1 Yessuusi Kiristoosike Erganjonna Ya'iqoobike dayyo kade'eeke Yihudanaa'n;

Ye'emeekeri'a, Mageno Aabi'ni eeyeemekeri'anna Yessuusi Kiristoosinni heqqemeekeeri'a. 2 Mararte, nage'ikinna jaalala ha'no'a birasaxxowwaal.

3 Koo Jaaluwwa! Welti qoodemmaannexxi anjiraxxee ha'no'a borreessona'a lumooshsha halche'ennan; yaane kinni woyyooletee mittele muuxami qico'n insa'ne'aa uwwendeexxe amanaxxe itti cichchitinaashsha gorsa uwwonaa'a ha'o'aa borreessonna'a waalabo'noxxe yaane kadde. 4 Qeerraxxe yanna edi darre tenne murte'a borreessemeeke mitti miitti manni luuxxeexxi ha'noba'a e'yemmaxxee'e insa'ne Mageno soda'ate hinaacho afebake, Mageno no'okika badhaadha battummate'n jijiirraakeranna isi calli lumooke no'oke galchallonna Gootta no'oke kadeeka Yessuusi Kiristoosi'i waakataakeeraan. 5 Fedhree qiconna edissineen tennee egendineexxe kaddolenna Gootti arda ifika Gibtseeke boganaa'n hitta fulcheexxa uduma kinni amanemabaaka isi kutti asseexxa ha'no'ni qall assa eeyyannen.

6 Ifixxa baalomiinxa bakkuwwa heqedha gopheemmaxxa yaane kinni ifixxa galdumiinxa bakka waaldeemmaxxa erganna duuchchi woddike usurrinni eettene lumoxxe murtetixxe barra qico'ni dukkanate'ni insa'nee heqqe turse'een. 7 Iittanni Soodominna Gomoraa'a, qaraqarake'n hedhemmaka qachchuwwa yabaabulletixxe gaabbe'anna labbaki meyyaxxinni welti assammaxxe dadumiinke seer gadhi darre assendaaxxe maalinxe afenshaxxee ifi sa'issine uune; insa'nenna duuchchi woddixxe murtexxe giira'n wixxixxi hiyyammakeeri'a mammaasake kandeen.

8 Konne qicinn kunni oojjo oojota'neek manni ifinga maala battoosinaan; baallomakanna gareeraan; iimate'ni ulfinna affeexxa daduwwanna yowwinaan. 9 Ergannatike sooressa kadeek Mika'eeli midde Muuseke renshixxee daabilosinno welti moromme wodda isoo «Gootti atee xixo'o» hiyye malee'e yowwichchiinka haaso'a fulchedhebaan. 10 Kunni manni kini egennebaaxxa yaane duuchcha yowwinaan; heduma afebaake hori biniichchishsha dadumiki egenneexxe yaane'ni ba'naan.

11 Qayeelike ora'n me'inemmaxxee insa'ne'a aannee; maallaqakee haafemmaa wodda Bele'aamike dedha'n inbe'een; Qorexxe xaqaro'ninna ba'ne'een. 12 Kunni manni ha'nooxxe jaalallatixxe ita'ni mitte shooki belo ha'noonni welti shinqeexxi itaake battichcha mannan; iitanni ifi'a calla ittaaxxe allalisanon; insa'nenna diidalloti oofendamaaxxe xeenikinna giddo hedhebaake duumenchuwwan; insa'nenna aassecatixxe maye wodda gumma afendabaake, hiddakenaa'n goshendeexxe haquwwashsha lamele reyekeerani. 13 Insa'nenna mufateeke abbaayyatike dambala'ishsha ifixxe battumaka honba honbeessaakiirsha, dimma dukkana duuchchii woddi'a insa'ne heqqitaakeeranna jeeki hitammaxxe urjuwwashshaten.

14 Addaaminaa'n torbaxxe ilake daalo kadeek Henook konne mannixxee hiyye wabeekkuma haaso'ee qici, «Yoona; Gootti laakkone dhaqqanbabaaxxe ifixxe woyyoole ergannanni welti dagaan. 15 Tinninna manjo duuchcha'ni murte uwwo'a iittanni cubbaalleeyye duuchcha hunjeexxe xaqarotixxe huje'anna fuggoxxa iso'ni haasonneeke yowwichchiinke haaso'ixxe duuchchi'a balleessanjumma insa'neexxa insa'ne'n kokeesso'aten» 16 Kunni manni maamuqaakenna wele manna ku'la'neeke mannan; insa'nenna ifixxe fuggoxxe halcha hordonfaan; ifi dunkaan; la'o alfatee hineexxi wele manna kubbinsaan.

17 Yaane kinni koo jaaluwwa! Gootta no'oke Yessuusi Kiristoosixxi ergameeyye edisse haasotemmaxxa qaabbatte. 18 Insa'nenna, «Udumike barro'n ifixxa battitte yaanuwwa hordoffaaxxi qacifameeyye daggaan» insa'ne'e hineemman. 19 Kunni manni ha'no giddo gargarunte hexxaashsha assakeeran, maalinxa gaabbe hordofaake Woyyichcha Hafuura afebaake mannan. 20 Ha'no kinni koo jaaluwwaa! Lumooshsha woyyittete kaddeexxe amana ha'nooxxee'e ifi ijaaratee jabaatte. Woyyichchi Hafuurn soodatte. 21 Duuchchi woddixxe hedhoba ha'no geessisaak, Gootta no'oke Yessuusi Kiristoosixxa mararte hexxine'e Magenixxe jaalalanni ifi heqqedhe. 22 Mitte mitte mamaake manni'a mararre. 23 Mitte mittekanna giiratenaa'ni fulchitineexxi anjirre; iittanni wele manna cubbot battossaaka insa'neeka biso kisseexxa seemma midde gibbina'ni soda'ati insa'ne'a mararte leellishshe.

24 Ibbinaabaashsha ha'noo heqqo'anna ci'mabelonna gammashshoti ifike ulfinni edo ha'noo shiqisha dande'aaka, 25 isi calli anjirallo no'oke kadeeke Mageni'a Gootta no'oke Yessuusi Kiristoosi gammii'n bari duuchchi edo ta'anna duuchchi woddi qico'ni ulfinni, gaachchanna hunnanna baallomi kadowwaal. Ameen.