1 ኤልቆሼ ዴሬ ኣስ ናሆሜይ ናናዌ ዮ ጊሻስ ዮቲዳ ኣጁታ ማጻፋይ ሃይሳፌ ካሊዛይሳ።✝

2 ጎዳይ ዚልኤቲዛኔ

ሃሎ ኬሲዛ ጾሳ፤

ጎዳይ ሃሎ ኬሲዛኔ

ሃንቆን ኩሚዳ ጾሳ።

ጎዳይ ሃሎ ኬሲዛዴኔ

ፓላ ሚሺ ኢዛን ኩሚዳዴ።

ጎዳይ ባ ባልጋራታ ቦላ

ሃሎ ኬሴስ፤

ባ ሞርኬታ ቦላ

ባ ሃንቆ ኤሄስ።

3 ጎዳይ ሃንቄታናስ ኤሶቴና፤

ኢዛ ዎልቃይካ ጊታ።

ጎዳይ ሞራንቻ

ቃጻዮንታ ኣጌና፤

ጎቴ ጫርኮይኔ ኣባ ዳምባላይ

ኢዛስ ኦጌ፤

ሻራይ ኢዛ ቶሆ ጉዱላ።

4 ኣባ ሴሪዲ ሜሊሴስ፤

ሻፋታ ኡባ ሚጪንቼስ።

ባሳኔይኔ

ቃርሜሎሴይ ሹሊዳ።

ሊባኖሴ ጪሻቲካ

ቆቆፌቲዳ።

5 ዙማቲ ኢዛ ሲንን ኮኮሪዳ፤

ዙምቡላቲካ ሴሪዳ።

ኢዛ ሲንን ቢታይ፥ ኣላሜይኔ

ኢዚን ዲዛ ኡባቲ ቃጺዳ።

6 ኢዛ ሃንቆራ ኤቄታና

ዳንዳይዛይ ኦኔ?

ኢዛ ሃንቆ ሚኖዛ

ቶካና ዳንዳይዛይ ኦኔ?

ኢዛ ሃንቆይ ታማ ማላ ኤጺዴስ፤

ዛላቲካ ኢዛ ሲንፌ ዛኢዳ።

7 ጎዳይ ሎኦ፤

ሜቶ ጋላሲካ ቆቴቲ ኣቲዛሶ።

ኢዛን ኣማኔቲዛይታ ናጌስ።

8 ጊዶ ኣቲን ኢዚ ናናዌ

ዎልቃማ ዲኦ ሃን

ይሳና፤

ባ ሞርኬታ ማይ

ዲዛሶ ዬዴና።

9 ኢስቲ ጾሳ ቦላ ኣይ ዱላቲኮካ

ኢዚ ኢስታ ይሳና።

ሜቶይ ናምኣን ዴንዴና።

10 ኢስቲ ኣጉንን ቃጼታና፤

ባ ዎይኔ ኡሻን

ኢስቲ ማታና፤

ታማይ ኢስታ ቡጻ ማላ ማና።

11 ሃኔ ናናዌ!

ጎዳ ቦላ ኢታ ዱላቲዛይቲኔ

ኢታ ዞሬ ዞሬቲዛይቲ

ኔ ጋርሳፌ ቤቲዳ፤

12 ጎዳይ፥ «ኢስቲ ኣይ ዎልቃማታኔ

ዳሮታ ጊዲኮካ

ኢስቲ ቃንጼቲ ያና።

ሃይሶ ዩሁዳ ኔኒ ሃይሳፌ ካሴ

ታ ኔና ኡንኤዳ ጊዲኮ

ሃይሳፌ ጉዬ

ታ ኔና ኡንኤኬ።

13 ሃኢካ ታ ኢስታ ቃምባራ

ኔ ሞርጌፌ ሜን ዲጋና፤

ኔ ኢዛን ቃሼቲዳ ሳንሳላታካ

ዱ ዬጋና» ጌስ።

14 ሃኔ ናናዌ ጎዳይ ኔና፥

«ሃይሳፌ ሲንን ኔ ሱን

ጼይጊዛ ዬሌታይ ዴና።

ኔ ኤቃ ጾሳታ ኬን ዲዛ

ማሴቲ ጊጊዳ ሚስሌታኔ

ሴሪሲ ጊግሲዳ

ኤቃ ጾሳታ ይሳና፤

ኔ ኢታ ጊዲዳ ጊሻስ

ኔ ሞጌታናሶ

ታ ቦካና» ጌስ።

15 ሄኮ ሚሺራቾ ዮቲዛይሲ፥

ሳሮቴ ኣዋጂዛይሲ

ዙማ ቦላራ

ዩሳን ዴስ።

ዩሁዳ ኔ ባኣሌታ ቦንቻ፤

ኔ ኣዲኔቲዳይሳ ጋ፤

ሃይሳፌ ጉዬ ኢታቲ

ኔ ዴሬ ዎራጄቴና፤

ኢስቲ ሙሌራ ያና።✝