1 Ookkonechchi uduma gedhechchinna torbaane maxxansinaa'n sirtixxi tika bandaa'na afe'een; ookkonechchi uduma eettene shoole hedho affeemmaxxe daduwwnaa'n mitti dindinso fakkata'eek hafuurinni «Amo» hiyyanaa'a laqenne. 2 Aninna uudennen, kunnise golalooke fadhachchi uureemman; iso'ninna ofo'leemmak anga gabe afeemman; kallachchikinna isi'a uwweme; isinna injifatalloke kade fule.

3 Gedhechchi langaka maxansa tikaa woda langaxxi hedho afeemmaxxi dada «Amo» hiyyaa'na laqenne. 4 Wele kashilo fakatak diimok fadhachchi fule; iso'n ofoleemmank nage'a buttatenaa'n adhdhashshanna manni weli'aa weli duulaashsha assatee isi'a baallomi uwweme; lumok wolantichchiknna isi'a uwweme.

5 Gedhechchi sakkaka maxxansa banee wodda sakkaxxi hedho affeexxi dada, «Amo!» hitaa'naa laqenne; aninna uudenne, xillok fadhachchi uurre'naa afenne; iso'n offo'lemmakinna anga kiilo afeemman. 6 Ookkone shoolinxe hedho affemmaxxe dadanaa'n mitti, «Gamisa kiilo dinne mitte barraka runda, mitte kiilonna gamisa so'a mitte barrake runda kadowwaal; zayitetanna woyine kinni miitoxxe» hiyyaaka hafuura laqenne.

7 Gedhechchi sholgaka maxxansa banee wodda sholigaxxi hedho affeexxe dadaki, «Amoo!» hiyya'naa laqennen. 8 Aninna uudenne, kunnise bifa isixxi wekkeliteeki fadhachchi uurre'naa uudenne; iso'n ofo'lemmakinna summi reyotemman; reyemak manni hedhemmaxxi buttanna isoo hordofa'emman; kunnichchuwwinna wolaantichchik, solo'iinxe ballaninna buttatike biniichchinni shinnaashsha, buttixxe sholgaxxe anga'n baallomi konelchuwwi'a uwwemeen.

9 Gedhechchikinna ondeesoka manxansa tikee wodda Magenike hiyyichchixxenna kulemmaxxe dhugaa kulaxxe dulemeeke mannixxa lubbuwwa ookkone tolchimalchi hunda afenne. 10 Insa'nenna jabake hafuurinni «Duuchinga galchitattoke Woyyichchikinna dhugaati Gootta, murteboxxok haani qici'ate? Buttate'n hedheekeera'n no'oxxe mundexxee halo fulda'eeboxxoki haani qici'ate?» 11 Okkoone uduma mitte mittengee golalooxxi seemma uwwende; edi'a insa'neshshanni shiyemaake erganjuwwi jaaluwwinna insa'neke dayyuwwiki laakkosi wo'maa qico heenoxxa yanna ossinaashsha insa'ne'n kulende.

12 Gedhechchikinna jiyaka maxxansa tikaa'na'a uudenne; lummoxxi buttiniixxi lele'manna kadde. Arshotinna yaadotixxe seemmashsha xillexxe; agenjikinna mundetishsha diimmedhe. 13 Ode'inka haqicho jabaxxi diidallo lele'missammashsha raxemmabaaxxi gummanna isonaa'n harcaatammashsha iimatixxi urjuwwanna butti'a harcaate. 14 Iimatinna mirqisanji maxaafishsha mirqende baxxe; koobuwwatinna oddooluwwi ififixxe bakkanaa'n fuggussemme. 15 Ookkonechchi uduma buttatik moyanjuwwinna galchalluwwi, bagedink ja'laabuwwi, dureeyye, jajjabuwwi, garbuwwikinna goottuwwi duuchchi wolo'uwate'ninna koobuwwatixxe rassuwwa giddo sho'omme. 16 Insa'nenna koobuwwatanna rassuwwate'n hinee qici: «No'o hana ibbe! Ookkone mootete'n offo'lemmak edo, ookkone gedhechixxe mufenaa'n no'oo sho'we. 17 Lummoxxi mufetixxi barra dagemmaxxee aateta dande'e uurraa?» hine.