1 Korintus 12

Ona yadala duma

maro ka o rohe moi

12 De ngaroko o bi cocatu ngone moi-moi pamamake gena imaketerowa, duma ngone ma Kristus powipiricaya so inangodu gena he pomarimoika. Sababu ngone gena aku inasitero maro o rohe moi de ma bobolo ka idala. 13 De lo ngone ma binuka gena o Yahudika ma nyawa, de ma binukali yasowo. Ngone ma binuka gena pogogilalo, de ma binukali yasowo. Duma ngone moi-moi gena inangodu o Gikimoi Awi Gurumi magena wonasirimoika, la ma ngale ngone podadi maro ka o rohe moi. Ngone inangoduka gena o Gikimoi Awi Gurumi ka ka moi magena wonahikeka,*12:13 inangoduka gena o Gikimoi Awi Gurumi ka ka moi magena wonahikeka: eko <<inangodu o Gurumi ka ka moi magena wonasiosika>> la ma ngale ngone o Gurumi Una magena wonangaho.

14 Komagena lo o bi cocatu o Gurumi Una magenano moi-moi imaketerowa de lo kanaga o cocatu ma manara gena irupa-rupa. So nako posiade-ade gena, ngone o nyawa nanga rohe ka imatengo, duma nanga rohe ma bobolo magena ka idala. 15 De nako o rohe ma ḋohu itemo, <<Ngohi o gia isowo, so ngohi o rohe magena ma bobolo moi lo gena ḋasowo.>> Komagenawa bai! O ḋohu magena kanaga igogou nanga rohe ma bobolo moi. 16 De nako o rohe ma ngau itemo, <<Ngohi o lako isowo, so ngohi o rohe magena ma bobolo moi lo ḋasowo.>> Komagenawa bai! O ngau magena kanaga lo igogou nanga rohe ma bobolo moi. 17 Sababu nakoso nanga rohe la idadi ka o lako ma rehe-rehe imatengoka, de idadi kawa ngone gena poise. De nakoso nanga rohe la idadi ka o ngau ma rehe-rehe imatengoka, de idadi kawa ngone gena pohame. 18 Ngaroko, ka ḋaloha o rohe ma bobolo moi-moi gena o Gikimoi wositatapu ma riho itotiaika kiaka maro to Una Awi dupa masirete. 19 So nakoso nanga rohe gena kanaga o bobolo ka imatengoka, de magena o rohe ḋasowo bai! 20 So igogou nanga rohe ma bobolo gena kanaga he idala, duma nanga rohe ḋaasu-asu gena ka ngai moika.

21 So idadiwa o ngau itemo o giaka, <<Ngohi ngona tonipakewa bai!>> De komagena lo idadiwa o sahe itemo o ḋohuka, <<Ngohi ngona tonipakewa bai!>> Upa komagena. 22 Nakoso o rohe ma bobolo la kanaga panano moi ikurangi eko kanaga o bobolo moi gena ihiwa, de igogou ngone asa paakuwa pooho. 23 De o rohe ma bobolo la kanaga pananano maro ḋatorou, gena posidodiahi so o baju ḋaloloha positibaku. De lo o rohe ma bobolo la kanaga itiaiwa, gena patalake posidiahi so o nyawa yanano itotiai. 24 Duma o rohe ma bobolo la kanaga pananano maro ḋaloha, gena hika poḋohaka. Igogou, o Gikimoi nanga rohe ma bobolo gena wofato wosidodiahi la o bobolo ḋatotorou magena panano itotiai, 25 la nanga rohe ma bobolo gena asa imakitinga kawa. O bi bobolo ḋangodu gena bilasu ka imatekesidiahi moi de moika. 26 So nakoso o bobolo moi kanaga ḋasiri, de o rohe ma bobolo ḋangodu lo yamalo. De nakoso o bobolo moi kanaga yahoromati, de o rohe ma bobolo ḋangodu magegena asa isanangi.

27 Nako ngini gena ningodu o bolu moi maro ma Kristus Awi rohe, de ma ngale komagena so ngini moi-moi lo maro Awi rohe ma bobolo.