1 ኢስራኤሌ ኣሳ ኡባ ኣይፌይ

ፑዴ ጎዳኮ ጼሌስ፤

ሄሳ ጊሻስ ጎዳይ

ካሴ ዮቲ ዎዳ ማላ

ሴዲሬኬ ቦላኔ

ዳማስቆ ቦላ ፒርዳና።✝

2 ሃ ፒርዳዚካ ዳማስቆ ዛዋን ዲዛ

ሃማቴ ቦላ፥

ኣ ኤራቴ ዲዛ

ጺሮሴ ካታማታ ቦላኔ

ሲዶና ካታማታ ቦላ ጋካና።

3 ጺሮሴ ካታማያ ባስ ሚኖ

ሚጻ ጊጊሳዱስ፤

ቢራ ቢታ ማላ፥

ዎርቃካ ጉዱላ ማላ

ሺሻ ጉፓዱስ።

4 ጊዶ ኣቲን ጎዳይ

ኢዛ ጉፒዳይሳ

ዎ ኤካና፤

ኢዚስ ኣባ ጊዶን ዲዛ ዎልቃ

ኡባ ይሳና፤

ኢዛካ ታማን ጹጌታ ያና።✝

5 ኣስቄሎናይ ሄሳ ቤኢዲ ያያና፤

ጋዛይ ሜቶን ኡንኤታና፤

ሄሳካ ኣቃሮኔይ

ሂዶታካ ቃንጻና፤

ጋዛይ ቃሴ

ካዎይ ባይንዳሮ ጊዳና፤

ኣስቄሎናይ ቡላ ጊዳና።✝

6 ዋላካ ዴሬይ ኣዛጾኔ ኦይካና፤

ጬቄቲዛ ፊሊስጼሜ ኣሳ

ታ ይሳና።

7 ታኒ ኢስታ ዶናፔ ሱ፥

ኢስታ ጋጮፔ ሞንታ ማላ

ዲጌቲዳ ካ ዲጋና፤

ሃንኮ ኣቲዳይቲ ታ ዴሬ ጊዳና፤

ዩሁዳ ቢታን ሃላቃታና፤

ኣቃሮኔ ኣሳይካ

ያቡሴ ኣሳ ማላ ጊዳና።

8 ታኒ ጊዲኮ ታ ኬ

ቦንቂዛ ዎልቃማታፔ ናጋና፤

ሃይሳፌ ጉዬ ኡንኤዛይ

ታ ዴራ ላቴና።

ታኒ ሃኢ ሚና ናጋይስ።

9 ሃኔ ጺዮኔ ናዬ

ኬሃ ኡፋዬታ።

ሃኔ ዬሩሳላሜ ናዬ

ኡፋይሳን ኢሊላ፤

ጺሎኔ ኣሺዛ ኔ ካዎይ

ኣሽኬ ጊዲዲ ሃሬዮኔ

ሃሬይ ጉቴ ቶጊዲ ኔኮ ዬስ።✝

10 ፓራ-ጋሬታ ኤፍሬሜፔ

ኦላ ፓራታ ዬሩሳላሜፔ

ታ ኤካ ይሳና።

ታኒ ኦላ ቶራታ

ሜንሬና።

ሳሮቴ ካዎቴታስ ኣዋጃና።

ኢዚ ኣባፌ ኣባን

ጋካናስ ሃራና፤

ኤፊራጺሴ ሻፋፔ ሳኣ ጋጻ

ጋካናስ ኢዚ ኣይሳና።✝

11 ታ ኔናራ ሱን

ጫቄቲዳ ጫቆዛ ጊሻስ

ሃ ባይንዳ ኦላን

ቃሼቲዳ ኣሳታ

ታ ቢርሻዳ ዬዳና።✝

12 ኢንቴኖ ሂዶታይ ዲዛ ቃሾ ኣሳቶ!

ኢንቴ ካሴ ዲዛ ሚጻን ሲሚቴ፤

ካሴ ኢንቴስ ዲዛ ኣቆታ

ዳኮ ሂስታ ታ ኢንቴስ ዛራና።

13 ዩሁዳ ዎንዳፌ ማላ

ኤፍሬሜካ ዪሻ ማላ

ታ ጎኤታና፤

ሃኔ ጺዮኔ ታኒ ኔ ናይታ

ጊሪኬ ዴሬ ቦላ

ዴንና፤

ኔናካ ታኒ ዎልቃማ

ማሻ ማላ

ሂስታ ጎኤታና።

14 ጎዳይ ኢስታ ቦላ ቆንጫና፤

ኢዛ ዪሻይ ዎልቃን ማላ

ፖፖልኡ ጋና፤

ኡባፌ ዎልቃማ ጎዳይ

ጹሩምባ ፑናና።

ዱጌሃፔ ኬዚዛ ጎቴ ጫርኮ ማላ

ኢዚ ባና።

15 ኡባፌ ዎልቃማ ጎዳይ

ኢስታስ ጎንዳሌ ጊዳና፤

ኢስቲ ባ ሞርኬታ

ኡባ ይሳና፤

ኢስቲ ያንባርሻን

ኦሊዛይታ ዬና፤

ኢስቲ ዎይኔ ኡሹ

ኡዪዳ ኣሳ ማላ ዋሳና፤

ያርሾ ሱ ኬሬ ኩሚ

ያርሾሶሆ ቦላ ጉኪዛ ማላ

ኢስታ ሞርኬታ

ሱካ ጉካና።

16 ሄ ዎዴ ጎዳይ ኢስታ ጾሳይ

ባ ዴራ ባስ ዉዴ ሜሄ

ሂስቲ ኣሻና፤

ካላቻ ቦላ ዲዛ

ሴሎይ ጾልቂዛ ማላ

ኢስቲካ ጾሳ ዴሬን ጶላና።

17 ኢስቲ ኣይ ማላ ሎኦኔ

ፑላ ኣስ ጊዳኔሻ!

ካ ናቴታ

ዎይኔ ኡሺ ጌላኦታ

ኣንቃርሳና።