1 Anjirallo no'oke Mageninni, adde no'oxxe kadeeke Yessuusi Kiristoosike ajajinni Yessuus Kiristoosike ergemallo kadeeke Phawuloosinaa'n.

2 Amanat dhugaatike anke belto kadee'eke Ximotoosi'a.

Mageno Anna no'oka, Gootta Yessuusi Kiristoosik badhaadhi, marartenna nage'i ati'a kadowwaal.

3 Ani Meqedooniya sa'enna wodda ate'ni maganne hiyyenna qicishshanni mitti mitti kaba hedheek manni ta'anni edi'a dhariinxa barachcho barachchiisabaashsha insa'nee ajajjota'a Efesooni ofoldotaa atee kadhatenne. 4 Iitanni xingotiba'anna muuxama afebaake ilatike daalike laakkosa'n ifi sa'isine uunabaashsha insa'ne ajaji; iitta hexxeexxi yaanuwwa moronshate ildaa malee amanat assendaaxxe Mageniinxe huje'a la'o affebaan. 5 Konne ajaajiki yaadi kinni luqqitte qalbbenaa'ni, eloxxe sammonaa'ninna dhugaatixxe amananaa'ni afeendaaxxe eeyyunten. 6 Mitti mitti tenne yaanuwwanaa'ni gargar higeexxi la'o afebaake haaso'iba'a illeema higee'een. 7 Tennenna assinachchi seerike barsissalluwwa kadatee hansemaxxeeten; kaddo mallee insa'ne umo insa'nengee haasona'neexxa yaane yookaan konkeennen hinaaxxe yaanexxeenna qalbeefantaba'a.

8 Manji hassaa qico isoo la'oonfatoole seeri elocho kadeexxa egennennen. 9 Iittanni seeri uwwemeek qulliyyetete kaddebaak seera qaxxamuraake manni'anna xaqartiyyetee Mageno sodaatabaakeri'aanna cubbaaleeyyetee, woyyomma afebaakeri'anna Mageno tuffataakeri'a, ama anna ifika shiyaakeri'anna manjo anga sa'eeke manni'aate kaddeexxa egenneennen. 10 Iittanni yabaabuluwwakeeri'anna laballoke'n yabaabulaake labballi'a, manjo hidhaakeeri'anna gurgudhaakeri'a, dhariyyetee, dharik kakataakeeri'a, dhugaatixxa barsiisa gibaake duuchchiri'aten. 11 Tinni dhuggatixxi barachcho afendaak kinni eebisemeek Mageni ane'ni maganne uwweexxe ulfaatexxe wengelenni welti weli aaggaaxxen.

12 Ergatensha ifixxee baallonse anee xuurameesinsha uudekeenna hunna ani'a uwweeka Kiristoosi Yessuusii'i Gootta no'oka galateffataannen. 13 Konneechchi edo yowwalloke, shorshannokenna xaqartichchake kedeenneke kadoonnolenna midde, haakitikinna amana gophati assennaxxee anee marariteti uudeen. 14 Yessuusi Kirsitoosinni welti anfeenneke mittoominaa'ni afendaaxxe addenninna eeyyuntenni welti Goottink badhadhi ani'a danbala'een. 15 «Yessuusi Kiristoosi cubballeeyye anjiro'a butti'a dageen» hiyyemaak hiyyichchi dhuggatikenna manji duuchchi adhdha hasisaaken; cubballeeyyetenaa'ninna umi anten. 16 Yaane kinni Yessuusi Kiristoosi iso'n amanaakeri'anna duuchchi woddixxa hedho alfaakeeri'a muuxama afebaaxxa ifixxa ossa cubbaaleeyyetike umo kadeenneke ane'ni fakkeennake asse leellishsho'a ani mararte alfenne. 17 Tennexxee duuchchi woddike kadeeke, reyaabaake, leellabaakenna qofinni Magenoke kadeeke moyanji'a duuchchi woddinaa'n duuchchi woddi'a galatikinna ulfinni isi'a kadowaal; hamiin.

18 Anke belto Ximotoosi! Konneechchi edo atixxee kulememmaka raagixxe qixxe'n konneechchi butta hedheeka ajaja ate'n uwwaannen. Kunninna eloxxa cichcha cichchitota'aaten. 19 Amanatinna eloxxa sammo horat! Mitti mitti manni sammo ifixxa belleesedheexxi abbaayyati hana rakko gelteenaa ba'aamake markabishsha amana ifixxa balleesse'een. 20 Konneeri giddii'n yowwinabaashsha barachcho alfino'aa durriisakee'e insa'nee sa'isse uwweeneke Hemenewoosinna Isikndiriten.