Lukas 2

O Yesus wilamo waasi

o Gikimoi Awi Tahu ma rabaka

41 O musung isigeto o Yesus Awi dodihimo o Yusuf de ongo Maria bilasu o Yerusalemka itagi la isirarame o Paskah ma Wange ma Rarame. 42 So ma orasi o Yesus Awi umuru o taungu mogiowo de sinoto yaadoka, ona imajobo itagi o rarame magena yamote, maro manga adati de manga galepu. 43 So de o Paskah magena isirarame ḋabolo ona bilasu iliho kali manga doku o Nazaretka, duma Awi dodihimo yanakowa Una wamotewa. 44 Kagena de Awi dodihimo itemo nagala Una womasicapuka yadadala manga bolu ma sidongirabaka. So ona ka itagi igila-gila sidago manga dodagi he o wange moi ḋabolo. De ona yahika o ngeko ma soaka, de asa Una iwitailako, 45 duma Una wihiwa sababu wamotewa. So ona imakiliho o Yerusalemka yakahika kali Una iwisari. 46 So wisari o Yerusalem ma doku yakiloli yahika de yahino o wange saange ḋabolo, de asa Una wimake o Gikimoi Awi Tahu ma rabaka. Una de o guru-guru agama so manga demo wosigise de lo onaka wasasano. 47 De o nyawa yangodu asa iise gena yohairani ma ngale Una Awi sosango de Awi cawaro magena. 48 La ma baba de ma awa wikelelo Una, de ona yohairani, de ma awa motemo Unaka, <<Ce! Ai ngopa, ḋadoohaso nomiaka komanena! O wange saange ḋabolo ngomi mia sininga isusa minisari Ngona.>>

49 Kagena de Una wotemo onaka, <<Ḋadoohaso ngini nisari Ngohi. Kiaso ngini asa nianakowa Ngohi bilasu togoge Ai Baba Awi tahuka.>> 50 So Una wotemo komagena ma baba de ma awaka, duma ona asa yanakowa ma ngale o kia Una wotetemo gena.

51 Ḋabolo de ona iliho imakangaho manga doku o Nazaretka, de igogou Una wasigise ḋaloha ma awa de ma babaka. O moi-moi idadadika ḋangodu magena ma awa ami sininga ma rabaka madiahika. 52 Magena de o Yesus Awi cawaro ka idogo-dogo de lo Awi rohe ifero de ilamo. So o Gikimoi de o nyawa yangodu foloi iwidupa Unaka.