1 Eettene Moote'n offo'leemmak giddonna gadho itti borreessemeexxi torbaane maxxansik buqemeeka mirqisanjo maxaafa middixxe anga'n afee'naa afenne. 2 Mitte worbi iimik erganji jabake hafuurinni, «Maxansuwwa tikateenna ookkone maxaafa banatee dande'a afeek ayyete? Hiyya'n lallaba'naa afenne» 3 Yaane kinni iimate'nite kaddoo buttate'n buttati hundi darrenna ookkonee maxaafa banateenna diriiseexxi uudatee dande'a afeek mittikinna hedhemmaba'a. 4 Aninna ookkonee mirqisanjo maxaafa banatee yookaan diriirisseexxi uudatee dande'a afeek hedha gophemmaxxee lumooshsha oodhenne. 5 Ookkoneechchi uduma eettene geedhe giddii'n mitti anee, «Mee oodhi, kunse Yihudake gosati minik neenqi Daawwitik hiddi injifate'een; isinna maxaafa ookkone bano'anna torbaanniinga maxansuwwa tika dande'aan» hiyye.

6 Ookkoneechchi uduma eettene mootexxe oddo'ninna eettene shooliinxe hedho affe'eexxe dadawwaxxe oddo'n, iittanni eettene geedhexxe oddo'n dulemeeke fakkataak gedhechchi uurreenaa afenne; iikki gedhechchinna torbaane gaafuwwanna torbaane ille afe'eemman; kunniirinna butta duuchcha'n ergeme'eemmake ookkone torbaane Mageniinke Hafuuruwwan. 7 Isinna dageexxi eettene moote'n ofo'leemmakenaa'n middixxe anganaa'n ookkone maxaafa aadhdhe; iikki Gedhechchinna dageexxi ookkone mootete'n ofo'leekixxe middixxe anganaa'n ookkonee maxaafa aadhdhe. 8 Ookkone maxaafanna aadhdhee wodda itti shoole hedho affeexxi daduwwanna iitti lame tommenna shooliinxi gedhe ookkone gedhichchi edo ifi fike albinni gonbisende; kunniir mitti mittiing woyyoletixxe soodachcho kade'eechcho baganakanna hixaan itti wo'meexxa worqetixxa qore anga anfeemman. 9 Haaroxxa faaronna kunniir hina'n faarsinee qici:

«Atixxe mundenni gosa gosati mininaa'n,

laagadi laagadinaa'n, anchi anchinaa'n, gosa gosa ardi duuchchinnaa'n

manna Magenokee wodatee

ati duulendeetaxxee

ookkenee mirqisanjo maxaafa aadhdhateenna

maxansuwwa tikatee atee dandeessissaan.

10 Ati insa'nee no'oke Magenixxe mootummaxxe qeese assiteeten;

insa'nenna buttate'n moonaan.»

11 Ookkoneechchi uduma uudennen; heddo laakkossixxe ergannaka hafuura laqenne; laakkossi insa'neekinna heddo kumuwwanna heddo miloone'n laakko'emaakemman; kunnichchuwwinna eettene moote'ninna eettene hedho affeexxe daduwwa'n, eetene geedheexxe dowwe'n doowweemman. 12 Kunnichchuwwinna jabake hafuurin hiyyee qici:

«Duleemeeke gedhichchi hunna durumma,

beekkuma uduuda,

ulfinna gaachchannanna, galata

adhdha is'a hasissaan.

13 Konnechchi uduma iimate'ninna buttate'n, buttati hundi darree'ninna abbaayyate'n konnechchuwwi giddo hexxexxi daduwwa duuchchinna:

Eettene moote'n ofo'leekeenna ookkene gedhechchi'a

galatikinna gaachchanni, ulfinnikinna hunna

duuchchi woddinaa'n duuchchi woddi'a isi'a kaddowwaal» hita'n faarsitaa wodda laqenne.

14 Iitti shooliinxe hedho affeexxi daduwwa «Ameene» hite; iitti geedhenna ififike albinni kumbu hiteexxi magenooffatte.