ጹጌቲዛ ያርሾ
1 ጎዳይ ጋይቶቴ ዱንካኔዛ ጊዶን ዲሼ ሙሴ ጼይጊዲ ሂዝጊ ኣዛዚዴስ፥ 2 «ኢስራኤሌ ኣሳይ ጎዳስ ያርሾ ሺሺዛ ዎዴ ኢስቲ ናጋና ዎጋይ ሃይሳፌ ካሊዛይሳ፤ ኢሲ ኢሲ ኣሲ ሚዛፔ ጊዲን ዶርሳፌ ዎይኮ ዴይሻፌ ጊዲን ኣይ ቆሞ ያርሾካ ሺሺዛ ዎዴ፥ 3 ሄሲካ ሚዛፔ ኢሳ ጹጌቲዛ ያርሾስ ሺሻናስ ኮይኮ ኢሲ ቦሬይካ ኢዛ ቦላ ባይንዳ ሚርጎ ቦራ ዶሪዲ ኤሆ፤ ሂስቲኮ ኢዚ ጎዳ ኡፋይሲዛ ያርሾ ጊዳና ማላ ጋይቶቴ ዱንካኔዛ ፔንጌን ሺሾ። 4 ጹጌቲዛ ያርሾ ሺሺዛዴይ ባ ሺሺዛ ቦራ ሁኤ ቦላ ባ ኩሼ ዎ፤ ሄ ያርሾዚካ ኢዛ ናጋራ ዉርሳናስ ጎዳይ ኤኪዛ ሎኦ ያርሾ ጊዳና። 5 ሄሳዴይ ሚርጎዛ ሄን ጎዳ ሲንን1፡5 ጎዳ ሲንን ጌቴቲዛይሲ ጋይቶቴ ዱንካኔን ጉሳ። ሹኮ፤ ሂስቲኮ ኣሮኔ ዜሬታፔ ጊዲዳ ቄሴቲ ቦራዛ ሱ ጎዳስ ሺሼቶ፤ ጋይቶቴ ዱንካኔን ጌሊዛ ፔንጌ ባጋራ ዲዛ ያርሾ ያርሺዛሶዛ ቦላ ላንቄራ ዩዪ ኣናስ ሱ ዉጼቶ። 6 ሄሳፌ ጉዬ ሄ ያርሾዛ ሺሺዛይሲ ሄ ሹኬቲዳ ሜሄዛ ጋልባ ሾቂዲ ኬሶ፤ ኣሾዛ ቆሞን ቆሞን ቃንጼሬ። 7 ቄሴ ኣሮኔ ዜሬ ጊዲዳ ቄሴቲ ያርሾ ያርሺዛሶዛ ቦላ ሚ ጎጲዲ ታማ ኤቶ። 8 ቄሴዛ ኣሮኔ ዜሬ ጊዲዳ ቄሴቲ ሄ ሜሄዛ ኣሾዛ ቆሞን ቆሞን ሻኪዲ ሁኤዛኔ ሃንዳዛ ጉጂዲ ያርሾ ሺሺዛሶን ኮሬቲዳ ሚ ቦላ ዎቶ። 9 ሄ ያርሾዛ ሺሺዛይሲ ሄ ሜሄዛ ቃን ኣሾዛኔ ጉዬ ጌዳታ ሃን ሜጮ፤ ቄሴዚ ያርሾዛ ኡባ ያርሺዛሶዛ ቦላ ጹጎ፤ ሃይሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።
10 «ኢዛዴይ ባ ዶርሳፌ ዎይኮ ባ ዴይሻፌ ኢሳ ጹጌቲዛ ያርሾስ ሺሻና ኮይኮ ኢሲ ቦሬይ ኢዛ ቦላ ባይንዳ ርሾ ዎይኮ ኦርጌ ጊዶ። 11 ሄሳካ ያርሾ ሺሺዛሶዛፔ ፑዴሃ ባጋራ ጾሳ ሲንን ሹኮ፤ ኣሮኔ ዜሬ ጊዲዳ ቄሴቲ ሱ ኤኪዲ ያርሾ ያርሺዛሶዛ ቦላ ዩዪ ኣናስ ዉጼቶ። 12 ሄ ያርሻ ሺሺዛዴይ ሄ ሹኪዳ ኣሾዛ ቆሞን ቆሞን ቃንጺ ኬሲዳፔ ጉዬ ሄ ኦሶዛስ ዶሬቲዳ ቄሴይ ሄ ኬሲዳ ኣሾዛ ኡባ ሁኤዛኔ ሃንዳዛካ ኢሲፌ ያርሾ ያርሺዛሶን ጎጴቲዲ ታማን ኤጺዛ ሚ ቦላ ዎ፤ 13 ኣዴዚ ሄ ሜሄዛስ ቃን ኣሾዛኔ ናምኡ ጌዳታ ሃን ሜጮ፤ ቄሴዚካ ሄሳ ኡባ ጎዳስ ያርሾ ኦ ሺሺዲ ያርሾ ሺሺዛሶዛ ቦላ ኡባ ጹጎ፤ ሄሳ ማላ ታማን ጹጌቲዛ ያርሾ ሳዎይ ጾሳ ኡፋይሴስ።
14 «ኢሳዴይ ጎዳስ ጹጌቲዛ ያርሾ ካፎፔ ሺሻና ኮይኮ ሃራጴ ጪዬ ዎይኮ ዋኖሴ ጌቴቲዛ ካፎፔ ጊዳናስ ዳንዳዬስ። 15 ቄሴዚካ ሄ ካፎዛ ኤኪዲ ጌዴ ያርሾዛሶ ሺሺዲ ካፎዛ ቆ ሚርቆ፤ ያርሾዛ ሺሺዳ ታማን ኢዛ ጹጎ፤ ሱካ ያርሾይ ኢዛ ቦላ ሺቂዛይሳ ሚሌራ ዱጌ ጾኬቶ። 16 ባሌዛኔ ቃን ኣሾዛ ዱማ ሻኪዲ ያርሾ ኢዛ ቦላ ሺሺዛሶዛፔ ኣርሼይ ሞኪዛ ባጋራ ቢዲን ቆሌቲዛሶን ዬጌቶ። 17 ቄፌታ ኦይኪዲ ናምኡ ኬሲ ጳልቂዲ ኣሾዛ ሙሌራ ሻኪ ዬጎንታ ዲሼ ያርሾ ሺሺዛሶዛ ቦላ ዲዛ ታማን ሙሌራ ጹጎ፤ ሄሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።