1 ባላሜይ ባላቄ፥ «ኔ ታስ ሃይሳን ላፑን ያርሾ ያርሻናሶታ ኦ፤ ቃሴካ ላፑን ኮርማ ቦራታኔ ላፑን ዶርሳ ርሾታ ታስ ሃ ኤካ ያ» ጊዴስ። 2 ባላቄይ ባላሜይ ኢዛስ ዮቲዳ ማላ ኦዴስ፤ ኢስቲ ናምኣይ ያርሾ ያርሺዛሶሆታ ቦላ ኢሲ ኢሲ ኮርማ ቦራኔ ኢሲ ኢሲ ርሾ ያርሾ ሺሺዳ። 3 ሄሳፌ ጉዬ ባላሜይ ባላቄስ፥ «ጾሲ ሃ ታኮ ያናኮኔ ዮንታኮ ታኒ ጌዴ ባዳ ኤራና ጋካናስ ኔኒ ሃይሳን ጹጌቲዛ ያርሾዛ ኣቻን ኤቃሻ፤ ጎዳይ ታስ ቆንጪሲኮ ሄሳ ታ ኔስ ዉርሳ ዮታና» ጊዴስ፤ ሄሳፌ ጉዬ ባላሜይ ባርካ ፑዴ ቃሶ ኬዚዴስ። 4 ሄን ጾሲ ኢዛራ ጋይቲዴስ፤ ባላሜይካ፥ «ታኒ ላፑን ያርሾ ያርሺዛሶሆታ ጊጊሳዲስ፤ ያርሾ ያርሺዛሶሆታ ኢሳ ኢሳ ቦላ ኢሲ ኢሲ ኮርማ ቦራኔ ኢሲ ኢሲ ርሾ ያርሻዲስ» ጊዴስ።

5 ጎዳይካ ባላሜይ ባላቄስ ዮታናስ ቤሲዛ ኪታ ኢዛስ ዮቲዳፔ ጉዬ ባላቄኮ ሲሚ ባና ማላ ዮቲዴስ። 6 ኢዚካ ጉዬ ሲሚ ቢሺን ባላቄይ ሞኣቤ ኣይሲዛ ዳናታ ኡባራ ኢሲፌ ሄ ጹጌቲዛ ያርሾዛ ኣቻን ኤቂዳ ማላ ዴሚዴስ። 7 ሄሳፌ ጉዬ ባላሜይ ሃሳያ ዶሚዲ፥

«ሞኣቤ ካዎ ባላቄይ

ኣርሼይ ሞኪዛ ባጋራ ዲዛ

ዙማቲ ዲዛ ኣራሜፔ

ታና ጼይጊ ኤሂዴስ፤

ኢዚ ታና፥

‹ሃ ያዳ ኢስራኤሌ ኣሳ

ታስ ዶቃርኪ!

ኢስቲ ያና ማላ

ታስ ኢስታ ቃንጋርኪ!› ጊዴስ።

8 ሂስቲን ታኒ ጾሲ

ቃንጎንታዴ ዎስታ ቃንጎ?

ጾሲ ሂሎንታዴ

ታኒ ዎስታ ሂሎ?

9 ታኒ ኢስታ ሃይታ

ጊታ ዛላታ ቦላ

ዳሼ ዴማይስ፤

ቃ ዙማታ ቦላ ዳሼ

ታ ኢስታ ጼላይስ፤

ኢስቲ ባርካ ዲዛ ካዎቴ፤

ኢስቲ ባና

ሃራ ካዎቴራ ጋ

ቆዶንታይሲ ታስ ቤቴስ።

10 ጉዱላ ማላ ጮሪዳ

ያቆቤ ዜሬ

ቆዲ ዳንዳያናይ ኦኔ?

ዎይኮ ኢስራኤሌስ ጪጎዛካ

ቆዲ ካንናይ ኦኔ?

ጺሎ ኣሳታ ሃይቆ

ታ ሃይቃና፤

ታ ዉርሴይካ

ኢስታ ዉርሴ ማላ ጊዶ» ጊዴስ።

11 ባላቄይ ባላሜስ፥ «ሃይሲ ኔ ታ ቦላ ኦዳይሲ ኣዜ? ታኒ ኔና ሃ ኤሂዳይ ኔ ታ ሞርኬታ ቃንጋናሳ፤ ኔኒ ጊዲኮ ኢስታ ኣንጆ ኣንጃዳሳ ኣቲን ቃንጋቤካ» ጊዴስ።

12 ባላሜይካ ዛሪዲ፥ «ጎዳይ ታስ ቆንጪሲዳይሳ ጻላ ታ ዮታናስ ቤሴኔ?» ጊዴስ።

13 ባላቄይ ባላሜስ፥ «ኢስራኤሌ ኣሳ ኩሜ ጊዶንታ ኢስታፌ ጉቲ ኔስ ቤቲዛሶ ጌዴ ሃራሶ ታናራ ኢሲፌ ባዳ ኔ ኢስታ ሄን ታስ ቃንጋርኪ!» ጊዴስ። 14 ሄሳፌካ ፑዴ ፒዝጋ ዙማ ሁኤን ዲዛ ጾፊሜ ዴምባ ኤፊዴስ፤ ሄንካ ላፑን ያርሾ ያርሺዛሶ ጊግሲዲ ኢሲ ኢሲ ያርሺዛሶዛ ቦላ ኢሲ ኢሲ ኮርማ ቦራኔ ርሾ ያርሺዴስ።

15 ባላሜይ ባላቄስ፥ «ኔኒ ሃይሳ ጹጌቲዛ ያርሾዛ ማታን ኤቃሻ፤ ታኒ ጎዳራ ጋይታና ጌዴ ባይስ» ጊዴስ።

16 ጎዳይካ ባላሜራ ሄን ጋይቲዴስ፤ ኢዚ ዮታና ኪታ ኢዛስ ዮቲዲ ኔኒ ባላቄኮ ሲማ ባዳ ሃይሳ ሃ ኪታ ኢዛስ ዮታ። 17 ኢዚ ሲሚ ቢሺን ባላቄይ ሞኣቤ ዴሬዛ ካሌዛይታራ ሄ ጹጌቲዛ ያርሾዛ ማታን ኤቂዳ ማላ ዴሚዴስ፤ ባላቄይካ ጎዳይ ኢዛስ ኣይ ዮቲዳኮ ኢዛ ኦይቺዴስ። 18 ባላሜይካ ኢዛስ ሃሳያ ዶሚሼ፥

«ጺፖራ ና ባላቄ!

ሃ ሺቃ!

ታኒ ኔስ ዮቲዛይሳ ሲያ።

19 ጾሲ ኣሳ ማላ ዎርዶቴና፤

ኢዛ ቆፋይ

ኣሳ ቆፋ ማላ ላሜቴና፤

ኢዚ ባ ኢሚዳ ሂዶታ

ኡባ ፖሌስ፤

ኢዚ ባ ዮቲዳ

ኡባ ኦስ።

20 ኢዚ ታስ

ታ ኣንጃና ማላ ዮቲዴስ፤

ጾሲ ኣንጂዳ ቃላ

ታኒ ላማናስ ዳንዳይኬ።

21 ያቆቤ ዜሬ ቦላ

ሜቶይ ጋኬና፤

ኢስራኤሌ ኣሳ ቦላካ

ዋዬይ ጋኮንታይሲ

ታስ ቤቴስ፤

ጎዳይ ኢስታራ ዴስ፤

ጾሲ ካዎ ጊዲዳይሳ

ኢስቲ ቆንጬን ዮቴቴስ።

22 ጾሲ ኢስታ

ጊብጼፔ ኬሲዴስ፤

ኢዚ ኢስታስ

ሜን ማላ ቃይጫና።

23 ያቆቤ ናይታ ቦላ

ኣይ ቢታይ፥

ኢስራኤሌ ቦላ

ኣይ ሙሬኖይካ ኦና፤

ሄኮ ሃኢ ያቆቤሲኔ

ኢስራኤሌስ፥

‹ጾሲ ኢስቲ ኣይ ኦዳኮ

ኣኔ ጼሊቴ!› ጌቴታና።

24 ኢስራኤሌ ኣሳይ

ማጫ ጋሞ ማላ ዴንዳና፤

ባ ሻንካቲ ኤሂዳይሳ ሞንታ፥

ሱካ ኡዮንታ ዲሼ

ሼምፖንታ ጋሞ ማላ

ዴንዳና» ጊ ዮቲዴስ።

25 ሄሳፌ ጉዬ ባላቄይ ባላሜስ፥ «ኔኒ ኢስራኤሌ ኣሳ ቃንጎንታ ኢጺዳ ማላ ኢስታ ኣንጆካ ኣንጆፋ!» ጊዴስ።

26 ባላሜይካ፥ «ታኒ ካሴ ኔስ ጎዳይ ታስ ዮቶሮ ጻላ ታ ኦና ጋዳ ዮታቤኪና?» ጊዴስ።

27 ባላቄይካ፥ «ሃ ያ ኣኔ ሃይሳፌ ሃራሶ ቦስ፤ ኦኔ ኤሪዛይ ኔኒ ሄን ዳዳ ሃይሳ ዴሬዛ ታስ ቃንጋና ማላ ጾሲ ኔስ ኤሮ ጎንታ ኣጌና» ጊዴስ። 28 ሄሳ ጊሻስ ባላቄይ ባላሜ ጌዴ ባዞ ጊናራ ዲዛ ፔኦሬ ዙማ ሁኤ ኤኪ ኬዚዴስ። 29 ባላሜይካ ኢዛ፥ «ሃይሳን ታስ ላፑን ያርሾ ያርሺዛሶ ጊጊሳ፤ ላፑን ኮርማ ቦራታኔ ላፑን ርሾታ ሃ ታስ ኤካ ያ» ጊዴስ። 30 ባላቄይካ ባላሜይ ኢዛስ ዮቲዳ ማላ ኦዴስ፤ ያርሾ ያርሺዛሶዛ ቦላ ኢሲ ኢሲ ኮርማ ቦራኔ ኢሲ ኢሲ ርሾ ያርሾ ሺሺዴስ።