Neemias 9

ኢስራኤሌ ኣሳይ ባ ናጋራ ፓጼ

1 ሄ ኣጊናን ናምኡ ታማኔ ኦይዳን ጋላስ ኢስራኤሌ ኣሳይ ኢሲ ቦላ ሺቂዲ ባ ናጋራ ጊሻስ ኬሂ ሞቲዳይሳኔ ጬጪዳይሳ ቆንጪሲናስ ማቃ ማይኢዲ ባ ሁኤ ቦላ ጉዱላ ላሊዲ ጾሚዴስ። 2 ኢስራኤሌ ኣሳይ ኣላጋ ኣሳ ኡባፌ ባና ሻኪዴስ፤ ሄሳፌ ጉዬ ኣሳይ ዉሪ ዴንዲ ኤቂዲ ኢስቲኔ ካሴ ኢስታ ኣዋቲ ኦዳ ናጋራ ኡባ ፓጺዳ። 3 ሄን ኢስቲ ኤቂዳ ማላ ዲሺን ኢስታ ጾሳ ዎጋ ማጻፋይ ሄ ሳቴ ኩሜ ኢስታስ ናባቤቲዴስ፤ ቃሴ ሃራ ሄ ሳቴ ኩሜ ኢስቲ ባ ናጋራ ፓጺሼ ጎዳስ ባ ጾሳስ ሆኪ ጎይኒዳ። 4 ሌዌ ባጋታስካ ኤቂዛ ማዲራኬይ ዴስ፤ ሄ ማዲራኬዛ ቦላ ኢያሶይ፥ ባኔይ፥ ቃዲምኤሌይ፥ ሼባኒያይ፥ ቡኔይ፥ ሼሬቢያይ፥ ባኔይኔ ካናኔይ ኤቂዲ ባ ቃላ ቁ ሂስቲዲ ጎዳ ባንታ ጾሳኮ ዎሲዳ። 5 ኢያሶ፥ ቃዲምኤሌ፥ ባኔ፥ ሃሻቢናዬ፥ ሼሬቢያ፥ ሆዲያ፥ ሼባኒያኔ ፓታያ ጌቴቲዛ ሌዌ ባጋ ኣሳቲ፥

«ኢንቴ ዴንዲ ኤቂዲ ሜርና ጎዳ

ኢንቴ ጾሳ ጋላቲቴ፤

ጋላታፔኔ ኣንጆፌ

ቁ ቁ ጊዳ

ቦንቼቲዳ ጾሳ ሱን

ሳቢቴ» ጊዳ።

ማሬታና ዎሲዳ ዎሳ

6 ሄሳፌ ጉዬ ኢስራኤሌ ኣሳይ፥

«ጾሶ፥ ኔ ጻላ ጎዳ፤

ሳሎኔ ሳሎ ቦላ ዲዛይታ፥

ሳኣኔ ሳኣ ቦላ ዲዛይታ፥

ጊታ ኣባኔ ኢዛ ጊዶን ዲዛይታ

ኡባ ሜዳይ ኔና።

ኡባስ ዴኦ ሼምፖ ኢማዳሳ፤

ሳሎ ሜቴቲ ኡባይ

ኔስ ጎይኔቴስ።

7 ጎዳዉ፥ ኔኒ ጾሳ!

ኔኒ ኣብራሜ ኡሬ ጌቴቲዛ

ካላዳዌ ዴሬፔ ዶራዳ

ጼይጋ ኬሳዳሳ፤

ኢዛ ሱንካ

ኣብራሃሜ ጋዳሳ።✝9፡7 ሜ 11፡31—12፡1፤ 17፡5

8 ኢዚ ኔስ ኣማኔቲዳ ኣስ

ጊዲዳይሳ ቤያዳ

ኢዛራ ጫቄታዳሳ፤

ካናኔ ኣሳይ፥ ሂቴ ኣሳይ፥

ኣሞሬ ኣሳይ፥

ፓሪዜ ኣሳይ፥ ያቡሴ ኣሳይኔ

ጌርጌሴ ኣሳይ

ኢዛን ዲዛ ቢታ፥

ኢዛ ዜሬታስ

ዱሳ ቢታ ጊዳና ማላ

ላቲሳናስ ጫቆ

ቃላ ጌላዳሳ፤

ኔኒ ጺሎ ጊዲዳ ጊሻስ

ኔ ጫቆ ቃላ ሚን ናጋዳሳ።✝9፡8 ሜ 15፡18-21

9 «ኔኒ ኑ ኣዋታ ቦላ

ካሴ ጊብጼ ቢታን ጋኪዳ

ዋዬዛ ቤያዳሳ፤

ኢስቲ ዞኦ ኣባ ማታን ዲሼ

ማዶ ኮዪዲ

ኔና ዎሲዳ ዎሳ ሲያዳሳ።✝9፡9 ኬሳ 3፡7፤ 14፡10-12

10 ጊብጼ ካዎ ቦላ፥

ሹሜታ ቦላኔ

ሄ ቢታን ዲዛ ኣሳ

ኩሜ ቦላ

ጊታ ማላታታ ቆንጪሳ ቤሳዳሳ።

ሄሳ ኔ ኦዳይ ካሴ ኑ ኣዋታ

ጊብጼ ኣሳይ ኣይ ማላ ኢስታስ

ሜንጼ ኢቲዲ ዋዪሲዳኮ

ኔ ቤኢዳ ጊሻሳ፤

ኔ ሄሳ ኦይሳ ጋሶን

ሃች ጋካናስ

ኔ ሱንይ ቦንቾን

ጼይጌታና ማላ ኦዳሳ።✝9፡10 ኬሳ 7፡8—12፡32

11 ኢስታ ሲንን ኣባ

ናምኡ ኬሳ ሻካዳ፥

ሜላ ቢታራካ

ኢስታ ፒንዳሳ፤

ሹች ዱጌ ጪማ ሃ

ጊዶን ዬጊዛ ማላ

ኢስታ ጎዲዛይታ ጪማ

ሃ ጊዶ ዬጋዳሳ።✝9፡11 ኬሳ 14፡21-29፤ 15፡4-5

12 ጋላስ ቱሳ ማላ ኤቂዳ ሻራን፥

ኦማርሲ ቱሳ ማላ

ታማን ፖኢሳዳ

ኢስቲ ባናስ ቤሲዛ ኦጌራ

ባና ማላ ካሌዳሳ።✝9፡12 ኬሳ 13፡21-22

13 «ሳሎፔ ዱጌ

ሲና ዙማ ቦላ ዎዳ

ኔ ዴሬዛ ሃሳይሳዳሳ፤

ሎኦ ዎጋታኔ ሱሬ ቲሚርቴታ

ኔ ኢስታስ ኢማዳሳ።

14 ጌሻ ኔ ሳምባታ

ኢስቲ ቦንቻና ማላ

ታማርሳዳሳ፤

ኔ ኣዛዞታ፥ ዎጋታኔ ማራታ

ኔ ኦሳንቻ ሙሴ ባጋራ

ኢስታስ ኢማዳሳ።✝9፡13-14 ኬሳ 19፡18—23፡33

15 ኢስቲ ጋፌቲዳ ዎዴ

ሳሎፔ ካ ኢማዳሳ፤

ኢስቲ ሳሜቲዳ ዎዴ ሃ

ዛላፌ ኢስታስ ፑልቲሳዳሳ፤

ቃሴ ኔ ኢስታስ ኢማና ጋዳ

ጫቂዳ ቢታ ጌሊዲ

ኤካና ማላ ኣዛዛዳሳ።✝9፡15 ኬሳ 16፡4-15፤ 17፡1-7፤ ዛሬ 1፡21

16 «ካሴ ኑ ኣዋቲ ኦቶራንቻኔ

ዎዚና ሙሜ ጊዲዳ ጊሻስ

ኔ ኣዛዞ ናጊቤቴና፤

17 ኔስ ኣዛዜቲቤቴና፤

ኔ ኢስታስ ኦዳ ጊታ

ማላታካ ኡባ ዶጊዳ፤

ዎዚና ሙሜ ጊዲዳ፤

ቃሴ ጉዬ ጊብጼ ኣይሌቴን

ዛራና ማላ

ባንታና ካሌዛ

ኣስ ዶሪዳ።

ጊዶ ኣቲን ኔኒ ሲቆን

ኩሚዳ ጾሳ፥

ሃንቆስ ታኪዛ ጾሳ፥

ኣቶ ጊዛ ጾሳ፥

ኪያኔ ማሪዛ

ጎዳ ጊዲዳ ጊሻስ

ኔ ኢስታ ኣጋቤካ።✝9፡17 ኬሳ 34፡6፤ ታይ 14፡18

18 ማራ ሌሚሶን ባስ ኤቃ ጾስ ኦዲ፥

‹ጊብጼ ቢታፌ

ኑና ካሌዲ ኬሲዳ

ጾሲ ሃይሳኮ!› ጊዳ።

ኔ ሱንካ ኣይ ማላ

ሞሮ ሞሪዶ!✝9፡18 ኬሳ 32፡1-4

19 «ኔ ማሮታይ ጊታ ጊዲዳ ጊሻስ

ኢስቲ ሄን ባዞ ቢታን ዪ

ኣታና ማላ ኣጋቤካ፤

ጊዶ ኣቲን ኢስቲ ጋላስ

ቱሳ ማላ ሻራን

ኦማርስ ቱሳ ማላ ታማን

ኢስቲ ባናስ ቤሲዛ ኦጌራ

ኢስታ ካሌ ኣጋቤካ።

20 ሎኦ ጊዲዳ ኔ ኣያና

ኢስታ ታማርሳና ማላ ኢማዳሳ፤

ኢስታስ ማና ማላ ማና፥

ኡያና ማላ ሃ ኢማዳሳ።

21 ኦይዱ ታሙ ላይ ኩሜ

ኢስታ ባዞ ቢታን ማዳዳ

ኢስታስ ኮሺዛ ሚሼ

ኢሲኖካ ዲጋቤካ፤

ኢስቲ ማይኢዳ ማይኦይ

ዉሪቤና፤

ቃሴ ኢስታ ቶሆይካ

ፑሪቤና።

22 «ኢስታ ዴራ ዩዪ

ኣ ዲዛ ዴሬታኔ

ኢስቲ ካዎቴታ ኡባ

ጾኒዲ ሄ ቢታ

ኤካና ማላ ኦዳሳ፤

ሄሳ ጊሻስ

ካዎ ሲሆኔይ ኣይሲዛ

ሃሴቦኔ ጌቴቲዛ ቢታኔ

ካዎ ኣጌይ ኣይሲዛ

ባሳኔ ጌቴቲዛ ቢታ

ጾኒዲ ላቲዳ።✝9፡22 ታይ 21፡21-35

23 ኢስታስ ቆዳይ ሳሎ ጾሊንቴ ማላ

ዳሪዳ ናይታ ኢማዳሳ፤

ካሴ ኢስታ ኣዋታስ ኔ ኢማና ጋ

ቃላ ጌሊዳ ቢታ

ኢስቲ ጾኒ ላታና ማላ

ኦዳሳ።✝9፡23 ሜ 15፡5፤ 22፡17፤ ኢያ 3፡14-17

24 ኢስታ ናይቲ ካናኔ ቢታ

ጾኒ ላቲዳ፤

ሄ ቢታን ዲዛ ኣሳታ

ኔኒ ጾናዳሳ፤

ኢስታ ካዎታ ቦላኔ ካናኔ

ቢታን ዲዛ ኣሳታ ቦላ

ባ ዶሲዳ ማላ ኦና ማላ

ዎልቃ ኢማዳሳ።✝9፡24 ኢያ 11፡23

25 ቃሴ ሎኢ ጊምቤቲዳ

ካታማታኔ ኣራዳ ቢታ፥

ሎኦ ሚሽ

ኢስታን ኩሚዳ ኬታ፥

ሃ ኦላታኔ

ዎይኔ ኣታኪልቴይ ቶኬቲዛ ጋዴ፥

ዎጋራ ሚታኔ ዳሮ ኣይፌ

ኣይፊዛ ሚታ ላቲዳ፤

ሚዲኔ ኡዪዲ ሞዳ፤

ኔኒ ኔ ኪያቴን ኢሚዳ ሎኦ ሚሻን ዉሪ ኡፋዬቲዳ።✝9፡25 ዛሬ 6፡10-11

26 «ጊዶ ኣቲን ኢስቲ ኔ ቦላ ማካሊዳ፤

‹ኔ ቃላስካ ኣዛዜቶኮ› ጊዳ፤

ኔ ዎጋ ሲዮኮ ጊዲ

ኔስ ዞኮ ዛሪዳ፤

ቃሴ ኢስቲ ኔኮ ዛራና ጊዲ

ሴሪ ታማርሲዳ ናቤታ ዎዳ፤

ኡባ ዎዴ ኔ ቦላ

ጫሻ ቃላ ሃሳይዳ።

27 ሄሳ ጊሻስ ኢስታ ሞርኬቲ

ኢስታ ጾኒዲ ሃራና ማላ

ኣ ኢማዳሳ፤

ሞርኬቲካ ኢስታ ሜቶዳ፤

ኢስቲ ባንታና ሜቲዳ ዎዴ

ኔኮ ዋሲዳ፤

ኔካ ኢስታ ዋሳ

ሳሎን ዳዳ ሲያዳሳ፤

ኔ ማሮቴ ጊታቴፌ ዴንዲዳይሳን

ኢስታ ሞርኬታፔ ኣሻና

ካሌዛይታ ዬዳዳሳ።

28 «ጊዶ ኣቲን ሳሮ ዴሚዳ ዎዴ

ቃሴካ ሲሚ ናጋራ ኦዳ፤

ሄሳ ጊሻስ ኔ ኢስታ ሞርኬታስ

ኣ ኢማዳሳ፤

ኢስታ ሞርኬቲካ ኢስታ ሃሪዳ፤

ጊዶ ኣቲን ኔ ማዳና ማላ ጊዲ

ኔኮ ሲሚ ዎሲዳ ዎዴ

ሳሎን ዳሼ ኢስታ ዎሳ ሲያዳሳ፤

ኔኒ ኔ ቃቴፌ

ዴንዲዳይሳን

ኢስታ ኡባ ዎዴ ማዳዳሳ።✝9፡26-28 ዳና 2፡11-16

29 ኔ ቃላኮ ሲማና ማላ

ኔኒ ኢስታ ሴራዳሳ፤

ጊዶ ኣቲን ባ ኦቶሮቴፌ

ዴንዲዳይሳን

ኔ ኣዛዞታ ካዳ፤

ኢስቲ ኣዛዜቲዳኮ

ኢስታስ ዴኦ ኢሚዛ

ኔ ዎጋታ ቦላ ናጋራ ኦዳ።

ኢስታ ዎዚናይ ሙሚዳ ጊሻስ

ባ ሲን ሃራሶ ዛሪዳ፤

ቃሴ ባ ዎዚና ሙሚሲዲ

ኔ ኣዛዞታ ኢጺዳ።✝9፡29 ሌዌ 18፡5

30 ዳሮ ላይ ኔ ኢስታ ዳንዳያዳሳ፤

ኢስታ ታማርሳና ማላ ናቤታ

ኔ ኣያናን ኢስታስ ዴንዳሳ፤

ጊዶ ኣቲን ኢስቲ ሎኤ

ሲዪቤቴና፤

ሄሳ ጊሻስ ኢስታ ዴሬ

ማታን ዲዛ ኣሳቲ

ጾናና ማላ

ኢስታ ኣ ኢማዳሳ።✝9፡30 2ካዎ 17፡13-18፤ 2ታሪ 36፡15-16

31 ጊዶ ኣቲን ኔ ማሮቴ

ጊታቴፌ ዴንዲዳይሳን

ኢስታ ኣጋቤካ፤

ኔ ኪያኔ ኣቶ ጊዛ

ጾሳ ጊዲዳ ጊሻስ

ኢስታ ይሳቤካ።

32 ጊታ፥ ዎልቃማኔ ያሺዛ

ኑ ጾሳዉ!

ኔኒ ኔ ጫቆ ቃላኔ ሜርና ጋካናዉ ዲዛ

ኔ ሲቆ ናጋሳ፤

ኑ ቦላ፥ ኑ ካዎታ ቦላኔ

ኑና ካሌዛይታ ቦላ

ኑ ቄሴታ ቦላኔ ኑ ናቤታ ቦላ

ኑ ኣዋታ ቦላ፥

ቃሴካ ዴሬ ኡባ ቦላ፥

ኣሶሬ ካዎታፔ ዶሚዲ

ሃች ጋካናስ ጋኪዳ ሜቶ

ኡባ ኔ ቆፓ።✝9፡32 2ካዎ 15፡19፥29፤ 17፡3-6፤ ኢዝ 4፡2፥10

33 ኔ ኑና ቃጻያና ጋዳ

ኔ ኦዳይሲ ዉሪ ሊኬ፤

ኑኒ ናጋራ ኦኮካ

ኔኒ ኔ ኣማኔቴን

ሚና ኤቃዳሳ።

34 ካሴ ኑ ኣዋቲኔ

ኑ ካዎቲ፥

ኑና ካሌዛይቲኔ ኑ ቄሴቲ

ኔ ዎጋ ናጊቤቴና፤

ቃሴ ኔ ኢስታስ ኢሚዳ

ኣዛዞታኔ

ሴራ ዞሬ ሲዪቤቴና።

35 ኔ ኢስታ ካዎቴን

ኢስታስ ጊታ ኣንጆ ኢማዳሳ፤

ኣራዳኔ ኣሆ ቢታ

ኢስታስ ኢማዳሳ፤

ጊዶ ኣቲን ኢስቲ

ባ ናጋራፔ ሲሚዲ

ኔስ ጎይኒቤቴና።

36 ሄሳፌ ዴንዲዳይሳን

ኔ ኑ ኣዋቲ

ኣይፌዮ ማና ማላኔ

ሎኦ ሚሻን ኡፋዬታና ማላ

ኔ ኢስታስ ኢሚዳ ቢታን

ሃች ኑ ኣይሌ ጊዲዶስ።

37 ኑኒ ናጋራ ኦዳ ጋሶን

ኔኒ ኑ ቦላ ካዎዳ ካዎቲ

ኑ ቢታ ኣንጆ ኡባ

ኢስቲ ጎኤቴቴስ፤

ቃሴ ኑ ቦላኔ ኑ ሜሄታ ቦላ

ባ ኮዪዳ ማላ ኦቴስ፤

ሄሳፌ ዴንዲዳይሳን

ኑኒ ሃኢ ጊታ ዋዬ ቦላ ዶስ።

ኣሳይ ቃቺዳ ቃላ ፒርማን ቆንጪሴ

38 «ሃኒዳ ዮኦ ኡባስ ኑኒ ኢስራኤሌ ኣሳይ ቃላን ጋጊዳይሳ ጻፊ ዎናስ ቃላ ቃቺዶስ፤ ኑ ቃቺን ጻፌቲዳ ቃላ ቦላ ኑና ካሌዛይቲ፥ ሌዌ ባጋቲኔ ኑ ቄሴቲ ባ ማታሜ ሾጪዳ» ጊዳ።