1 Ondeessok iimik erganji malagata ifika ufuufe; iimi'ni butti'a ibbeexxa urje uudenne; tinne urje'ninna eettene dhi'mo baleexxi qulfe iso'ni uwwende. 2 Eettene dhi'mo balenna banee wodda giddii'n lumoxxe booso giddii'n fuldammaxxe wiliilleshsha hexxeexxi wiliille fulde. Eettene bale giddii'n fuldeexxe wiliillenni arshonna iima dukkande. 3 Wiliille giddii'n awwaanessi fuleexxi buttate'n offo'le; buttattixxe gaadduwwake baalloomishsha hedheeke baalloomi ookkonne aawwanessuwwa'a uwweme. 4 Kunni awwaanessuwwinna buttatixxa bada'a yookaan hoone quffeeka hiddichcho yookaan haqichcho miidhabaashsha, yaane kinni Mageniik maxxanissi alba insa'neeke'n hedhebaaka manna calla miidhaashsha ookkone awwaanessuwwa'n kulende. 5 Insa'nenna kunni awwaanessuwwi onde agenjo miidhaashate malee shiyaashsha baalle konne awwaanessuwwi'a uwwendeba'a; awwaanessuwwikinna majoke'n geessissaaxxe seldo qiilla gammoojje gaaddo idditeexxi manjoke'n idagammaxxe seldoshsha hexxeexxe seldon. 6 Eettene barraara'n manni reyote halsaan, yaane kinni alfaba'a. Reyateenna halchaan yaane kinni reyo insa'nenaa'n bayyatta.

7 Iikki awwaanessuwwi lolakee qixxeessemeeke fadhado fakkata'emman; umoke'ninna worqetika kallachcha fakkataachcho uggudhe'emman; albikinna majiinke alba fakkata'emman. 8 Umiinki ordichchinna melaalletike umi ordichcho, issotinna neenqiixxe isso fakkaatta'emman. 9 Sibljiinxi qomatixxe seemma fakkaattaaxxa seemma anfe'emman; keeluwwi isikik hafuurinna lolinba'a guulaammake heddo fadhadikenna sarageelliinke hafuura fakkaata'emman. 10 Qiilla gammoojjexxe gaadoxxe eegeshsha hexxeexxa eegenna idditaachcho afee'emman; iittanna manjo onde agenjo seldo idagaaxxi hunna eege isixxe'n hexxemman. 11 Kunni awwaanessuwwinna ifike moyanjo afe'emman; isinna dhi'mo balleke ergajon; summi isikinna Ibirayisixike afo'inni «Abadoon» iittanni Giriikikenninna «Aphpholiyoon» hiyyemaan.

12 Taakkaxxi aannee! Saxxe'een; kunnise ta'anni udumi'a lame aannuwwa daggaan.

13 Jiyaki iimik erganji malagata ifika uufuufe; Mageni edo hexxeexxxe worqetike tolchimalchike gaafuwwinaa'n hafuuri daga'naa laqennen. 14 Kunni hafuurinna malagata afeeke jiyake iimke erganjo'n, «Lumoke Eefiraaxisike galaana'n usurendeexxa eettene shoole erganna tiki» hiyye. 15 Manjiinxe sannenaa'n sakkaxxa anga shinaashsha, tenne sa'ate'anna barra'a iittanni konne agenji'anna wogga'a qixxessemeexxi hedhemmakiir tenne yanna'anna tenne barra'a, konne agenji'anna tenne wogga'a qixxesende hexxemmaxxi iitti shoole erganna tikende. 16 Ookkone fadhadinke sannachchik laakkossi lame dhibba miloonemman; aninna laakkossa konne fadhadika laqenne. 17 Anxe leellanni afenek fadhadininna hana gulfeemmak manni konnechchi butta hedheeshsha hedhemman: konne gulufemmake mannixxe qoma'n hexxeemmaxxi sibljiinxe seemma giiratishsha diimooxxe, yaakinet hiyyemaake fiixa kinjishshanna iimatixxe bifaxxe, diine hiyyeme ye'emak gubaak kinjishsha we'lite bifa fakkataa'emman; ookkone fadhadiink uminna neenquwwiinke umo fakkata'emman. Ookkone fadhaduwwike afo'uwwinaa'ninna giira, wiliillenna diine hiyyemaak fiixi kinji fula'emman. 18 Konne fadhaduwwike afo'inaa'n fuldeexxe sase balanaa'n tinninna girat, wiliillenna diine hiyyemaake fiixi kinjinni manjinxi sannexxa sakkaxxi anga shiyende. 19 Tinni kaddeechchinna konne fadhadixxi hunna afo'oke'ninna eegete'n hexxemman; eegetinna bofa fakkaata'emman; kunni fadhaduwwi umuwwa affeemmaxxe miidhensha geessissa'emmaki konne ummuwwinnitemman.

20 Tenne balaarini sheyemebaak gateek manni ta'anna ifixxe angaxxe hujenaa'n hingeexxi ta'anna aadde angeba'a; fuggichcha hafuuruwwa iittanni uuda yookaan laqa yookaan me'a dande'abaaka worqetika, biretike siljika, sageettotike sibljkaa, kinjinkanna haqichchiinxa fakkuwwa magenooffachcho waaleba'a. 21 Iittanni insa'ne manjo anga sa'atenaa'n, morotixxe hujenaa'n, yabaabulletixxe battomanaa'n yookaan mooriinxe hujenaa'n aadde angebaan.