ኣሮኔ ጉፌ ፑርጬ
1 ጎዳይ ሙሴስ ሂዝጊዴስ፥ 2 «ኢስራኤሌ ኣሳፔ ዛርኬፌ ዛርኬፌ ኮራፒኔይ ኢሲ ኢሲ ጉፌ ሺሺዲ ታማኔ ናምኡ ጉፌ ኢማና ማላ ኦይቻ፤ ሂስታዳ ኢሳ ኢሳ ሱን ሄ ጉፌታ ቦላ ጻፋ። 3 ሌዌ ዛርኬታፔ ሺቂዳ ጉፌታ ቦላ ኣሮኔ ሱን ጻፋ፤ ኢሲ ኢሲ ዛርኬ ካሌዛዴስ ኢሲ ጉፌይ ሺቆ። 4 ሄይታካ ጌዴ ጋይቶቴ ዱንካኔዛን ኤፋዳ ታ ኔና ሃሳይሲዛሶን ታቦታዛፔ ሲን ባጋራ ዎ። 5 ሄሳፌ ጉዬ ታኒ ዶሪዛዴ ጉፌይ ፑርጪዲ ጪሊላና፤ ሄሳን ኢስራኤሌ ኣሳይ ኡባ ዎዴ ኔ ቦላ ዙዙሞንታ ማላ ታ ዲጋና።»
6 ሄሳ ጊሻስ ሙሴይ ሄሳ ኢስራኤሌ ኣሳስ ዮቲዴስ፤ ዴሬዛ ካሊዛይቲ ኢሶይ ኢሶይ ባ ጉፌ ጉፌ ኤኪዲ ኢዛስ ኢሚዴስ፤ ኢሲ ዛርኬ ጊሻስ ኢሲ ኢሲ ጉፌ ጊዲሺን ኡባይ ኢሲ ቦላ 12 ጉፌይ ሺቂዴስ፤ ሄ ሺቂዳ ጉፌታ ጊዶን ኣሮኔ ጉፌይ ዴስ። 7 ሙሴይ ጉፌታ ኡባ ኤኪዲ ጋይቶቴ ዱንካኔዛ ጊዶን ጎዳ ጫቆ ቃላ ታቦታዛ ሲንን ዎዴስ።
8 ዎንቴ ጋላስ ሙሴይ ጌዴ ጋይቶቴ ዱንካኔዛን ጌሊሺን ሌዌ ቆሞ ሱንን ሺቂዳ ኣሮኔ ጉፌያ ጪሊሊዳሮ ቤኢዴስ፤ ቃሴካ ጪያዳ ካጺዳ ኦቾሎኔ ኣይፌ ኣይፊዳሮ ቤኢዴስ። 9 ሙሴይካ ጉፌታ ኡባካ ኤኪ ኤፊዲ ኢስራኤሌ ኣሳ ቤሲዴስ፤ ኣሳይካ ሄሳ ኡባ ቤኢዲ ኢሲ ኢሲ ኮራፒኔቲ ባ ጉፌ ጉፌ ኤኪዳ። 10 ጎዳይ ሙሴስ፥ «ኣሮኔ ጉፌዛ ዛራዳ ጫቆ ቃላ ታቦታፔ ሲን ባጋራ ዎ፤ ማካሊዛ ኢስራኤሌ ኣሳይ ታ ቦላ ዙዙሚዛይሳ ኣጎንታ ኢጺኮ ኢስቲ ሃይቃናይሳ ቤሲዛ ማላታ ጊዲ ኡቶ» ጊዴስ።17፡8-10 ኢብ 9፡4 11 ሙሴይካ ጎዳይ ኢዛ ኣዛዚዳ ማላ ኦዴስ።
12 ኢስራኤሌ ኣሳይ ሙሴስ፥ «ሃይሳ ማላ ጊዲኮ ኑኒ ዉሪካ ዉራናስ ዶስ! 13 ጋይቶቴ ዱንካኔዛኮ ሺቂዳ ኣሲ ኡባይ ሃይቂዛ ጊዲኮ ኑኒካ ዉሪ ሃይቃናስ ዶስ ጉሴ?» ጊዴስ።