Lucas 19

O Yesus o Yerusalemka wowosa de yadadala iwisihoromati

maro o kolano moi

28 So o Yesus Awi ade-ade wadedemoka, de Una woḋoḋoma manga simaka wotagi wokahika o Yerusalemka. 29 Ma orasi ona yadumuka o doku Betfage de o doku Betania o Tala Zaitunka, kagena de o muri yasinoto wasulo itagi iḋoma. 30 De Una wotemo onaka, <<Nitagi o doku magenaka. La kagena o dokuka niwosa, de ngini asa niakelelo o keledai ma goho moi yapilikuka. De o nyawa moi lo waasi o keledai magena yobane. Ma bobiliku niasose de niaahono kanena. 31 Nakoso o nyawa nisano nginika, <Ḋadoohaso o keledai magena niaḋehe,> de nitemo onaka, <O Jou wodupa wapake.> >>

32 Ḋabolo de Una Awi muri yasinoto magena itagi, de ona asa yamake maro o kia Una wotetemo onaka. 33 La o keledai ma bobiliku yasose de ma duhutu wakelelo de wasano onaka, <<He! Ngini magena nidooha. Ḋadoohaso o keledai ma bobiliku niasose de niaḋehe.>>

34 De o muri yasinoto yosango, <<O Jou wodupa wapake bai!>>

35 So ona o keledai magena yaaho Unaka, de manga juba yahoi so isinaho o keledai ma duduku. Kagena de Una wisidola so womatamiye ma ḋokuka. 36 So ona ka itatagi yokahika o Yerusalemka. Una asa wogila-gila, de kogena o ngekoko o nyawa yadadala manga juba isinaho, ma ngale Una iwisihoromati. 37 Ma orasi Una he dangade womasidiado o Yerusalemka, o Tala Zaitun ma ngunuku wokahuku, o bi nyawa yadadala Una wimote-mote gena yangodu asa o Gikimoi iwisigiliri. Ona de manga nali imasagaga ma ngale o bi nonako ihahairani ḋangodu gena yakeleloka. 38 So itemo,

<<Igogou! Ma Kolano wahino de o Jou Awi ronga.

So tanu Una magenaka o Gikimoi Awi laha wisicatu.

Hino powigiliri o Gikimoi Wikukuruye,

sababu Una Awi sininga ḋaloha ngoneka!>>

39 Kagena de o Farisi ma nyawa yamuruo naga yadadala manga sidongirabaka iwitemo o Yesuska, <<He, Baba Guru! Ani nyawa nimomote gena nasulo imapopongoka.>>

40 De Una wotemo, <<Hiwa! Sababu nakoso Ai nyawa imomote gena imapopongoka, de o bi teto magena lo asa imasagaga so Ngohi isigiliri bai!>>