1 Eetenne torbaane buuduwwa anga afeemmake iimike erganjuwwanaa'n mitti dageexxi ane'ni hiyyee qici, «Amo heddo wodu'uwwa'n hana ofolde'emmaxxe lumoxxe yabaabulto manjichchoxxa murte ate'ni leellishannon. 2 Buttatiki moyanjuwwi isenni welti yabaabuleen; buttate'n hedhemmakiirina isexxe yabaabullexxee woyinetixxe bookanni machchoone.»

3 Ookoneechchi uduma iimik erganji Hafuurik qiila gammoojje giddi'a anee imare; ookkonna mitte manjichcho yowwichchink summi itti wo'meexxe torbaane umuwwanna tomme gaafuwwa afeeke diimoke biniincha'n hana ise ofoldeena'a afenne. 4 Iitti manjichchonna baddeesitenna diimoxxa seemma oddo'wite'emman; iittanni worqeti, inquute hinaxxe ulfaattexxe kinonninna hiri fiixxexe kinonni danchessexxeemman; diqachiisaachchonna ifixxe yabaabulaxxi battumma itti wo'miteexxa worqetixxa buuda anga abixxiteemman. 5 Isexxe xiyyo'ni borreesseme'emmak buqok summi hiyyaamma qici, «Tee lumoxxe Baabiloon, yababulluwwixxenna buttatixxe battuwwaxxe ama» 6 Iitti manjichchonna qulliyyettixxe mundenninna Yessuusixxe dhugaa kuluwwaxxe mundenni machchote'naa afenee; ise afenne woddanna lumoshsha mambe'a hiyyenne. 7 Ookkoneechchi uduma iikk iimik erganji anee: «Mambe'a hitaattelchi mayeete? Tenne manjichchoxxa buqo yaanenna ise itti hana ofoldemmakika, iittanni torbaane umuwwanna tomme gaafuwwa afeemmakike ookkene biniinchixxa buqo yaane ate'ni kulannon. 8 Iikki afettak biniinchi edonni hedhemman ta'a kinni hedhebaan; uduma dhimo balenaa'n fulaan; ba'netibaanna me'aanni; butta duuchcha dadendeexxe yannanaa'n insa'ne summi hedhotike maxaafa'n borreessemee leellabaak buttatik manni iikki biniinchi edonni hedheeke ta'a kinni hedhebaake uduma dagaake kaddeexxa undaa wodda manba'a hinaan.

9 «Beekkuma affeexxi sammo hasendaaxxi iitee woddan; iikki torbaani umuwwi iitti manjichcho itti ofoldaaxxe torbaane koobuwwan. 10 Tinni koobuwwanna torbaane moyanjuwwan; ondi ibe'een, mitti hedheen; weli ta'i qico dageebaa; dagaa wodda kinni turaak heenoxxe yanna'aaten. 11 Edo hedhemmakinna ta'a hedhebaak iikki biniinchi saddeetike moyanjon; isinna ookkone torbaanenaa'n mitteke kadaa wodda, ba'netiba'a me'aan.

12 «Iikki affeettak tomme gaafuwwi mooyebaake tomme moyanjuwwan; yaane kinni ookkone biniinchinni welti mitte saate moonashsha iikki moyanjuwwi baallooma adhdhaan. 13 Kunni tommi moyanjuwwinna mitte yaada anfeen; hunna ifixxanna baalloma ifika ookene biniichi'a uunaan. 14 Kunni moyanjuwwinna gedhechcho ookkene lollaan; gedhechchi kinni konne moyanjuwwa injifataan; tinninna kaddachchinna isi goottoletike Goottanna moyanjuwwinke moyanjon; isinni welti hedhe hedhemmakiir ye'ememmakiir filememmakiirinna xuurameessake kadeemmakiir isinni welti injifataan.»

15 Iiki iimik erganjinna hiyyee qici, «Iitti yaabaabulto manjichcho itti hana ofolde'naa affettak wodu'uwwi, aanchi aanchik manni, heddi manni, ardikinna gargar gargari afo'uwwa haaso'ammakeeran. 16 Iikki biniinchinna iikki affettak tommi gaafuwwi eettene yabaabulto ginbaan; saalibelonna gatinsa; maala isekanna indaan; giirate'n isee gunbaan. 17 Mageniink hiyyichchi muuxemaa qico'ni yaada ifika muunxo'a iittanni mitte yaada'n weli aangashshanna ififika baaloomuwwanna ookkene biniinchi'a uuno'a konne yaada qalbe insa'neexxi giddo uggeeki Magenoken. 18 Iitti ati affettaxxi manjichcho buttatike moyanjuwwa'ni mootaaxxe ookkone lumoke qachchan.»