1 Anke jaaluwwa, heddo dhariyye wabeekkole butta duuchcha'ni fuldeemmaxxee'e hafuura duuchcha amandinoqqe; yaane kinni hafuuruwwi Mageniinke kadeexxa yookaan kadebaaxxa qo'nissine uudde. 2 Mageniinka Hafuura gargar assitine egendinaak tennenniten. Yessuusi Kiristoosi maala oddo'weexxi dageexxa amanaak Hafuuri duuchchi Mageniinke Hafuuran. 3 Yessuusi Kiristoosi manjoke kadeexxi maala oddo'wee leelleexxa amanabaak hafuuri duuchchi isi Mageniike hafuurabaan. Kunni hafuuri dagaani hinaa'naa laqqineeki Kiristoosi'i gareerak hafuuran; isi ta'anna midde butta duuchcha'n hedheen.

4 Tee oose ha'no Magenokenaa'niten; ha'no insa'nee injifatine'een; tinni kaddeechi ha'no giddo hedheek butta duuchcha'ni hedheeki irra caaleken. 5 Dhariyye wabeekkole butta tennexxxen; insa'ne haaso'naaki tenne buttanxe yaanen. Butta duuchchanna insa'nexxa laqqaan. 6 No'o kinni Magenokenaa'nite; Mageno ege'naak duuchchi no'o hinannoxxa laqaan; Magenokenaa'nite kadebaak kinni no'o hinannoxxa laqabaan; no'onna dhugaatika hafuuranna dhariinka hafuura gargar hiisine egenannoki tenneniten.

7 Anke jaaluwwa jaalala Mageniiba'nite kaddeemmaxxee'e weli'aanni weli eeno; eeyyaak duuuchchi Magenokenaa'ni ilemeeken; isi Magenokanna ege'naan. 8 Mageni jaalalaate kadeemmaxxee'e manjo eeyyabaak Magno ege'nebaan. 9 Mageni ifixxa jaalala no'o giddo ifiseeki; No'oo isi darree'n hedhoti he'nannoshsha Mageni mitte Belto ifika butta duuchcha'ni erge. 10 Jaalalate hiyyoo; no'o Mageno eenennexxeete kaddebaangi isi no'oo eeyyeexxi no'oxxe cubboxxe bira'a Balto ifika no'aa ergatiten.

11 Anke jaaluwwa Mageni no'o iitta eeyyeexxinni no'onna weli'aanni weli eeyya hasissaan. 12 Magenoo uudeek hara ayyinna hedhebaan; weli'aanni weli eenonnole kinni Mageni no'onni hedhaan; jaalala isixxinna no'o'ni wo'mate kaddaan. 13 Mageni Hafuura ifika no'aa uwweemmaxxee'e no'o iso'ni he'nannoxxa isinna no'o'ni hedhaaxxa egeneennen. 14 Aabi ookkone Belto ifika butta duuchchike anjirallo kado'a ergeexxa uundeennen no'onna dhugaa kullannon. 15 Yessuusi Mageniinke Betlo kadeexxa amaneexxi dhugaa kulaake duuchcha'ni Mageni iso'ni hedhaan; isinna Magenoke'ni hedhaan. 16 Tennexxee Mageni no'aa afeexxa jaalala egennannon; isixxa jaalala'ninna amannanonni. Mageni jaalalaten; jaalalate'ni hedhaak Magnoke'n hedhaan; Mageninna iso'ni hedhaan. 17 Tenne butta duuchcha'n no'oo he'naanek Kiristoosii'i hedhamashshate kaddeemmaxxe'e jaalala no'oxxi wo'matenna kaddoole murtetixxe barra'ni soda'a belo isi edo shiqiyotee'e wo'ma adde anfeenenni. 18 Jaalalate'ni soda'aa hexxebaan; wo'ma jaalala soda'aa fulchite hundaan; soda'aa mura woxxati welti abidendeexxee yaanen. Sodaataak manjixxi jaalala wo'matebaan. 19 Mageni ediseenni no'oo eeyyemmaxxee'e no'onna isoo eenannon. 20 Ayyinna Mageno eeyyaanneni hiyya'ni dayyo ifika giba'noole isi dharichchaken. Uuda'neeka ifika dayyo eeyya'nebaak uudabaaka Mageno eeyya dande'abaan. 21 Tennexxee Kiristoosi no'aa uwweeki ajaji Magno eeyyaak dayyo ifikanna eeyyowwaal hiyyaaken.