1 Ha’no goottuwwi! Ha’no’anna iima Gootti hedheexxa egendineeni; tennexxee ha’nooka erganjuwwa qullumatinna seerik galche!

2 Jabaattine Mageno galateefattina’ni duuchchi wodda soodatte. 3 Tennenni welt Mageni konne hiyyichcho isike’e no’o’a ora banaashsha, iittanni isixxe buutonni usuremmeennekee, Kiristoosixxa buqo yaane lallaba dandeenannoshsha no’o’a soodatte. 4 Ani hasissaa qico’ni hiyyichcho isika ifise haaso’annoshsha soodatte.

5 Heenenna dagattaaxxe yanna la’offatina’n amanabaake manni giddo beekkumik hedhdhe. 6 Mitte mitte manji’a hasisaaka hiissichcho hiissa egendinaashsha haaso’i ha’nook duuchchi wodda elaakenna xe’make kadowwaali.

7 Eeyyemeeki no’oki dayyi aninni welti Goottiinxe huje’ni mitteba hedheekinna eeyyemeek, addatemeek erganjinna Tikiqoosi anxee duuchchiinxa yaane ha’noo’ni kulaan. 8 Isoo ha’noobaa ergeennelchchi no’o he’nenneka jeeja ha’noo’ni kulaashshanna qalbe ha’nooxxa dayyeessaashshaten. 9 Isinni weltinna addatemeekinna eeyyemeek jaalo ha’nooke kadeeki dayyi Onesimoosi ha’noobaa dagaan; insa’ne kaba hexxeexxa yaane duuchcha ha’noo’ni kullaan.

10 Aninni welti usuremeek Arsixirokoosi nage’a ha’no’a dhaameeni; Bernabaasike dayyiki belti Maariqoosi nage’a ha’no’a dhameeen; ha’nobaa dagaa wodda isoo adhdhitinaashsha konneechchi edi darre erga ha’noobaa gelteeni. 11 Iyyosixxoosi hiyyemaak Iyyaasunna nage’a ha’noo’a dhameen; moottuma Mageniinxee aninni welti huja’neeke mann giddii’ni Ayihuudake kadeeki insa’ne callaan; insa’nenna anee dayyeessineen. 12 Yessuusi Kiristoosike erganjo kade’eek Ephaafira ha’nook nage’a ha’no’aa dhaame’een; hafuuriinxe hedhonni nophphati ti’ni hitinee uurritinaashshanna fedhii Mageniinxa duuchcha egendinaashsha isi duuchchini wodda ha’no’a soodata’neen. 13 Ha’nooxxee Ephafira, iittanni Lodoqiyake’ninna Iyyaraake qachcha’ni hedheeke manni’a lumo qico elo’a’neexxa aninni isi’a dhugaa kulaannon. 14 Eeyyemeeki ci’leesichchi Luqqaasinna Deemaasi ha’no’a nage’a dhaammeeni.

15 Lodoqiya hedheeke dayuuwwi’a, Nimifu’aanna iseke mine’n hexxeexxe Mageniinxe tuutaa nage’a ani’a kulle. 16 Tenne Ergendeexxa borro ha’no haasesitineechchi uduma Lodoqiyaxxe tuuta’aanna haasseessendaashsha asse; ha’noonna Lodooqiyyake dayyuwwanaa’ni ha’no’a ergendaaxxa erga haasseesse. 17 Arkiphaasi’ninna «Goottakenaa’n adhdhitettexxa ergatensha muuxxattoshsha jabaati!» hitineexxi ani’a iso’n kulle.

18 Konne nage’a anxe anganni borreesenek ante Phawuloositen; usuremee hedhennexxanna deetinoqqe’e!

Badhaadhi Mageniinki ha’noonni welti hedhowwaal.