1 Ookkonechchi uduma afenne kunnise iikki gedhechchi Tsiiyoonnixxe kooba'n uurre'emman; isinni welti summi isikinna isike Annik summi insa'exxe xiyyo xiyyo'ni borreessememmak mitte dhibbanna shoole tommenna shoole kuma manna hedhemman. 2 Iiminaa'ni lumoxxe gootoke luuljishshanna lumoxxe dindinsoshsha hedheeka luuljo laqenne; kunni laqennek luuljinna bagana ganammak manni ganammake luuljishsha hedheekemman. 3 Insa'nenna eettene moote edonna eettene shoole hedhotixxe daduwwa edonna iittanni eettene geedhe edo haaroxxa faaro faarsine; buttatenaa'n wodemeeke ookkone dhibbanna shoole tommenna shoole kumi manni gadhi darre tenne faaro ayyinna barata dande'ebaan. 4 Insa'ne melaalleti ifi battonsebaake mannan; ifixxa ca'unte heqqene'een; insa'ne iikki gedhechchi me'aaba duuchcha isoo hordonfaan; Magenokeenna ookkone gedhechchi'a angafoole kandaashsha manji giddii'n wodemeeke mannan. 5 Afo'o insa'neeke'n mitti dharinna afemebaan; mitti ci'minaachinna insa'nen hedhebaan.

6 Ookkonechchi uduma weli iimik erganji iimii'n phirri hiyye me'aa'naa afennen; isinna buttate'n hedhaake gosa gosatike mini'a, gargar hedheeke laagaduwwi'a, aanchi aanchike manna duuchchi'a lallanbaaxxa duuchchi woddixxa wengeele abixxeemman. 7 Isinna hafuura gikki asseexxi, «Mageno sodaatte! Ulfinnakanna isi'a uwwe; murtetixxi yanna galte'een; iimmanna butta abbaayyatanna wodi'iinxa muummuwwa duuchcha dadeekee kumbu hiyye» hiyye. 8 Weli langak iimik erganjinna, «Ardi duuchchi ifixxe yabaabulexxe mufetixxa booka ha'waashsha assitemmaxxi lumoxxi Baabiloon, ibbe! Ibbe!» hiyya'ni isoo hordofe.

9 Weli sakkak iimik erganjinna hafuura gikki asse ookkone lame iimika erganjuwwa hordofa'n hiyyee qici, «Ayyinna ookkone biniinchi'anna misile'a kumbu hiyyaak, beessisa isikanna angate'n yookaan xiyyote'ni uggudhaak hedhoole, 10 isi kinni mittilchinna makemebaaka isixxe mufexxe buuda giddo wo'miteexxa Mageniinxe mufexxa booka ha'waan; eettene qulliyye erganna edonna ookkone gedhechchi edo giirate'ninna gubbaaxxe diinne hiyyemaake gubaake kinjinni rakko adhdhaan. 11 Insa'neexxe rakkoxxi wiliilleenna duuchchi woddinaa'n duuchchi woddi'a iimi'a tuqu tuqu hitaan; ookkene biniinchi'anna isixxe misile'a magenoonfataakiir yookaan isike summika beessisa adhdhaakiir duuchchi hashsha barra hafuura adhdha hexxaba'a.»

12 Mageniinka ajajuwwa heqqedhaakiirinna Yessuusinna amanati ossate'ni jabaataaxxe woyyoole ege'nedaak tennenniten.

13 Ookkonechchi uduma, «Ta'inni edi'a Goottake'ni hedhe reyaakiir eebbisemeeken hitettexxi borreessi» hiyyaaka haaso'a iiminaa'n laqenne.

Hafuurikinna «Eeti elotenaa'n» hafuura adhdhino'a «ifixxi huje insa'nee hordofaan» hiyyaan.

14 Ookkonechchinni uduma uudennen, kunnise ani edo golalook duummachi hedhemman; isi hananna Manjiinka Belto fakkataak ofo'leemman; isinna umoke'ni worqetika kallachcha uggudheexxi qaraxxa haanto anga afeemman. 15 Weli iimk erganjinna woyyichchi Galmi giddii'n dageexxi duummachii hana ookkone ofo'lemmake'e «Haamatixxi yanna geltemmaxxee atixxa haanto adhdhitetexxi haami; buttixxi haamatixxi maye gelte'een» hiyya'n hafuura gikki asse haaso'e. 16 Tennexxee iikki duumanchake'n ofo'leemmaki haanto ifixxa butti'a wocci asseen; buttatinna haamende.

17 Weli iimik erganjinna iimate'n hedheeke Galminaa'n fule; isinna iittanni qaraxxe haanto afeemman. 18 Giirate'n baallooma afeek weli iimik erganji tolchimalchokenaa'n fuleexxi eettene qaraxxa haanto afeeka «Rodde raxxemmaxxee atixxa qaraxxa haanto adhdhitetexxi buttate'n hexxeexxa woyinetixxa rodde bukki assi» hiyya'ni hafuura gikki asse haaso'e. 19 Iikki iimik erganjinna eettene ifixxa haanto butti'a wocci asse; buttatixxe woyinexxa rodde bukki asseexxi lumoke Magenixxe mufexxa woyine miincammaxxe bakka'ni insa'nee hune. 20 Iitti woyinna ookkone qachchi gadho woyinetixxe miicenshaxxe bakka giddo hirbeesende; woyintixxe miicenshaxxi ejuma fadhadiinke bixaali qico'n geyaak qeerrinnikinna sase dhibba kiilo meetire qico geltaaxxi munde eettene miicatixxe bakkanaa'n fulde.