1 Geerchokenaa'n.

Dhugaati eeyyaannexxe ane calla kadeebo'nok dhugaa ege'neek duuchchi isee eeyya'neexxee filendeexxe baaba'anna oose isexxee; 2 No'o giddo hexxa'neexxe dhugaanaa'ni kexxeexxa;

3 Mageno Aabinna Aabike Belto kadeeke Yessuusi Kiristoosik badhaadhi, marartenna nage'i dhugaatinna jaalalati no'onni welti hedhaan.

4 Atixxe oose giddii'ni mitte mitte Aabibaa'ni no'aa uwwemeeke ajajishanni dhugaat ti'ni hine me'inaa'naa afeenexxe'e yo'oshsha gammadeennen. 5 Tee baaba, edo hedhemmaka malee'e haaroka ajaja ta'a ati'aa borreessa'ebe'non; kuninna no'oo weli'aani weli eenonna'aaten. 6 Tinni jaalalanna isike ajajuwwixxe aadashshanni he'nannoshshaten. Ajaji isikinna sirende'ni laqqineemmashshanni jaalalati hexxinaashshaten.

7 Yessuusi Kirisitoosi maalik dageexxa amanabaak heddi deedisaak manni butta duuchcha'n wo'meen. Iitta hedheek huun manjinna dedhisaakenna Kiristoosi'i gareeraaken. 8 Ha'noonna elootineemmaka hira gophphinabaashsha, yaane kinni wo'ma gica adhdhitinaashsha umo ha'nooge xexxe'atte. 9 Kiristoositoosixxe barachchiisa'ni hedhebaakinna eettene barachchiisa'ni fulaaki duuchchinna Mageni afebaan. Kiristoosixxe barachchiisa'ne hedhaak kinni Mageno Aabiinna Weldii'i afeedheeni. 10 Ayyinna ha'noobaa dagoole tenne barachchiisa iyyedagaa gophoole mine ha'nooke'n isoo adhdhitinoqqe; nage'akanna isoo aaxxinoqqe. 11 Isoo adhdhaki manjinna isixxe fuggoxxe hujexxee qoodemmaan.

12 Ha'no'aa borreessonaa halchaannexxi heddo yaane hexxemman; kaddo malee'e woraqatake'ninna tiikoti borreessonaa hasabeno; tenne irra gammashsho no'oxxi wo'mate kaddo'aa ha'nooba dagennexxi ha'noonni afeme'e kulannoxxa addattannon.

13 Iitti filendeexxe atixxe dayyoxxi oose nage'a ati'aa dhaanda'neen.