João 5

O Yesus o nyawa moi wisiloha

o Betesda ma ake ma lepaka

1 So magena ipasaka, de o Yahudika manga rarame moi ma orasi yaadoka, de o Yesus wotagi kali o Yerusalemka o rarame magena wamote. 2 De kagena o kota ma boberesu isigogilolino kanaga ma ngora moi isironga o Duba ma Ngora kagena yowosa de ma rabaka kanaga o ake ma lepa moi, magena isironga de o Ibrani ma bahasa itemo o Betesda. O Betesda ma lepa magena isigilolino de o kia naga maro o bi dadaru ngai motoha, duma ma golingasu yagogarade de ma katu ḋaloloha gena o tetono. 3 De kagena naga o bi nyawa yadadala igogoge ona o siri ma rabaka, ena gena moi-moi de manga panyake so ma binuka ipipilo, ma binuka ilulugu, de ma binukali manga rohe isosone. ((De ona yodamaha o ake magena iluaki. 4 Sababu mamoi-mamoi kanaga o Gikimoi Awi malaikat moi yahino iutiku de o ake magena yaluaki. De o orasi magena nakoso nagoona yopopanyake la yahika yoḋoma o akeku youti yomatono, ona magena ngaroko manga panyake o kia bato lo done aku ḋaloha kali.)) 5 De o ake magena ma dateka kanaga o nyawa wopopanyake moi, una magena kagena wogogoge awi orasi ma deka o taungu moruwange de tupaangeka. 6 Ato o Yesus wikelelo una magena de awi sangisara ma deka lo aku ka wanako, so o Yesus wotemo unaka, <<Baba, idodooha nodupa Ngona nisiloha.>>

7 De o nyawa una magena wotemo o Yesuska, <<Baba, nagala idadiwa, sababu ngaroko ngohi todupa iloha, duma ma orasi o ake manena iluaki, ngohi ai dodiao moi lo yahiwa iriwo la ngohi isiguti o akeku. So ngaroko tomariwo totase la o akeku touti, duma o nyawa ma somoa gena kanaga o akeku youti yoḋomaka.>>

8 Woiseka komagena, de wolulugu una magenaka wotemo, <<Nomaoko, de ani jongutu nalolo la natoti de notagi.>> 9 Ato wobicara ḋabolo de una magena wilohaka, so gila-gila womaoko so awi jongutu watoti so wotagi.

Magena o Yesus waaka o Sabat ma wangeka.