12 Yoona ha’noo Mageni fi’leekenna woyyoole, eeyyendineeke kaddinemma qicinni maraarte, arjunte, shaqunte, sigguntenna ossunte oddo’we! 13 Weli’anni weli dande’we! Manji mitti weleke’ni quuqemeexxe kaddoole weli weli’a gattowwaal hiyye! Gootti Yessuusi ha’no’a gattowwaali hiyyemmashshanni ha’noonna welekee gattowwaali hiyye! 14 Tenne duuchchi iimi darre duuchchiinxe yaane’a wo’ma mittumma iyyedaggaxxa jaalala oddo’we! 15 Mitte manjunteke biso kaddineemmaxxee ye’endinnechchi konne nage’i’aate kadeemmaxxee Kiristoosik nage’i qalbe ha’nooxxe moyowwaal; galatefattinaakenna kadde. 16 Kiristoosik hiyyichchi wo’ma qico’ni ha’noo’ni hedhowwaal! Mitti mitte beekkumi duuchchinni barachchiisina’ni weli gorse! Faaroti saadinot, hafuuriinke meellinni Mageno qalbeti galateefattina’ni faarse. 17 Kirsitoosi gamii’ni Mageno Aabi’i galateeffatina’ni haaso’ikinna kaddo’o, hujetinna, assitinaaxxa yaane duuchcha Gootti Yessuusike summinni asse.
Ammaanyetike Mini Hadixxa Hedho
18 Ha’no aruwwaa! Gootti edo hasissaaxxe yaane kaddeemmaxxee ha’nooke aro’uwwi’aa ajajemme!
19 Ha’no aro’uwwii! Ha’nooxxa aruwwa eeyye! Hedho insa’nexxanna qaraarstinoqqe’e.
20 Ha’no oose! Tinni Gootta gammachchissaaxxe kaddeemmaxxee duuchchiinxe yaanenni hado ha’nookee ajajemme!
21 Ha’noo oosetiki hadi! Oose ha’nooxxi godoba kultitabaashsha insa’nee hifachchiissinoqqe’e.