Hebreus 10

Bilasu ona yobarani imasidate

o Yesus wosidodailakoka

19 Ai dodiao nipipiricaya! Nako ma Imam Wilalamo kagena o Ngihi Foloi Ḋatetebika wowosa, de bilasu o haiwani ma au waaho. So komagena ngone lo, ma ngale o Jou Yesus Awi sone ma au, so ngone gena asa inamodo kawa de ka pobarani pahino pomasidate o Gikimoika. 20 Ngone aku Unaka pomasidate, sababu ngone panonu o ngeko moi ḋamomuaneka. O ngeko magena kiaka o Yesus wosiaaka ngoneka la inasidumu o oho ḋalolohaka so magena ngone aku pamake. O Jou Awi Suba ma Dadaru iḋoḋoma ma rabaka, kiaka kanaga o Ngihi Foloi Ḋatetebi de ma baro isipoperesuka, kagena idadiwa o nyawa yowosa. Duma o orasi manena o kia naga isipoperesu magena moi lo ihiwaka, so o ngeko de maena la ngone masirete pomasidate o Gikimoika. Sababu o Yesus Awi rohe wahike la witooma so maro o baro isipoperesu gena wapelenga ngoneka, la o Gikimoika aku pomasidate. 21 De o Yesus gena wodadi ma Imam Wilalamo la kagena ngone de o Gikimoi maro o baba so Awi nyawa o tahu ma raba moi waaturu. 22 De Awi au gena, ngone nanga sininga isitiai la aku panako kanaga ngone gena nanga sala ihiwaka. De o ake ḋaloloha nanga rohe wosiosi maro o nonako moi ngone wonatebika. Komagena so hino la ngone de nanga sininga igogou de lo nanga piricaya itotatapu gena powisidate o Gikimoika.