1 So kagena de ma gubernur o Pilatus una magena wasulo awi prajurit la o Yesus iwingaho de wingangapo. 2 Wingangapo ḋaboloka, de awi prajurit ona magena wisimaḋe Unaka gena, o bi gota ma daara ḋatototopo gena yaaka koloko to Una Awi mahkota moi so Awi saheku isitalakeka. De lo o juba ḋauungu maro o bi kolanoka manga juba iwisitibaku. 3 Ḋabolo de ona wisimaḋe isidadu-dadu de itemo, <<Suba! O Yahudika manga kolano!>> De gila-gila Awi bioko yapopoka.

4 Ma moili ma gubernur wosupu o Yahudika manga roririka wotemo kali, <<He! Nianano! Nakoso Una magegena, ngohi towisisupu ma ngale gena tinidedemo nginika, igogou Una manena Awi sala moi lo ngohi tamakewa.>> 5 So o Yesus wisisupu de wisitalakeku de o mahkota ḋatototopo de lo o juba ḋauungu, de ma gubernur una magena wotemo onaka, <<Kodo! Hika Una manena niwinano.>>

6 Ato o imamka ma bi sahe de manga nyawa yojojajaga iwikelelo, de ona yangodu ka moiye imatoore itemo, <<Powisidasangahadi! Powisidasangahadi!>>

Duma ma gubernur wotemo, <<Asitagala! Nako komagena, de ngini Awi nyawa masirete gena niwingaho la niwisidasangahadi. Nakoso maro ngohi to Una Awi sala moi lo tamakewa.>>

7 De o Yahudika manga roriri magena asa ka isigegego itemo, <<Nako to ngomi mia bobita miacocoho gena pamote, igogou Una magena bilasu ka wosone, sababu Una lo wotemo ḋaboloka Una o Gikimoi ma Ngopa.>>

8 Kagena de o Yesus Awi demo magegena ma gubernur woise, so una asa he ifoloisi wimodo. 9 So awi kadato ma rabaka wowosa kali, de wosulo la o Yesus lo wisingosa kali, so wotemo o Yesuska, <<So Ngona igogou o kiano.>> Duma o Yesus ka o demo moi lo wosangowa. 10 Wotemo kali, <<Ḋadoohaso ngohi noisango noholu. Nagala Ngona noinakowa ngohi de ai kuasa, so aku tosulo Ngona nipalako eko lo nisidasangahadi.>>

11 So o Yesus wosango wotemo, <<Nako Ngohi ngona gena igogou de ani kuasa, duma o kuasa magena ka cawali o Gikimoi asa aku wonihihike ngonaka. Mutuwade nako ngona de una ma Imam Wilalamo Ngohi woisidodoa ngonaka la ma ngale Ngohi isidasangahadi, una gena de awi dorou ifoloi ilamo.>>

12 O Yesus Awi demo komagena, so ma gubernur magena asa awi siningaka wotemo, <<Bilasu Una towipalako.>> So wosupu kali, duma o Yahudika manga roriri magena ka iwidotoore isidadu-dadu itemo, <<Igogou! Nakoso o nyawa manena nowipalako, ngona gena nisowo ma Kolano Wilalamo ma Kaisar* awi dodiao. Sababu ngona nanakoka, nakoso o nyawa moi kanaga wotemo una gena o kolano moi, de awi demo magena igogou una ma Kaisar iwilawangi.>>

13 So kagena de ma gubernur una magena wosulo o Yesus wisisupuka, de asa awi kuasa ma kursika womatamiye ma ngale wositatapu bilasu o Yesus wosone. Gena awi riho moi isironga Ma Nanaho o Tetono, de nako o Ibrani ma demo gena isironga o Gabata. 14 O orasi magena o Paskah ma Rarame ma wange gena maro ilangika, so ma ngale magena yosidailako kasi, gena o wange he itiaika nagala o cako mogiowo de sinotoka. De ma gubernur kagena o Yahudi manga roririka wotemo, <<Gena! Una manena nagala nia kolano.>>

15 Duma ona asa imatoore, <<Hika powisidasangahadi! Hika powisidasangahadi!>>

De wotemo, <<Awadede! Ḋadoohaso bilasu towisidasangahadi to ngini nia kolano.>>

De o imamka ma bi sahe itemo unaka, <<To ngomi mia kolano ma somoa gena wihiwa, cawali ka ma Kaisar gena kanaga.>>

16 So imaaka komagena, so ma dodoguka de una, ma gubernur o Pilatus gena, o Yesus ka wisidoa la bilasu awi prajurit iwisidasangahadi.

So o Yesus gena o bi prajurit iwingoso so itagi iwingahoka. 17 Iwingahoka, de Awi sangahadi gena Una masirete wamoku so o kotaka de isupu itagi o riho moika isironga o Sahe ma Papala ma Riho, gena nakoso o bahasa Ibrani isironga o Golgota. 18 So kagena yaadoka de gila-gila Una magena ona wisidasangahadika. De o orasi magena kanaga yasinotoli yasidasangahadi, ona magena o nyawa itotooma, ona yasinoto manga risoaka, so moi Awi girinaka de moili Awi gubalika.

19 De ma gubernur wosulo isilefo to Una Awi sangahadi ma ḋokuka o galaki ma demo itemo: O YESUS O NAZARETKA MA NYAWA O YAHUDIKA MANGA KOLANO. 20 So o Yahudika ma nyawa kanaga yadala o galaki ma demo magena yakelelo de yabaca, sababu o riho kekiaka Una wisidasangahadi magena o kota ma dateka, de ma demo gena isilefo o bahasa saange, ena gena o bahasa Ibrani, o bahasa Latin, de lo o bahasa Yunani. 21 Duma o imamka ma bi sahe magena ma gubernurka itemo, <<Kiaso naḋohaka so ona isilefo de o demo <O Yahudika manga kolano,> duma bilasu isilefo, <O nyawa Una manena wotemo masirete: Ngohi manena o Yahudika manga kolano.> >>

22 Ma gubernur woholu de wotemo, <<O kia naga tosilelefoka gena, komagena bato de yaakuwa niatagali.>>

23 De o bi prajurit o Yesus wisisasangahadika, ona magena to Una Awi baju moi-moi ona yaregu idadi o gimina iha so kanaga moi-moi de manga gimina, de ma soohu gena ka Awi juba. Magena yauriwa duma isidaaka kadaku sidago lo kadahu so isidodaasu. 24 De ona itemo moi de moika, <<Hika upa paraca, duma ngone asa paundi la de magena inasidumu naguuna asa wamake de wodahe.>> Komagena ma ngale idadi de imaaka imatero maro o kia iḋomaka isilelefo o Gikimoi Awi Jaji ma Buku ma rabaka itemo,

<<To Ngohi Ai baju ona imatekesikotoku

la yaaka moi-moi de manga gimina

de ma ngale manga sidongirabaka

la yaaka o undi naguuna Ai juba wodahe.>>

So o bi prajurit ona magena yaaka imatero maro o kia isilelefo iḋomaka.

25 De kanaga o Yesus Awi sangahadi ma dateka imaokoye gena Una Awi awa, de ma awa ma nongoru, de o Klopas ma peḋeka ami ronga ongo Maria de lo ongo Maria Magdalena. 26 So o Yesus o sangahadika de wakelelo ma awa de ami dateka o muri moi foloi wisiboboso, de ma awaka Una wotemo, <<Ai awa, kanena naga nowinano maro to ngona ani ngopa yanau moili.>> 27 De komagena o muri moi una magenaka wotemo kali, <<Ai dodiao, kanena naga nominano maro ka to ngona ani awa masireteli.>> So ka o orasi magenasi, de o muri moi magegena una ma awa gena womijaga ḋaloha so igoge lo ka o tahu moi.

28 Itekawa, de o Yesus wanako o bi moi-moi ḋangodu isiboloka, so womasigaso ma ngale idadi de imaaka imatero maro o kia iḋomaka isilelefo o Gikimoi Awi Jaji ma Buku ma rabaka. Una wotemo, <<Kodo! Ai kiri ḋaduduka.>> 29 Kagena naga o udo-udo moi ma rabaka gena o anggur ḋakokiopi, so ona o bunga moi koloko o kaka yaḋehe so yatono. Ḋabolo de o bunga magena o gota ma uma, ma ronga o hisop gena, ma ideka isisuruka, de yatubo to Una Awi uruka la ma ngale Una wapipi. 30 Una wapipi ḋabolo de wotemo, <<Ai manara tosiboloka.>> Ato Awi sahe iruku gena wosoneka.

31 O wange magegena isidailako ma ngale ma langino o Sabat ma wange de ma boboloi o wange magena o Paskah ma Wange ma rarame ilalamo moi. Ma ngale magegena so o Yahudika manga roriri yodupawa, nakoso o Sabat ma wangeka, de o bi sone ma bake o sangahadika gena kanagasi, so ma gubernur o Pilatuska iwigolo la ibisisangahadika manga ḋohu gena yatepi, ma ngale ona isiguti o sangahadiku de gila-gila yapoosu. 32 So o bi prajurit yasulo la itagi so yahino de ma nonoma gena yasisasangahadi yasinoto o Yesus Awi dateka, ona magena manga ḋohu yatepi. 33 Ḋabolo de yahino o Yesus Awi sone ma bakeka, de asa yanako igogou Una wosoneka, so Awi ḋohu gena ona he yatepi kawa. 34 Ngaroko komagena, duma to Una Awi alu ma ngunu gena o nyawa moi o prajurit manga sidongirabaka de o tuba wasuru, sidago imatodoka o au de lo o ake imakacapu isupu de iuhi. 35 O nyawa moi kanaga o bi moi-moi magegena igogou wakeleloka, so una wosingangasu ḋaboloka, de ma ngale o Yesus Kristus gena winisingangasu nginika, la ngini lo aku niwipiricaya o Yesuska. O kia naga wosingongangasu magena ka itero, de una masirete ka wanako awi demo magena itotiai de itetero. 36 O bi moi-moi magena imadadi ma ngale asa isiganapu o kia iḋomaka isilelefo o Gikimoi Awi Jaji ma Buku ma rabaka itemo, <<Awi kobo moi lo asa upa yatepi.>> 37 De lo isilelefo kali itemo, <<Ona asa iwinanano Una iwisusuruka.>>

38 Itekawa, de o Yusuf o Arimateaka ma nyawa moi wahino. Ma ngale una o Yesus wimote-mote de o Yahudika manga roriri wamodo, so ka womasidodutulu. Ngaroko komagena, duma una asa womabobarani so wahika o Pilatuska, de wagolo o Yesus Awi sone ma bake. De o Pilatus o Yusuf wisimaha so una wotagi de o Yesus Awi sone ma bake magena waaho. 39 De o Nikodemus, una magena o putu moi ipapasaka o Yesus wikurumi, una magena lo o Yusuf wimote. So una waaho lo o gososo ḋabobou gena o gota gaharuno isicacapuka de o sou, gena ma lamo nagala o kilo moruwange, ma ngale o Yesus Awi sone ma bake isisou. 40 So kagena de ona Una Awi sone ma bake magena yaaaho waasi de yarapa kasi, ḋabolo de asa isisangi de o baro ḋaaare, mote de o Yahudika manga adati de manga galepu nakoso o sone ma bake yapoosu. 41 De o riho kiaka Una wisisasangahadika kanaga o doro moi, de kagena lo o boosu moi o teto ma rabaka, de magena ka ḋamomuanesi, so ma rabaka o sone ma bake moi lo waasi yapoosu. 42 Sababu ilangi o Sabat ma wange gena he yadangade yaado, de kagena de o boosuka gena ma soa ikuru kawa, so o boosu magena ma rabaka asa Una Awi sone ma bake yapoosu. Ḋabolo de ona o teto ilalamo moi yodololo la o boosu magena ma ngora isiperesu.