1 Rakke kada hasissaaxxa yaane ifike erganjuwwa'n leellisho'a Mageni Yessuusi Kiristoosi'a uwweexxi waleella konneechchi butta hexxeexxen. Yessuusinna iimika ifika erganjo ergeexxi ifika erganjo Yohaannisi'n tennee waleella ifise. 2 Yohaanisinna Mageniinke hiyyichchixxeenna Yessuusi Kiristoosixxe dhugaa kulaxxee afeexxa duuchcha dhugaa kule. 3 Barra shiqqe'een, yoona konnee raagiika hiyychcho haassessaak eebbisemeeken; tennee laaqaakiirinna isi giddo borreessendeexxanna heqedhaakiir eebbisemeeken.

4 Yohaannisinaa'n.

Issiyake awuraaja'n hexxeexxe eettene torbaane Mageniinxe tuutaari'a.

Hedheekeen, hedhemmakenaa'ninna dagaakenaa'n, isixxe mootte edo hedhemmake ookkone torbaane hafuuruwanaa'n, 5 iittanni xuurameessa dhugaa kula, reyotenaa'n ke'ati angafa kade'eekenna buttatike moyanjuwwike galchallo kade'eeke Yessuusi Kiristoosinaa'n badhaadhikinna nage'i ha'no'aa kadowwaal.

No'oo eeyyeekeenna no'oxxe cubbonaa'n leexa no'oo fulcheekee'e, 6 Yessuusi Kiristoosika Magenonna Anna ergatemmonnaa no'oo moyanjuwwakenna qeesete asseeke, Yessuusi Kiristoosi'a ulfinnikinna hunna duuchchi woddanaa'n duuchchii woddi'a kaddowwaal. Hamiin.

7 Kunnise, isi duumanchik dagaan;

iikki isoo oteekiir midde gatebaang manji

duuchchi isoo udaan;

buttatik arduwwi duuchchi isinaa'n kexxeexxa odhaan;

Eeti tinni duuchchiinxi kaddaan. Hamiin.

8 Hedheek hedhemmakinna dagaak duuchchiinxa dande'aak Gootti Mageni, «Alfaana Oomeega edikinna udumik anten» hiyyaan.*

9 Ani dayyi ha'nook Yohaannisi ha'nonni welti mitteba Yessuusixxa rakkonna isixxa mootumma, isixxa ossanna qoodema'eennek ani, Mageniinke hiyyichchixxeenna dhugaa kula Yessuusixxee Fiximo hiyyemaake oddool giddo usuremee hedhennan. 10 Goottinxe barra'n ani Hafuurk hedhennan; malagatiinka hafuura fakkataaka jabaka hafuura ifi uduma laqeennen. 11 Kunni hafuurinna anee, «Uuddatteexxa mirqesanjo maxaafa'n borreessitetexxi Efesooni'n, Semirneesi'n, Phergamoo'ni'n, Tiyyaxirooni'n, Serdeesi'n, Filaadelfiya'ninna Lodoqiya'n hexxeexxe eettene torbaane Issiyaxxe Mageniinxe tuutuwwabaa ergi» hiyye.

12 Aninna ookkonee ane'n haaso'ammaka hafuura uudatee udumaa wirri hiyyenne; wirri hiyyenne wodda torbaane worqetika xasii uggemalcho afenne. 13 Ookkone xasiinke uggemalchuwwixxe oddo'n manjiinka belto fakkaataaka afenne; isinna lekka isixxe qico'n qeerrexxeexxa oddoono oddo'we'eeke, ifixxa qomanna woreqeti sabbatinni usudhe'eemmakemman. 14 Isik uminna isike uumiink ordichchi golalooxxe gedhebiinxe ordashsha, kaadetishshanna golalookeemman; isixxi illeerinna giirati bubenjo labba'eemman. 15 Isixxi lekkaarinna giirati kashilo'n finiineeke sageetotike sibljo fakkaata'eemman; isik hafuurinna heddo gooto woddi'ike luuljishshatemman. 16 Ifixxe middixxe anga'n torbaane urjuwwa afe'eemman; isike afo'onaa'ninna laamii darree'n qara afeedheek wolaantichchi fula'eemman; isik albi duuchchi lumoshsha wa'a hiteexxi xabbammaxxe arishshoshatemma'a.

17 Ani isoo afenne wodda reyeeke manjishsha isixxe lekka hunda ibenne; isinna middixxa ifixxa anga ani hana uggeexxi ane'n hiyye qici, «Mee sodaati, edikinna udumik anten. 18 Ani hedhanoken; reyedhennan, kunse ta'a duuchchii woddanaa'n duuchchii woddi qico'n ani hedhannoken; reyotixxinna wiida balexxi qulfe anxe anga'n hexxeen. 19 Tennexxee uuddaattexxa ta'a hexxeexxanna uduma kaddaaxxa borreessi. 20 Anxe middixxe anga'n uuddeettaaxxa iitti torbaane urjuwwanna ookkone torbaane worqeti xassi uggemalchixxi buqo yaane tinni: iitti torbaane urjuwwa eettene torbaane Mageniinxe tuutaxxe ergannan*; torbaani xassi uggemalchuwwi iittanni torbaane Mageniinxe tuutan.»