1 Ha'nooxxeenna Lodoqiyake qachcha'n hedheeke mannixxee, iittanni ille anxa uuddeexxi ege'nebaake manni duuchchixxee hitta jaba qicinni cichcha'n hedhennexxa egendino'a eeyyaannen. 2 Iittanni qalbe insa'ne dayyaatee'naa jaalallati weli weli abidemmaashsha, wo'ma kaddeexxa qalbeefachchotixxa durumma alfineexxi Mageniinxa buqo yaane kade'eeka Kiristoosii'i egenno'a si'aannen. 3 Beekkumiinxinna ege'natixxi karra duuchchi sho'onde hexxeeki Kiristoosi'niteni.

4 Tenne hiyyaannechchi fedheekinna eloke laba'ni dhariinke haaso'inni ha'noo sobabaashshaten. 5 Fedhee qico midde manjunteti ha'nobaa'ni bayyatennexxxe kaddoolenna hafuurik kinni ha'noonni welti hedhenneni; elo qico seerik hexxineexxenna Kiristoosi'ni affinneexxa jabaxxa amana uuda'n gammadaannen.

6 Yoona Gootta Yessuusi Kiristoosi'i adhdhitineemma qicinn iso'ni hedhdhee! 7 Iso'ni hidda oltitineexxi iso'ni ijaaremme; baratinemma qicinni amana ha'nooxxenni jabaatine'e wo'me danbala'aaka galata shiqishinna'n hedhdhe.

8 Kiristoosi hana kaddebaak manji fulcheexxi aadda'ninna tenne butta'n moyeeke hafuuruwwi hanna ijaaremeeke, kaba buttixxe yaane'a hunna afeeke beekumininna tooliinxenna yaanenni ayyinna ha'noo dedhinseexxi foxoorabaashsha heqqedhdhe! 9 Magenummatixxi wo'munte duuchcha bisoke'n leellite hexxaak Kiristoosi'niten. 10 Ha'noonna wo'ma hedho alfitineek galchatikenna baalloomi duuchchike umo kadeeki Kiristoosiniten.

11 Iso'ni amanat jila ofoldine'een; tinni ha'nooxxi jila ofo'laa cubbichcha maaliinka adaba fuggussatee Kiristoosinni assendeexxe malee manjiinxe anga'ni assendeexxebaan. 12 Xammaqendinee wodda Kiristoosinni welti moogendineen; Kirsitoosinni welti reyotenaa'ninna kexxineen; ha'no reyotenaa'n kexxineek Kirsitoosii reyotenaa'ni ke'issiteexxe Mageniinxe hunna'ni amanatiten. 13 Ha'noo ha'noxxe balleessaninna ha'nooke maalika cubbaaleessumatika adaba jila ofo'la gophati rertineemman; ta'a kinni Mageni Kiristoosinni ha'noo hedhotike asse'een; no'oxxa cubbo duuchchanna ha'no'a gattowwaali hiyyeen. 14 Isi no'o ku'lta'ninna xaa'nita'n hexxemmaxxa hidiinxa borro iseke seeruwwininni balleesse; fannoti hananna fannisemeexxi isee no'onaa'n fuggusse. 15 Sooreessuwwakanna baalloomuwwiinxa baalle mulqat fanniseme injifateexxi booji'emeeke kada insa'nexxi duuchiinge'n leellitaashsha asse insa'nee marensiise.

16 Tennexxee itatixxenna ha'watixxe, yookaani ayyaaiinxe, yookaani agenji fulaaxxa barra heqqedhatixxe, yookaani Edi Sanbata ulfeessatixxe buutto'a, ayyinna ha'noo'ni murte muroqqe'e! 17 Tinni yaane duuchcha edi'a daggaaxxee yaanexxe gaaddiddoten; gaaddiddo iittinna lellishshaak Kiristoositen. 18 Sobiinxe shaqunteninna erganni magenoonfatta eeyyaak ayyinna ha'noo tola gatisabaashsha heqedhdhe; iitta hedheek manji uudeexxe waleellaxxee'e ifi saada'n woyi fulabaake maaliinke heduminni wo'meexxi ifi dukaan. 19 Kunni manji, bisiinke umo kadeeke Kiristoosinni welti mittumma afeekebaan; biso duuchcha mikitikinna hiddik mitteba abidiseexxi, la'isaak umoken; Mageni biso duuchcha nossaake konne qicinniten.

20 Kiristoosinni welti rertineexxi tenne butta'n moyeeke hafuuruwwinaa'n gargarti higgineechchinni kayyi'a mayyeeta ookkone ajajuwwi'a hirendina? 21 Iikki ajajuwwinna «Abidoxxe, afo'ik maqqoxxe'e, tuqqoxxe'e!» hiyyaakeeran. 22 Ajajuwwi kunni manji giiseeke ajajuwwa'ninna manjiinxe barachcho'n ijaaremeeke kadeemmaxxee hujete'n hoseechchi uduma ba'o'a muremeeken. 23 Kunni ajajuwwi, ifixxe fedhiinni kaddeexxe magenoonfachcho'ninna sobiinxe shaqunte'n, manjuntetike biso miice abidatixxe yaane'n duudha'emmaxxee'e beekumma afeechcho labaan; yaane kinni maaliinxa gaabe abidatee mitte la'onna afebaakeeran.