ናሆሜ ቲንቢቴ 2

ናናዌ ኩንዴ

1 ሃኔ ናናዌ!

ኔና ቆሃናይ ኔ ቦላ ዪዴስ፤

ኔ ሚጻ ናጋ፤

ኔ ኦጌ ጾሞሳ፤

ሚን ጊጻ፤

ኔ ዎልቃ ኡባ ሚን።

2 ይሲዛይቲ ኢስታ ሜላ

ኣሺኮካ፥

ኢስቲ ዎይኔ ኣታኪልቴ ቶኪዛሶሆ

ሙሌራ ይሲኮካ

ኢስራኤሌ ቦንቾ ኡባ ማላ

ጎዳይ ያቆቤ

ቦንቾካ ዛራና።

3 ኢዛ ዎታዳራታ ጎንዳሌይ ዞኦ፤

ኢዛ ኦላንቻቲካ

ዞኦ ማይኦ ማይኢዳ፤

ኢስቲ ኦሌታናስ ጊጌቲዳ ጋላስ

ኢስታ ፓራ-ጋሬታ

ቢራታይ ጾልቄስ፤

ኢስታ ቶራ ቶማይ ሉጼስ።

4 ፓራ-ጋሬቲ ዴምባን

ያኔ ሃ ቡራቄቴስ፤

ኦጌታ ቦላካ

ሾምኡሾምኡ ጌቴስ፤

ላጪዛ ጾምፔ ሚሳቴቴስ፤

ዎልቃን ማላ

ዋዋጪ ጌቴስ።

5 ዶሬቲዳ ኦላንቻታ ጼይጌስ፤

ጊዶ ኣቲን ኢስቲ ዪሼ

ኦጌን ጴቴቴስ፤

ካታማ ጊምቤኮ ዎጼቴስ፤

ኦላ ቴቂዛ ጎንዳሌይካ

ሄን ዴስ።

6 ሻፋ ፔንጌይ ዋጊ ጊ ዶዬቲዴስ፤

ካዎቴ ኬ ኩንዲዴስ።

7 ናናዌይ ካዉዪን

ኢዚ ካዎያ ዲኤታዳ ቡሲ

ኣቶንታይሲ ካሴቲ ዮቴቲዴስ።

ኢዚ ማጫ ኣይሌቲ

ሃራጴ ማላ ዬካና፤

ባንታ ቲራካ ኢጫና።

8 ናናዌይ ኤሌ ሃ ማላ፤

ኢዚ ሃካ ሚጫና።

«ኤቃ! ኤቃ!» ጊ ኢስቲ ዋሳና፤

ጊዶ ኣቲን ጉዬ

ሲሚዛይ ዴና።

9 ኢዛ ሚንጃ ኬን

ዳጋቲዳ ኣቆታስ

ቆዳይ ዴና፤

ቢዲ ቢራካ፥

ዎርቃካ ቦንቂ ኤኪቴ።

10 ቆጪሬታዱስ፤ ቦንቄታዱስ፤

ካሎታዱስ፤ ዎዚናይ ታሂዴስ፤

ጉልባቴይ ኮኮሪዴስ፤

ኣሾይ ቃጺዴስ፤

ኣይፌሶይካ ጊልቂዴስ።

11 ጋሞቲ ካሴ ዴኢዛ ጎንጎሎይ፥

ኢስታ ማራቲ ሚዛሶይ፥

ማጫ ጋሞይኔ

ኣዴ ጋሞይ ቢዛሶሆይ፥

ኢስታ ማራቲ ሂርጋይ ባይንዳ

ሚዛሶይ ሃኢ ኣዋን ዲዜ?

12 ጋሞይ ባ ማራታስ

ጊዳናይሳ ኬና ዎዴስ፤

ማጫሳታስካ ጩሊ ዎዴስ፤

ባ ዎዳይሳ ባ ሼምፒዛሶን፥

ባ ቦንቂ ሺሺዳይሳ

ባ ጎንጎሎ ኩንዴስ።

13 ኡባፌ ዎልቃማ ጎዳይ፥

«ታ ኢንቴ ቦላ ዴንዳዲስ፤

ኢንቴ ፓራ-ጋሬታካ ጹጋና፤

ኢንቴ ጋሞ ማራታ ማሻይ ማና፤

ኢንቴስ ማና ሚሺካ

ቢታ ቦላ ኣሽኬ፤

ኢንቴ ኪቲዛይታ ጬንጉርሲ

ሃይሳፌ ጉዬ ሴቴቴና»

ጊ ኣዋጄስ።