲዴስ፤ ኣሳይ ሙሴ ቦንቺዳ ማላ ኢያሶካ ኢዚ ዲዳ ላይ ኡባን ቦንቺዴስ።

15 ሄሳፌ ጉዬ ጎዳይ ኢያሶስ፥ 16 «ጫቆ ቃላ ታቦታ ቶኪዳ ቄሴቲ ዮርዳኖሴ ሻፋፔ ኬዛና ማላ ኣዛዛ» ጊ ዮቲን፥ 17 ኢያሶይ ቄሴታ፥ «ዮርዳኖሴ ሻፋፔ ኬዚቴ» ጊ ኣዛዚዴስ። 18 ጎዳ ጫቆ ቃላ ታቦታ ቶኪዳ ቄሴቲ ዮርዳኖሴ ሻፋ ጊዶፌ ኬዚዲ ሜላ ቢታ ኢስቲ ዬዳ ማላ ሄራካ ዮርዳኖሴ ሃይ ካሴ ማላ ሻፋ ኩሚዲ ጎጌ ኦይኪዴስ።

19 ኣሳይ ኮይሮ ኣጊናን ታማን ጋላሳን ዮርዳኖሴ ሻፋ ፒኒዲ ኢያርኮን ኣርሼይ ሞኪዛሶ ባጋራ ዛዋቲዛ ጌልጌላን ዱንካኒዴስ። 20 ኢያሶይ ዮርዳኖሴ ሻፋፔ ኤሂዳ 12 ሹቻታ ጌልጌላን ኤሲዴስ። 21 ኢስራኤሌ ኣሳስ፥ «ዎዴፔ ኢንቴ ዛሬቲ ባ ኣዋታ፥ ‹ሃ ሹቻቲ ኣዜ?› ጊ ኦይቺዛ ዎዴ፥ 22 ‹ኢስራኤሌ ኣሳይ ዮርዳኖሴ ሻፋ ሜላ ቢታ ዬዲ ፒኒዳይሳ ሃሳኢሲዛይሳ› ጊዲ ዮቲቴ። 23 ኑኒ ፒናና ጋካናስ ጎዳ ኑ ጾሳይ ዞኦ ኣባ ካሴ ኑ ሲንን ሜሊሲዳ ማላ ኢንቴካ ፒናና ጋካናስ ጎዳ ኢንቴ ጾሳይ ዮርዳኖሴ ሻፋ ኢንቴ ሲንን ሜሊሲዴስ። 24 ሄሳ ኢዚ ኦዳይ ሳኣን ዲዛ ኣሳይ ዉሪ ጎዳ ዎልቃይ ኣይ ማላ ጊታኮ ኤራናሲኔ ኢንቴካ ጎዳስ ኢንቴ ጾሳስ ሜርናስ ያያናሳ» ጊዴስ።