1 O demo ma duuruka manena, gena o nyawa inangodu bilasu paḋehe ḋaloha: <<Nakoso o nyawa la yodupa yoleleani maro o nyawa ipipiricaya manga bobareta moi, o manara yodudupa gena kanaga o manara moi ma faida foloisi ilamo.>> 2 So o bobareta moi bilasu awi moi-moi waaaka ma rabaka gena o nyawa lo yaakuwa iwikalaki. Komagena una bilasu ma peḋeka ka momatengo de upa o ngopeḋeka ma somoa wadupali, de awi sininga de awi rohe ma nyafusu gena wapareta ḋaloha, de awi sininga wapareta itiai so o nyawa aku iwihoromati, de wodupa waaso o nyawa ma somoa imasidodogu awi tahuka de lo una aku o nyawa wadoto itiai. 3 Komagena lo una bilasu upa witobadalu de upa witobangamo. Duma una bilasu o bi nyawa wadodara de awi sabari ilamo, de o nyawa ma somoa moi lo upa wasibicara ḋatorou, de upa sidago o pipi wodesere. 4 De lo maro o baba moi awi dailako ḋaloha awi tahu ma rabaka, komagena bilasu awi ngopa-ngopa wadoto la ona wisigise de wihoromati manga baba. 5 Sababu nakoso o nyawa moi de wanakowa wosidailako ḋaloha awi tahu ma rabaka, igogou una lo waakuwa wosidailako o Gikimoi Awi gogobu.

6 De lo una magena idadiwa wopopareta nakoso o Jou Yesus iwipiricaya iteka waasi, sababu nako komagena done una asa womacaralamo ifoloi de wotemo ḋangodu ka wanako, de ma duuru o Gikimoi asa wisisala. Magena imatero de o Iblis lo iḋomaka asa womacaralamo so o Gikimoi iwisisala. 7 Ma ngale komagena o bobareta moi bilasu o moi-moi waaka ḋaloha de itiai, la o nyawa ipipiricaya waasi aku isibicara una magena igogou awi manara ḋaloha. Upa sidago maro o Iblis ma sabatolo wipilikuka so awi ronga ma dorou wogaka.

8 O gogobu ma leleani bilasu lo o moi-moi yaaka maro o nyawa aku yahoromati. Komagena upa manga laḋe isago, upa yotobadalu, de upa o pipi yodesere. 9 Ona bilasu yopiricaya ḋaputuru o dodoto itotiai, kiaka o orasi manena o Gikimoi wosimaneka, de ona lo yaaka o manara o kia aku yanako magena itotiai. 10 De lo ileleani ona magena bilasu manga manara yatailako kasi, la nakoso manga dorou moi lo ihiwa, de asa aku ona magena yatide idadi o nyawa ipipiricayaka manga leleani.

11 Komagena lo manga peḋeka bilasu o moi-moi yaaka maro o nyawa aku yahoromati. So upa o nyawa ma somoa yasibicara ḋatorou, duma ona bilasu manga sininga de manga rohe ma nyafusu yapareta ḋaloha, la o nyawa lo aku ona yapiricaya.

12 De o bi nyawa ileleleani ona magena bilasu manga peḋeka ka imatengo de upa o ngopeḋeka ma somoa yadupali, de lo bilasu manga ngopa-ngopa de manga tahu ma raba yaaturu ḋaloha. 13 Nakoso ona la o nyawa ipipiricaya yaleleani ḋaloha, de o nyawa asa yahoromati de ona lo aku yobarani isibicara ma ngale to ona manga piricaya o Yesus Kristuska.

14 O moi-moi iḋomaka ngohi talefoka, ngaroko tongongano itekawa ngohi asa tahika kali ngonaka, 15 duma nako ngohi iteka so ihiwasi, ngona bilasu nanako idodooha o gogobu bilasu manga sininga de manga manara, sababu ona de o Gikimoi maro ka o tahu ma raba moi. O gogobu magena ka o Gikimoi woooho Awi nyawa yangodu wipipiricaya Unaka, de maro o tahu ma golingasu ma sosoḋe ḋapoputuru moi, so komagena ona imasigocoho ḋaputuru o dodoto itotiaika.

16 O dodoto magena o Gikimoi wonasikeleloka, de o dodoto magena lo inasidumu idodooha nanga moi-moi paaka ḋaloha la Una wodupa. So o dodoto magena igogou foloisi ilamo. O dodoto foloisi ilamo, gena ma ngale o Yesus Kristus,

Una masirete womasimane maro o nyawa moi,

de o Gurumi Ḋatetebi wosigogou Una Awi sininga itiai.

De o bi malaikat lo Una wikelelo.

De o habari ma ngale Una isihabari o dunia ma batika

so o nyawa o dunia ma ḋokuka lo iwipiricayaka.

De asa o Gikimoi Una magena witide o sorogaye de Awi muliaka.