1 Ai dodiao nipipiricaya, ngohi manena ma orasi iḋomaka de taado nginika, o Gikimoi Awi habari ḋaloloha* tinisihabarika gena, ngohi ngini tinisibicara upa de ai demo ḋaloloha eko icocawaro. 2 Sababu ngohi totemo ai sininga ma rabaka, ka cawali ma ngale o Yesus Kristus de lo Awi sone o sangahadika la o dorouno wonasalamati magena bilasu tinisiado. 3 Ma orasi ngohi kanaga nginika tinisihabari, de ngohi ai barani ikurangi sidago lo imodo de foloi itirine. 4 De o demo de o dodoto tosihohabarika magena ngohi tosibicara, upa de ai demo icocawaro so tinibaja, duma ma orasi o habari ḋaloloha ngohi tinisihabari gena itotiai nginika de o Gurumi Ḋatetebi ma kuasa la aku ngini tinisikelelo. 5 Taaka komagena la ma ngale ngini gena nia piricaya ma sihino, upa o dunia ma nyawa manga cawaro, duma ma sihino gena asa o Gikimoi Awi kuasano.

6 Mutuwade ngohi ngaroko upa de ai demo icocawaro, duma kanaga de o cawaro moili asa tasihabari o nyawa nagoona yodupa o Gurumi Ḋatetebi wimomoteka. O cawaro magegena imaterowa de o dunia ma bi nyawa manga cawaro, de lo imaterowa de o dunia ma bi bobareta manga cawaro, sababu ona gena done yasisa. 7 Duma o cawaro moi tosihohabari gena kanaga o Gikimoi Awi cawaro. Magena o nyawa o orasi iḋoḋoma-ḋomaka o Gikimoi wasimane waasi, duma ma orasi o dunia wosidadi waasi de Una kanaga wositatapu iḋomaka done ngone wonasimulia. 8 Awi ngale gena o dunia ma bobareta lo yanakowa. Nako yanako, de o Jou Una wisimuliaka gena iḋomaka ona magena upa he wisidasangahadika bai! 9 Ngaroko komagena, duma ngone gena aku panakoka imatero de o kia naga isilelefo Awi Jaji ma Buku ma rabaka itemo,

<<O nyawa la kanaga o Gikimoi iwidodaraka,

ma ngale ona magena Una wosidailakoka

o loha moi-moi foloisi ilamo,

gena o kia naga moi-moi o dunia ma nyawa

yakelelo waasi eko

yoise waasi,

de manga sininga ma rabaka lo

kagena ibao waasi.>>

10 De o Gikimoi Awi ngale gena ngone manena aku panako, sababu o Gikimoi Awi Gurumi Una magena asa wonasimane ngoneka.

Igogou, o Gikimoi Awi Gurumi Una magena o bi moi-moi ḋangodu watailako, sidago lo wanako o Gikimoi Awi ngale gena, kiaka o nyawa yananako waasi. Magena ḋangodu-ngodu he wanakoka. 11 Sababu yahiwa o nyawa la aku yanako o bi moi-moi manga sininga ma rabaka, ka cawali o nyawa manga gurumi masirete yanako. Komagena lo o bi moi-moi o Gikimoi Awi siningaka gena, ka cawali Awi Gurumi masirete asa aku wanako. 12 So nakoso ngone manena, upa he o dunia ma nyawa manga cawaro pamake, duma to Una Awi Gurumi magena ngone asa pamakeka, la Awi Gurumi gena ngoneka wonasimane ma ngale ngone aku panako igogou o kia naga o Gikimoi wonasitodihike ḋabolo ngoneka. 13 De lo nakoso ngone o habari ḋaloloha posihabari gena, ngone pobicara upa de to ngone o nyawa nanga demo icocawaro, duma de o demo o Gurumi Ḋatetebi ngone wonadodotoka. Komagena de o Gurumi Ḋatetebi Awi demo masirete o dodoto Unano ngone o nyawa padoto.

14 Nakoso o nyawa la kanaga o Gurumi Ḋatetebi Una magena iwimotewa, de ona lo o dodoto o Gurumi Ḋatetebino gena yaḋehe yoholu, sababu o dodoto magena ona yatemo ka o nyawa ifufuma manga demo. Ona magegena akuwa yanako itiai, ka cawali ona kanaga o Gurumi Ḋatetebi iwimote so manga siningaka aku o dodoto magena wosingosa. 15 So nakoso ngone kanaga o Gurumi Ḋatetebi podupa powimote, de o dodoto ḋangodu magena lo aku patuga itiai. Duma to ngone nanga sininga ma tagapi gena, o dunia ma nyawa ona magena he yaakuwa yatuga. 16 Kanaga imatero maro o kia isilelefo o Gikimoi Awi Jaji ma Buku ma rabaka itemo,

<<O moi-moi o Jou Awi siningaka

o nyawa moi lo akuwa yatuga.

O Jou Una gena

o nyawa moi lo akuwa widoto.>>

Ka ka ngone manena, o Gurumi Ḋatetebi powimomote gena, o moi-moi ma Kristus Awi siningaka magena kanaga ngoneka wonasimane de wonadoto, la ngone aku panako.