1 Ookkoneechchi uduma shoole erganna sholinge buttatike kasa'n uurritee'na'a afene; ergannatinna diidallo buttate'n yookaan abbaayyate'n yookaan hoone haqichocho'ni diidaleestabaashsha eettene shoolinxa buttatixxa diidalluwwa abinde. 2 Ookkoneechchi uduma hedhaake Magenika maxxansa afeek weli iimik erganji borotenaa'n dagaa'naa afenne; isinna buttatanna abbaayya miidhatee baallomi insa'ne'a uwwemmeexxa shoolinxa eetene erganna lumoke hafuurinni, 3 «No'oke Magenike erganjuwwike alba'n maxxansa maxxasinanno qico'n butta yookaan abbaayya yookaan haqichchuwwa miitinnoqe'e» hine.

4 Ookkone maxxansemeeke mannika laakkossanna laqqene; insa'nenna Isira'eelitotike gosati mini mini hadi duuchanaa'n dhibbanna shoole tommenna shoole kumamman. 5 Yihudake gosati minenaa'n tommenna lami kumi, Roobeelike gosati minenaa'n tommenna lami kumi, Gaadike gosati minenaa'n tommenna lami kumi, 6 Aseerike gosatike minenaa'n tommenna lami kumi, Niftaleemike gosati minenaa'n tommenna lami kumi, Minaaseke gosati minenaa'n tommenna lami kumi, 7 Simi'oonike gosati minenaa'n tommenna lami kumi, Leewwike gosati minenaa'n tommenna lami kumi, Yisakoorike gosati minenaa'n tommenna lami kumi, 8 Zaabilloonike gosati minenaa'n tommenna lami kumi, Yooseefike gosati minenaa'n tommenna lami kumi, Biiniyaamike gosati minenaa'n tommenna lami kumi manni maxansemme.

9 Ookkoneechchi uduma uudenne; eettene moote edonna ookkone gedhechchi edo ayyinna laakko'eexxi dande'aabaake ardakenaa'n, gargar gargar hexxexxe gosa gosake minenaa'n, anchi anchiike mannanaa'n, laagaduwwa duuchchanaa'n hara bira sa'eek manni uurre'emman; insa'nenna golalooxxa seemma odo'wineexxi meexxetika shafa anga anfeemman. 10 Insa'nenna jabake hafuurinni,

«Anjira mootete'n ofo'leeke

no'oke Magenixxenna ookkone gedhechchixxen» hine.

11 Iitti erganna duuchanna eetene mootenna eettene geedhe edo shoolinxe hedho affeexxe daduwwaxxe dowwe'n uurrite'emman; insa'nenna eettene mootte edo albik kumbu hiteexxi Magenoke magenooffante.

12 Insa'nenna hina'emma qici,

«Ameen,

Saadinotinna ulfinni,

Beekkumi, galatikinna gaachchanni,

Hunnatinna uduudi

Duuchchi woddinaa'n duuchchi woddi'a Mageno no'oke kadowwaal,

Ameen.»

13 Ookkonechchi uduma geedhetenaa'ni mitti anee, «Kunni golalooxxa seemma oddo'week ayyeteera? Habaa'n dange?» hiyye qore.

14 Aninna iso'n, «Goottaa atete ege'ndete» hiyyenne.

Isinna hiisseexxi, «Kunni lummoxxe rakkonaa'ni dageekeeran; seemma ifi ifixxanna ookkone gedhechchixxe mundenni anshe'neexxi ca'a assene'een. 15 Tennexxee,

«Insa'ne Mageniixxe moote edo he'neexxi

hashsha barra galma isike'n isi'a ergatammaan;

Mootete'n ofo'leekinna ifika dunkaana

insa'ne hana diriisaan.

16 Ta'anni edi'a insa'ne solo'winaba'a;

konnechchi udumanna dhebowinaba'a.

Arsho insa'nee gandaba'a,

holati duuchchinna insa'ne gubaba'a.

17 Tinni kaddaachchinna eettene mootexxe oddo'n hedheek

gedhechchi insa'neeke allalsanjo kadaan;

Hedhotike wode'ixxe muummeba'anna insa'ne'e akeekaan;

Mageni indiddo duuchchanna ille insa'neexxenaa'n fiyaan.»